因為去完韓國番黎，個人番左黎，但個心仲喺韓國，所以近排都係好落力地搵韓國野食，早幾日喺尖沙咀中伏，所以琴晚食番比較穩陣嘅炑八。因為收工都已經比較夜，所以淨番比較少客人，職員都比較專注serve我地。見到有幾款套餐，咁我都唔太想煩，所以直接點左韓牛套餐(3-4人)~
基本上同大部分嘅韓燒一樣，都店員都係即時送上小菜，倒上爐邊蛋、芝士粟米、沙律等等，都係可以refill的~我同朋友都好鐘意呢度嘅泡菜，唔太酸唔太辣又帶少少甜💜~
🔸飲品方面我地點左菊花梳打 $32 同埋荔枝梳打 $32
如果睇過我寫烤雞食評，我都唔止一次講過，好多韓國野嘅飲品都係好cap水，明明都係梳打、色素，點解要收人八十幾九十蚊杯？
人地又係連鎖，你又係連鎖，飲品定價我只係接受到三四十蚊杯頂盡。
食韓燒點菊茶梳打幾唔錯，正常野啦冇乜特別好講。
🔸韓牛套餐 $785（3-4人）
雖然話係3至4人，但4個人都食唔哂，如果多人啲可以再單點少少野食都會夠~
呢個套餐包括：
韓牛肩胛肉、八爪魚、大蝦、LA牛骨、護心肉、厚切五花腩、甕醃1++韓牛五花肉、泡菜煎餅
喺韓國冇食到韓牛，只係食左兩餐燒肉，都有少少可惜，所以點呢set都當小少彌補心靈，因為佢地都話係韓國直送。
4隻蝦都幾大隻，爽口。肉方面個人比較鐘意護心肉同五花腩💜同韓國食到嘅一樣，五花腩明明見到成大舊肥膏都唔覺得肥；護心肉好好淋好嫩~
八爪魚真係幾大隻不過都幾容易燒濃，注意。個人就略嫌八爪魚醃得太重口味，雖然唔明點解八爪魚烤起上黎都仲係咁爽口、唔老。都掛住韓國嘅八爪魚了。
🔸甕醃1++韓牛五花肉 都覺得唔錯，而且好大條！燒嘅時候都長到逼住剪開~
🔸泡菜煎餅
喺韓國食左唔少蔥餅，先醒起冇食到泡菜餅…呢個泡菜餅都煎得唔錯，唔會好厚，而且都幾香口，不過微酸，沾上附上嘅醬汁會好啲，不錯食，但大家都飽到唔多食得落了。
不論食韓燒定日式燒肉，到最後都會想食冰或者雪糕，畢竟食左咁多熱氣野。
炑八最方便就係一站式可以食埋韓冰，而且套餐都係加廿蚊，食得過。12月係食緊呢款~
🔸聖誕蛋糕冰沫（套餐加$20埋聖誕蛋糕冰沫）
呢個冰都幾誇張，以咁嘅價錢，口感豐富。除左牛奶冰，中間有雲呢拿雪糕，下面仲有舊芝士蛋糕
其實成個冰都唔錯，唔會過甜，食完燒肉有得食埋個冰真係幾加分。
不過，我個人認為裡面果舊芝士蛋糕唔掂！
整體黎講，炑八雖然係連鎖野，但質素真係唔錯，水準都幾穩定，服務亦都唔錯，店員都keep住留意，洗唔洗添小菜、芝士果啲~
食得好滿足！
-
炑八韓烤 MeokBang Korean BBQ & BAR
地址：灣仔堅拿道西10號冠景樓1樓
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
