「嘩！變種病毒呀！好得人驚呀！好似話染病條友忽然失憶，扮忘記咗去邊度聚會，搞到大家雞毛鴨血呀！」
『家下個問題係失憶咩？定係家下個問題係聚會咩？你放工唔會去玩？唔會去見朋友？唔會家庭聚會？畀著佢記得晒所有行程，繼東涌、薄扶林、康怡咁，包括去過深水埗到深水灣、連埋柴灣興華村，全部送晒去隔離營呀，咁係咪代表香港就唔會再爆呀？』
「咁變種病毒好危險，為安全計早啲隔離好呀，唔係到時大爆特爆，咪仲得人驚？」
『你搵冇病毒、又冇中招嘅人去隔離，有咩用呀？好似康怡N2座，用咗38個鐘，驗咗460人，全部都係陰性，咁你捉晒呢460人去強制隔離，有乜嘢用？』
「咁驚佢哋中晒呀嘛，咪捉晒佢哋去隔離營囉，為安全計做多兩步，又有問題？」
『梗係有問題啦，家下係你要搵病患者嘅密切接觸者呀，而唔係漁翁撒網，求其捉人填數呀，本身又唔係劏房環境惡劣，又唔係大廈內有散播嘅跡象，你叫晒人撤離做乜嘢？傻的嗎？』
「咁驚本身大廈已經有病毒污染，咪要撤離囉，留低會有風險呀」
『用成38個鐘先完成撤離，如果大廈有病毒，你覺得呢38個鐘病毒會放假？就唔會感染人？有，就已經全部中晒招啦；如果冇，咁你繼續留落去都唔會有問題，咁你撤離做乜嘢？』
「咁撤離都要時間做，冇辦法第一時間安排，都冇辦法嘛！咁多座大廈，邊做得晒呀？」
『係呢，就係明知你冇人手做，亦冇能力做，所以先叫你咪亂做；就好似咩「全民檢測」，或者叫晒全香港外傭都去檢測，個問題就係完全嘅失敗──你冇針對住源頭落手呀！你一早搵到當事人朋友，隔離晒佢哋朋友，就使乜全香港搞咁多大龍鳳？又叫晒全港外傭去檢測，又捉人去隔離先？』
「咁當事人「失憶」，唔肯講出來，都冇辦法迫佢嘛！」
『你而家驗晒佢哋陰性，又做咩要隔離人先？』
「咁驚佢哋驗唔到，驚假陰性呀嘛，咪都係隔離隱陣啲囉！」
『個病毒點解會走入社區呀？咪因為華大基因驗極都驗唔到，咪隔離完人21日，再放佢入社區囉；個問題就係點解佢有毒，都驗唔到？特別係都潛伏成21日，理論上有毒冇毒，都應該病發啦已經，咁點解仲可以驗唔出，再畀佢走入社區？』
「華大基因嗰個咩胡定旭出來講呀，話世界上冇實驗室一定唔會污染，即係全世界嘅實驗室都可能有污染呀，包容下啦！」
『咁你政府唔係應該集中資源，對入境旅客以及高危人士，一驗再驗，驗多兩次，你搵冇染病嘅人驗來做乜？你搵一個高危人士驗十次，好過搵一百個冇病嘅人來驗呀？你自己都唔信自己抽驗，咁迫人驗來做乜？』
『捉晒全香港班高官入去隔離營21日，等佢哋自己感受下隔離係點樣生活；同埋冇咗呢班友亂咁點，聽下班醫學專家做嘢，先唔會不斷畀間驗極都出錯嘅公司，居然負責最前線嘅機場同檢疫酒店？冇病呀？人哋搵一線部門守最前線，特區政府就搵瘋狂出錯的老弱殘兵守前線，唔出錯就有鬼啦！檢測搵廢人做，走甩病毒入社區，多得呢個特區政府！』（節錄，全文按連結，請訂閱壹週刊）
