亞視新聞部九十年代中的「經典一幕」
【電視台眾生相】
第四十二回《我在廣播道的日子 · 拾伍》
案發日期 : 1996 年 1 月 19 日（星期五）
案發地點 : 新聞部片房
案發節目 : 午間新聞
事隔 24 年，憑住差唔多四份一世紀之前嘅記憶，不妨重組一下震撼全城 “六秒裸女事件” 嘅案情，黃朝、馬漢、張龍、趙虎，升堂 ～ 威武 ～ 威武 ……
【06:00 am - 10:30 am】
暴風雨來臨前夕，通常係出奇咁平靜嘅，嗰朝大家如常開工，晨早新聞完咗就照舊拉隊去港台歎早餐，同事之間有講有笑，亦冇任何唔愉快嘅事情發生；食完個靚早餐十點鬆啲返到公司，大家就各適其適，爆石嘅爆石，瞓覺嘅瞓覺，睇報紙嘅睇報紙，煲煙嘅煲煙 …… ，由於片房老細楊眼之前嗰個禮拜已經告別 ATV，返咗去 TVB，新阿頭（升咗本來做阿二嗰個）通常未有咁早蒲頭（佢返十一點收八點，午間同六點新聞兩個主要時段都會喺度睇場），所以片房十一點前仲係三不管地帶，可以自由活動 !
【10:30 am - 11:30 am】
我當然冇班前輩咁清閒，返到去就開始做下半場工作，通常食早餐前開餅 90 分鐘帶錄 CNN（美國有線電視新聞）、Reuters（路透社）、BBC（英國廣播公司）啲外國新聞，出去嗰時撳制行機，食完返嚟換帶時間啱啱好，搞掂之後就揾間剪接房閂埋度門，靜靜哋幫 News Library（新聞資料室）整理番尋日出街新聞片存檔 !
【11:30 am - 12:30 pm】
完成晒手頭上嘅工作，打開度門望吓個鐘，已經差唔多十一點半，見到新阿頭同返中更班剪片已經楝晒喺度吹水等嘢做，記者同編輯陸續入嚟錄 VO（旁白）同睇片，片房好似街市咁好鬼熱鬧，大家各有各忙，我都接咗兩隻故仔嚟剪，冇乜難度好順利，十二點二左右已經搞掂，再望吓其他人個個仲搏殺緊，同平時開波前冇乜分别 !
【12:30 pm - 13:00 pm】
午間新聞準時十二點半出街，一切運作都好正常，我都諗住執定嘢等收工趕返學，當日張 “菜單”（Rundown 行內術語）總共 15 條新聞，點知播到第 10 條 “德國大火”，內容講述德國一幢外國移民聚居嘅大厦，涉嫌畀人縱火，造成至少十個人死亡，畫面本來火燭嘅場面，忽然出現兩個上身赤祼金髮嘅沙灘女郎，佢哋仲笑笑口講緊嘢，片段一秒、兩秒、三秒 …… 足足維持咗六秒，之後畫面斷 Track，明顯係用 Assemble 鋤斷咗（行內人會明我講乜），之後畫面變番 “德國大火” 單新聞，連經驗老到嘅主播盧瑞盛都 O 咗嘴，個樣呆過馬國明，唔知畀咩反應 !
六秒對電視製作嚟講係非常漫長，點解導演唔當機立斷 Take 番入廠先 ? 由得佢繼續播足六秒 ? 萬一段片成分鐘點算 ? 嗰一刻在場無論老江湖或者新人，全世界都呆咗喺度，有啲女記者甚至尖叫咗兩聲，今次嘅震撼程度真係同核爆冇乜分別，我腦入面立即諗起發哥有句對白「 呢鑊屙拔甩喇 」，究竟有咩濕滯嘢跟尾 ? 最後又點收科呢 ?
To Be Continue ……
#電視台眾生相 #我在廣播道的日子 #六秒裸女事件 #ATV
虎三同午間菜單 在 虎三同韓食燒肉餐酒Hu3 Korean Cuisine - Facebook 的推薦與評價
（包廂最多容納15人，提供12人份套餐，當天提供單點品項。） - 【6到8人跨虎年方案】 ➀ 百萬夜景煙火第一排$2.5萬➁ 璀璨星空震撼搖滾區 ... ... <看更多>