【剪傷指甲感染痛歸心 點剪指甲先正確？】
剪指甲本為保障個人衞生，但若唔小心剪傷咗，十指痛歸心，慘豬豬囉！台灣有藝人因為剪指甲唔小心造成小傷口，一時輕視，結果受感染，出現蜂窩性組織炎，手指頭腫成兩倍大，最後要去醫院治理。因剪指甲而變成蜂窩性組織炎時有發生，如沒有適當處理，嚴重可能要切指。剪指甲大家由細剪到大，但點樣正確地剪，你又知道嗎？
1 選用適合指甲剪
市面有售嘅指甲剪有不同款式，有大有小，無話邊款最好，最重要啱個人需要。 「手握感」可以係考慮因素之一，因為拎上手順手，剪指甲時更得心應手。物料方面，一般剪甲剪都以不鏽鋼作材料，選購時要留意剪口係咪鋒利，若果剪刀口有崩口不齊，唔好買。另外，如剪刀口生鏽，都唔好要，萬一唔小心剪傷手指指甲，有機會增加感染。美國有專家指出，因腳趾指甲比手指指甲厚，建議使用腳趾專用嘅指甲剪，而且手指、腳趾分開用唔同嘅剪刀，能預防手腳上嘅細菌、黴菌互相傳染。
2 指甲唔好剪太入
剪指甲有人鍾意剪到好短，貼晒肉，覺得咁先叫整齊，又唔怕指甲邊藏污物。但剪得太短都唔好，指甲嘅作用係保護末節指腹避免受損傷，維護其穩定性，並增強觸覺嘅敏感性。如果剪得太入，甚至露出甲床，易受感染。
3 指甲宜剪平
剪指甲時，多數人會順住指甲嘅形狀修剪成圓弧型。不過，原來最好先剪到平，然後指甲兩邊用指甲剪略修去尖銳位，再用銼刀磨平滑。磨指甲時，要從指甲左右兩側向內磨，再從甲蓋上方尖端向下磨。記住要順住同一個方向，盡量唔好來回磨。咁樣修剪指甲，指甲又靚又平滑，唔會岩巉起角，刮手袋刮衫。
4 最好沖涼後剪
指甲經過浸泡溫熱水會軟化，呢個時候修剪最好，唔怕指甲太硬剪唔到。
=====================⠀⠀⠀⠀
【每日送上優質生活Tips】http://www.likemagazine.com.hk/
【Follow IG】http://instagr.am/likemagazinehk
