講兩句《CALL ME BY YOUR NAME》
「男男關係的情慾探索」
（含劇透，慎讀）
—
—
—
—
—
—
呢套戲係好難去講嘅一套戲，只能意會頗難言傳，好似一首詩，隨性嘅包裝下有餘韻，一個眼神望吓胸毛，連食幾隻蛋，睇吓打排球，借鋼琴互相調侃，游山玩水，短褲仔踩單車，飲嘢食煙玩啤牌。突然之間，兩個人就鍚了，一個一個零碎嘅片段譜出盛夏嘅戀愛，兩人嘅思潮騷動，就好似趕極都趕唔走，老是常出現嘅蒼蠅一樣，如影隨形。
—
如果真係要去講，我想由呢幕自慰戲去講成套電影，與其話《CALL ME BY YOUR NAME》係一套同志電影，我覺得將其稱為「探討男性情慾」嘅作品更為恰當。寂寞躁動嘅十七歲，艾利奧係典型嘅文青，鍾意睇書，熱愛音樂，自覺與別不同，奧利華問艾利奧係咪乜都識，艾利奧話唔係，最重要嘅嘢，佢偏偏唔識，因為佢認識嘅東西，都係喺書本之上。
—
奧利華健碩雄壯，放任不羈，同時具有極強嘅社交能力，一幕與艾利奧爸爸有關語言學嘅對手戲，顯露其學識淵博，社會經驗、外表、人脈、性格，呢啲嘢通通都成為對艾利奧致命嘅吸引力，喺80年代意大利嘅某個地方，兩個人相遇。
—
我唔會話呢個係一個典型男同志電影嘅情節，因為電影除咗兩位男性之外，亦有女性角色，佢哋同男主角們有情慾戲份，而奧利華亦喺電影嘅最後同一個女子訂咗婚。女性喺套戲入面並唔係蒙騙男同性戀關係嘅工具，而係有自己獨立嘅地位。
—
而我對兩個男主角戲入面嘅睇法係「情慾探索」，除咗生殖繁衍之後，點解男一定要鍾意女，而女又一定要鍾意男？艾利奧初進成人世界，對情慾嘅一切都充滿好奇，戲入面佢嘅女朋友瑪詩雅就係佢試煉嘅對象，可能佢發現咗自己有早洩嘅問題，唔理係對住女仔，定係對住個桃，但早洩問題又可唔可以透過性取向而作迴避呢？如果佢做同性性交入面嘅「零」，咁佢就唔需要對早洩問題再有焦慮；另一邊廂奧利華溝死女無命賠，但人到成熟嘅時候，又可唔可以繼續探尋自己嘅愛慾呢？
—
睇戲嘅時候我將呢個話題愈諗愈遠，我相信唔少人都會經歷過對於自己性取向嘅懷疑，甚至呢家都仲抱持緊一個開放嘅態度。但於我而言，鍾意同性，其實比鍾意異性會更加MAKE SENSE。好多人成日話男人同女人係嚟自唔同嘅星球，永遠都溝通唔到，但咁樣點解唔可以搵番一個同你溝通到嘅人喺埋一齊？同一個性別，你哋會有類似嘅成長經歷，同聲同氣，更容易有共鳴同互相理解，更容易相愛，唔係好合理咩？
—
艾利奧用桃自慰一幕就係神來之筆，話說佢想抄"AMERICAN PIE"，挖開咗個桃然後當飛機杯咁用，爽完之後就涼都唔沖呼嚕大睡，直到奧利華番咗屋企，情難自禁幫佢口交，發現艾利奧嘅私處有桃味，然後奧利華無討厭不特止，仲想食埋個桃，搞到十七歲嘅靚仔鬼死咁老尷。
—
你試諗一吓，如果奧利華係個女仔，發現自己男朋友咁樣打飛機然後瞓覺，仲唔會鬼殺咁嘈大叫變態？因為大家都係男性，理解彼此有自慰嘅需要，奧利華想食埋個桃簡直就係天下間最恩愛嘅表現，亦都係同性愛中極傳神嘅表達。
—
人一世，物一世，乜都試吓，係我睇完套戲中理解主角們嘅感受，兩個人未必係單純嘅同志，只係兩個喺唔同時間點入面對同性愛蠢蠢欲試嘅勇者，可能當艾利奧食番肥啲解決早洩嘅問題，又會認真同番女人拍拖，不過係男係女又有咩所謂，只要你鍾意果個人咪得囉，唔係咩？
—
利申：非GAY
