《埃及狄露》
狄露，全部都係狄露，剎出一條滴路！
首先好感恩有好多朋友仔擔心我哋喺意大利嘅安危，之但係其實我哋仲喺埃及。但老老實實埃及真係得67單嗎？😖
意大利有過萬二宗個案，係好得人驚。咁不如我反問：「你寧願知道有幾多人中招，邊度係疫區避開唔好去？定還是不測不報唔俾人提，隨時你身邊嗰個係隱形傳播者，你會覺得安全啲？」
紙係包唔住火，大家睇新聞，都知道琴日有一團8人旅行團連埋導遊喺二月底去過埃及後，返香港後全部確診！而喺埃及宣布尼羅河嗰隻遊輪上嘅55個確診個案之前，其實我哋on and off都收到路邊社消息，話某某醫院收咗幾多幾多疑似個案，(其實有幫病人做測試，但測完唔會有下文)。過咗幾日病人香咗就同家屬講係因為其他奇難雜症或併發症搞到斷氣。要知道喺呢一片土地，國家準許報導嘅新聞比起坊間傳來嘅消息......你懂的。
我哋寄居喺酒店，而酒店同機場一樣，日日有九萬人chic cher咁轉。我哋已經唔敢再同任何人一齊搭𨋢，每日返到地盤寫字樓捽捽捽，返到酒店又擦擦擦。
我依家見到狄露簡直雙眼發光！買哂狄露搓手液、狄露濕紙巾、狄露消毒劑同噴霧。咁大個女除咗飛甩雞毛外，從來未試過對一個品牌咁著迷！每隔幾日叫司機兜我去超市，即使我有貨，但喺超市望住啲狄露，唔知點解好治癒，可以釋放心中憂慮。
其實我同意佬每日都好忐忑，究竟返意大利安全啲？定還是留喺埃及穩陣啲？埃及沙漠冇菊花賣，真係好有衝動每日買一支返去meet花瓣...意大利...埃及...香港⋯意大利...埃及...香港⋯天呀～有冇人可以幫我哋答到呢個問題？😣
#不能說的meemee
#若要人不知
#除非冇K屎
#滴路的誘惑
#武肺的抉擇
#意大利定埃及定香港
#出走埃及記2
#意佬都忍唔住掃咗一堆濕紙巾同朱古力落個籃度
#話朱古力有助減壓對抗疫情喎
#為食都咁多嗲
