【法治、政治與穩定】
幾十年前的事，幾年前的情
今日有人覺得好哀傷，亦有人開心過戰後重光咁熱烈咁慶祝。到底悲哀在咩，高興响邊度呢？其實只要抽離一啲睇清楚香港社會嗰種極端反應，正正就係最慘嘅地方。所謂穩定嘅法治社會，就係有一套大部份人認同嘅價值觀同規矩。依家香港人價值觀係點大家知，人心亦亂到，法律就攞黎靠嚇。乜靠嚇就穩定㗎？
我最憎講什麼「不喜勿插」呢句嘢，做人嘅嘢想講就講，驚就唔好出聲。影響社會安寧嘅騷動响香港的確係犯法。犯法要受懲罰，亦無嘢好可以再講。但係每件社會事件嘅發生，必定有原因，尤其是係由社會運動演變成暴力衝突。就好似當年六七暴動一樣，那管錯到盡（今日仍然有人覺得係啱到癲），又影響當時社會穩定極嚴重，一樣係有唔同嘅因先會有一個結果。問題係政府同法庭，點理解原由同如何還原社會穩定。
人人都驚個個都乖嗰啲，係低級管治，連政治都談唔上。大家响歷史上都見識過，靠法律嚴懲去營造穩定成功率有幾多。真正嘅穩定係包括人心安穩，和諧生活（唔係寫响標語嗰種）。七十年代初開始嘅港英政府「白皮豬」同「黃皮狗」，就示範咗一次。可惜今日所有人都失憶，更莫論去參考學習啦。
只係重罰一堆「搞亂社會」嘅年青人，然後任由個社會繼續互相討厭憎恨，問題根本無解決到。最後得番一班充滿悲哀同怨恨嘅人，同埋一堆慶祝打落水狗嘅無知大眾。再加埋嗰啲「關人」嘅「沉默大多數」，咁嘅社會叫穩定？呢啲社會有得進步？咪玩啦！
#渡日月穿山水
#尚在恨那誰
#誰曾無堅不摧
#摧毀的廢墟
#一早變做你美好新居
#創疤你不挖
#亦不知有過在這裡
