《泰國曼谷超鬆化必買手信腰果酥。張源香》
早兩日同事喺曼谷返嚟又帶咗我超愛吃嘅腰果酥回來😍，事隔幾個月我又可以食到佢，真正超開心！😍所以今日真係要同大家介紹下呢一隻在曼谷嘅老字號腰果酥，叫做張源香。
本身我都唔識呢間嘢，事源係我前幾個月去曼谷，我一個朋友托我去幫佢買呢隻腰果酥，又講到幾咁好食，又話一個人可以食晒成盒，我心諗有冇咁誇張，佢仲好積極咁俾埋地址同埋點樣搭過去嘅方法我，我見佢咁想食就成全佢啦。😝其實我自己都想試吓。
呢隻腰果酥一盒售價120泰銖，約港幣$30, 份量唔多大概30粒，但係每一粒都非常之鬆化，係入口即鬆即化嗰隻，用手大力啲都會整碎，每粒酥上面有半粒香脆腰果，香口得來非常之酥香，鹹鹹甜甜嗰種腰果嘅香味開口中久久不散，非常香😍而且佢嘅size細細啱啱好一口一粒，我終於明白朋友無誇張，真係會一粒接一粒欲罷不能，我嗰日先食咗之後瘋狂買咗十幾盒，自己都食咗幾盒，雖然係好邪惡嘅脂肪味道，但係真心肥都抵，食咗先減。因為我帶咗啲返嚟俾同事做手信，大家都覺得超好食😍所以有同事呢幾個月去曼谷都會問我點樣去佢哋都想買，所以我不如喺度分享下佢嘅地址，等大家去開曼谷都可以買來做手信或自肥都好😋
我當時根據朋友畀嘅交通指示都幾順利咁去到，大家有興趣就記低佢啦👇🏻： 搭BTS 去到Saphan Taksin 站，Exit 3，向 Robinson 方向走約 200米，過了Robinson 再過對面馬路，屈臣氏旁，車站走去約 8分鍾。
坐的士的話，給司機看這段泰文即可 ""เยื้องโรบินสันบางรัก ฝั่งตรงข้ามถ้ามาจากทางสีลมร้านอยู่ก่อนถึง watson 3 ห้อง" 若司機不懂去，直接打給店家，讓店員跟司機說。
佢指示都幾清楚，所以搭B T S好易嚟到搵到，如果去曼谷有興趣買嘅朋友仔都可以記低佢嘅地址同埋交通指示，佢係一間超古舊嘅店舖，地方唔大但係有好多野賣。同埋啲阿姐係識得講少少廣東話唔知點解，所以溝通得到，而且態度都好友善，可以瘋狂試食完啱先買😆我哋發覺除咗腰果酥，佢仲有好多肉鬆，我仲買咗幾包貓屎肉鬆，係一條條好似貓屎形狀嘅肉鬆條，又係勁正😋大家都可以買來試😍
