我嘅職業係：血奴（上）
「依加經濟咁差，你有冇諗過移民？」
我苦笑一聲：「我都想，但我唔係專業人士，又冇錢，邊有好地方肯畀我移民？」
舊同學阿忠做咗移民顧問，成日問人移唔移民，不過呢次佢真係問錯人啦。
點知，阿忠神秘兮兮咁講：「你有冇聽過『血城』？」
我嚇到成個彈起，血城係一個由吸血鬼建立同主導嘅國家，聽講經濟好繁榮。
阿忠繼續講：「血城呢排招募緊移民，福利優厚……」
我連忙打斷阿忠嘅說話：「大佬，有錢都要有命享，我係一個普通人，去吸血鬼嘅國家，咪俾人吸到變人乾？」
阿忠搖頭：「血城法律規定，吸血鬼唔可以直接吸人類嘅血。人類居民只要每三個月捐一次血，就履行咗居民義務，可以享受優厚嘅福利。」
「即係吸血鬼養起人類，等人類定時提供血液？咁咪即係『血奴』囉。」我有睇小說㗎，有啲吸血鬼好似養牲畜咁養起人類，人類經常被吸血，過得好淒慘。
阿忠繼續勸我：「邊係血奴啫？人人平等，只係每個居民都有義務，吸血鬼嘅義務係賺錢，交好高嘅稅額；人類嘅義務係捐血，就有得享受咁多福利。」
然後，佢介紹咗好多血城嘅福利，住屋免費，每個月仲有人類生活津貼，計起上嚟，就算唔返工都可以維持生活。
我愈聽愈心動，依加我份糧交完租食完飯，已經所剩無幾，如果我去咗血城，再搵份工，咁就可以慢慢儲錢。
我搵咗好多血城嘅資料，血城治安幾好，冇咩吸血鬼襲擊人類嘅個案，一切似乎都同阿忠講嘅一樣。
我思前想後，決定移民血城。
移民申請好簡單，唔駛咩專業資格，只要驗一次血就得。
阿忠好興奮咁同我講：「你嘅血係B級血啊，血城按照血液口感，將血液分為A至E五級，A級最優秀，不過好罕有，B級都好勁㗎啦。」
「B級咁又點啫？每三個月捐一次血，無論咩級都係咁捐㗎啦。」我冇咩反應。
「你有B級血，第日實在有需要，仲可以賣血。」
阿忠解釋，雖然政府負責提供吸血鬼日常用血，但只係維持到基本生計，如果吸血鬼想飲多啲血，或者飲啲高級血，就要自己畀錢買。
所以，血城嘅血液交易好繁榮，唔少人類都有兼職賣血，愈高級嘅血液價格愈高。
我冇太在意呢件事，始終抽血唔可以太頻繁，每三個月已經要捐一次血，再賣血嘅話，萬一傷身就唔好啦。
我躊躇滿志咁搬咗去血城，一切都冇令我失望，血城經濟好、治安好、福利好，我搬入設備完善嘅人類宿舍。
我觀察咗一輪，吸血鬼同人類平等相處，感覺上，吸血鬼冇當我哋係血奴。
只不過，吸血鬼壽命好長，無論係學習定積累財富，都比人類有優勢，所以城中有財有勢嘅人，多數都係吸血鬼。
呢啲上流社會嘅嘢，同我冇乜關係啦。
總之，我搵咗份工，人工高過以前，再減少埋食同住嘅開支，個個月都儲到錢。
下集：https://bit.ly/33MhY1i
將專頁設定為「搶先看」/ "See first"，最新故仔馬上睇！
我種咗棵食人花：https://goo.gl/u6Km5m
穿越神鵰：http://bit.do/eM9EF
#短故 #短篇 #小說 #陳美濤 #廣東話 #粵語 #tomatochan #我嘅職業係血奴
躊躇滿志粵語 在 《庖丁解牛》莊子(粵語/廣東話) *吾生也有涯，而知也无涯* *遊 ... 的推薦與評價
... <看更多>