【情人節特獻】我要睇男朋友部手機（上）
好多人都話，一段感情裡面，「信任」係好重要嘅。
但如果對方嘅表現有好多疑點，咁仲應該盲目信任佢咩？
我諗，任何一個愛對方嘅女人，都會想知道真相。
我從來都唔會偷睇另一半嘅手機，但我男朋友阿傑真係好可疑。
無論沖涼定去廁所，佢都機不離身。
佢喺我隔離用手機嗰陣，總係會打側少少，令我望唔到個Mon。
有一次，我哋用佢部手機叫外賣，我伸個頭埋去睇菜單。
呢個時候，部手機震一震，收到新訊息，第一句係：「你仲愛唔愛我？」
阿傑好慌張咁拎番部手機，好驚俾我睇到。
我委婉咁同阿傑提過，話有啲情侶會交換手機嚟睇。
佢皺晒眉：「私隱嚟㗎嘛，點解個個女人都想偷睇人哋部手機？」
「好多女人想睇你部手機咩？」我問。
阿傑話：「我前女友婷婷囉……趁我瞓著就想偷部手機嚟睇，成個賊咁。」
「咁你有咩反應？」我又問。
阿傑答：「屢勸不改，咪分手囉，信任好緊要㗎，我根本就唔係會出軌嗰啲人。」
呢段對話之後，我都嘗試唔去懷疑佢。
但有一晚，我同阿傑過夜，瞓到半夜醒咗，阿傑唔見咗。
我見廁所開咗燈、關咗門，我躡手躡腳咁行到門邊。
我聽到阿傑同人講緊電話，隱約聽到「婷婷」、「唔好咁夜打畀我」、「大把時間傾」……
第二日，我試探阿傑，問佢仲有冇同婷婷聯絡。
阿傑斬釘截鐵咁話：「冇。」
我有諗過，尋晚嗰個「婷婷」未必係佢嘅前女友，可能係另一個同名嘅女仔。
但一個男人瞞住女朋友，半夜三更同另一個女仔傾電話，點都有秘密。
我決定，我要偷睇阿傑部手機！
有一晚，阿傑同朋友出去飲酒，返到嚟好快就瞓著咗，部手機就咁擺咗喺枱面。
佢set咗密碼，我尋日有留意佢輸入密碼嘅手勢，估咗個密碼。
「密碼錯誤。」係我估錯？定阿傑日日都轉手機密碼？
我猶豫緊唔知點算，呢個時候，屏幕上彈出一條新訊息：「我哋都叫拍過拖、相愛過，你點解唔可以放過我？」
放過？我以為，就算阿傑有同婷婷聯絡，都係婷婷糾纏阿傑多啲。
所以婷婷先會問：「你仲愛唔愛我」，先會半夜打嚟騷擾阿傑。
但從呢條訊息嚟睇，唔通阿傑都有纏住婷婷？佢哋到底係咩關係？
未等我諗清楚，阿傑跌跌撞撞咁行出嚟，一手將部手機拎番入房。
阿傑死都唔認，或者，我應該直接問婷婷。
以前阿傑有畀我睇過婷婷張相，所以，我喺阿傑嘅IG追蹤者中，逐個逐個搵，冇幾耐就搵到婷婷嘅IG。
原來婷婷都算係半個IG女神，成日出Post，有幾多Fans。
奇怪嘅係，佢上一個Post係一年前。
之前佢幾乎日日出Post，但一年前，佢突然間冇再出Post，冇道別、冇刪ac，就咁突然消失。
一年前嘅最後一個Post，下面有好多留言，大家都問：「婷婷，你去咗邊？」
我仔細睇晒每一個留言，有個人留言：「阿妹，我哋全家都好掛住你。」
我嘗試聯繫嗰個人，係婷婷嘅親生阿哥，佢話婷婷一年前突然失蹤，報咗警都搵唔番。
佢好心急咁問我，係咪有婷婷嘅消息。
一年前……照阿傑所講，佢同婷婷就係一年前分手嘅。
唔知點解，我有啲心寒。
我用類似嘅方法，搵到阿傑嘅初戀女友。
呢個女仔都失咗蹤，而失蹤嘅時間，都係佢同阿傑「分手」嘅時間。
呢一刻，我懷疑嘅唔再係「阿傑出軌」，而係「嗰兩個女仔去咗邊」。
再聯想婷婷問「你點解唔可以放過我」，會唔會係阿傑禁錮咗婷婷？
但如果婷婷被禁錮，佢點會仲用到電話，可以打電話、發訊息畀阿傑？佢早就求救啦。
下集：https://bit.ly/2ZoTwQd
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我要睇男朋友部手機 #情人節
躡手躡腳粵語 在 躡粵音點讀 的推薦與評價
有邊讀邊，無邊讀中間？一直咁讀原來係讀錯? 廣東話讀音隨時考起人，一於齊齊努力，學好正音。躡/nip6/ 音「捏」詞例/意思：躡手躡腳追蹤我哋：👇👇🌟 ... ... <看更多>