來[跟MIRROR學習]請準備好自己隨時做主角
原link：https://www.patreon.com/posts/53850761
最近大家出街，真係想見唔到MIRROR既廣告都幾難，好似香港得MIRROR同ERROR一樣。其實唔經唔覺佢地都出道左快3年，由冇乜人識，到而家全香港真係好難有人唔識，當中我一路都有留意，一路睇住佢地既發展，都真係有多少體會想同大家分享，關於堅持同準備。當然我唔認識佢地任何一個，當好具體既辛酸或者內幕我係完全唔知，我想講既係我地點樣係佢地身上，學習到我地需要既心態？
Andy Warhol曾經講過，每個人一生都有15分鐘可以成名。呢句說話係網誌發達既今日講最適用不過，比起以前，而家要出名真係易得多。一班老屎忽仲不停係度講而家冇巨星，而家乜野人都可以係紅館開show，通通都已經冇意思，時代唔同，玩法都唔同。觀眾需要既野唔同左，落地左，快左，即食左。今日可能真係比已經易左成名，但今日大眾都更易遺忘你，今日競爭都比以前大，唔係咒MIRROR佢地，而係可能冇幾耐之後，大家分分鐘又可能唔記得左MIRROR。所以每一代都好努力去得到成功，實在唔應該再用舊想法去量度新一代，技巧上我地雖然跟住時代改變，但有d心態上既準備，卻係歷久常新。
－－－－－－－－－－－－－－－－－－－－－－－－
為這15分鐘做好準備
講15分鐘，唔係真係得15分鐘，而家人生總係有一d moment係機會，令自己升價十倍，或者係改變你一生既轉捩點。MIRROR而家既成功，係唔係真係因為最近做左乜野而大紅？我相信有導火線，但最重要既唔係呢樣。3年入面，佢地係唔係得最近先努力？當然唔係，咁點解係而家先紅？因為機會來了，時來運到。MIRROR捉得住呢個機會，就成功了！有2樣野係我係佢地身上見到，第一就係我經常講既「堅持」。呢樣野我近來已經愈來愈係人身上見到，可能科技進步左好多野快左，選擇多左。大家好容易覺得路仲有好多，「堅持」將自己既路走落去既人少左。MIRROR出道都有段時間。一路星途都麻麻，你估當中有冇人曾經諗過放棄？當然係有，甚至有人當初已經放棄。我無意結果論英雄，但係正如我題目所講，每個人都希望做自己人生入面既主角，做唔做到我地唔知。但係有幾多人堅持？大部份人都係見到有希望先會堅持，唔得就無謂浪費時間，但有幾多人係未有希望之前，靠一鼓傻勁，堅持到見到希望呢？所以成功既人永遠係少數。
其次，就係，大家見到而家MIRROR成員個個靚靚仔仔，走出黎好有自信，但如果大家睇返《造星1》，佢地當初都係一般人，有部份都有過騎騎呢呢既階段。除左佢地一路走來「堅持」冇放棄之外，更重要既係，大家都係見到機會之前，盡量做好準備。呢個機會未必會黎，黎到你亦未必捉得住，但就算係咁，佢地都俾心機去試，去準備好自己。呢個係心態上好好既例子，因為大部份人好怕失敗，當投入左咁多時間心機，如果唔成功，好似浪費左時間去做冇結果既事一樣，事實上並唔係咁。當然MIRROR現在空前成功，但就算冇呢先爆起，佢地都唔係完全冇得著。努力左係永遠唔會白費，今日練左既野，就算未能收成，都有機會成為下次成功既養份。3年幾以來，我相信佢地好多時都會懷疑自己既付出係唔係值得，經過多次未能收成，今日咪咩都贏返哂！
－－－－－－－－－－－－－－－－－－－－－－－－
連你自己都不覺自己特別的話誰會在意你？
其實MIRROR既例子，心態上apply到落任何野身上。有好多人對投資想法都係一樣，害怕冒險，害怕失敗，不想白白付出。冇錯，你唔落場你就唔會輸，但係你唔落場，唔投放心力做任何事，係唔係代表你冇任何風險？係唔係就代表你冇失去任何野呢？非也！你緊緊捉住左你現有既野，但你失去所有未來未知既可能性。呢個係好人性化既事，心理學上人失去時既悲傷，係大過得到果陣既快樂，所以大部份人都係保守的。所以如果你要改善自己，要得到更好，第一件事就係要敢想像未來既可能性，克服害怕失去既心理，先有機會做主角。
所以有位前輩講得冇錯，要成功當然要靠理性同計劃，但係成功既人多多少少要有d傻，乜都唔諗向前衝左先既性格先得，而更重要係，成功既人多多少少都有d自戀。呢點我好同意，個社會咁多人，點解係你？如果你自己都唔覺得自己特別，有值得跑出既地方，如果你都唔為成為同別人唔同既人，連你自己都唔相信自己係特別，又點會有人在意你？點會有人係茫茫人海入面睇得上你？所以自負既人，通常都有值得欣賞既地方，因為佢地曾經為左令自己與眾不同而努力過！每一個過人之處，都係一場努力既故事！呢個世界冇咁多天才的。
其他內容：
[多元收入]執好收入組合，怕什麼亂世變天？
https://www.patreon.com/posts/53666235
如果有效率在香港躺平(2)投機炒賣不利躺平
https://www.patreon.com/posts/5301388
躺平香港意思 在 港語學- 【細說「新語」：躺平】... - Facebook 的推薦與評價
所以香港人唔會明，亦都好難用「躺平」呢個詞，因為呢個詞就係形容喺大陸工作嘅 ... 「頹」本意就係植物瞓低個樣，都食返佢嗰個「唔易割」嘅意思。 ... <看更多>