Beer Run其實衰乜？就係衰在太破格太歡樂。
利申先：去年我有玩，仲要玩了兩次。第一次試賽冇食野去玩，wing到飛起。第二次正場我學精左，去IFC間pret隊個三文治先，效果當堂好得多。
開唔開心？終於可以不理會pacing去「比賽」，與朋友找個理由扮鬼扮馬歡聚，怎會不開心。說到底，怎樣跑，喝甚麼，都是幌子，都是其次。
香港壓力真係好大，好多本來可以輕鬆的事情，在好多香港人心目中變得好緊張好神聖。跑步就係其中之一。有人認為「跑步比賽」就只應該得一個目標：全力以赴，乸埋口面，搶先返回終點先岩。你不夠落力，已經有褻瀆比賽之嫌。甚麼「啤酒跑」，嬉皮笑臉，離經叛道，怎會不反對不痛斥？
Relax。事情是咪要咁對立，要大家起晒槓先得呢？
我自己比較怕悶，食得多沙律會想食梅菜扣肉，聽得多陳奕迅都會想聽吓Shostakovich。同樣地，跑步方面，競賽有時，fun run有時。成日做死一樣，我會覺得好悶。
強調，這是我的取向，大家可以不認同的。
王爾德（唔係王敏德）寫過對人生觀察得很通透的一句：When we are happy we are always good, but when we are good we are not always happy.
做人有時「happy」與「good」不能並存，到抉擇關頭，有人選擇「good」行先，有人以「happy」是尚。正如有人最愛時刻憂國憂民的杜甫，亦有人封日日劈酒的李白做偶像，這一切其實無分對錯，這純粹是個人價值觀問題。
你覺得跑步要全力衝先算「good」，亦有人鍾意邊跑邊飲啤酒的「happy」。如果沒違法，沒影響他人，一個成年人要吃甚麼、聽甚麼、怎樣跑，為何要承受那麼多的指指點點？
又有人指主辦單位「不負責任」，我又覺得言重了。如何對待身體，責任不是就在每個人自己身上？上環孖沙個叉蛋飯煎夠三隻蛋畀你，營養師一定話超晒標，難道我地又要鬧佢「不負責任」，要佢以後轉賣沙律？come on，咁大個人，要happy定要good，自己諗啦。
話說回頭，衛生署「做野」，我又覺得無可厚非。跑步飲啤酒的確不是完全沒有風險，站在他們立場，要「提醒」一下參賽者，防範有些沒有察覺自己身體狀況的人去冒險，也不是甚麼壞事。至少，這比在有事的時候才出來指指點點令人順眼得多。
又咁講，都多得衛生署的溫馨提示，使更多人知道了有beer run這活動。正如共產黨未鬧之前，我都唔識咩「王者榮耀」啦。
嗯，對了，騰訊今日又升幾多？
------------------------
【蝦叔博客】與君暢談馬拉松
蝦叔周報、讀跑步書、看跑步戲
https://hasuk42195.wordpress.com/
【蝦叔IG】
https://www.instagram.com/hasuk42195/
