【屍人屋苑】病毒變種、喪屍橫行，我同媽兩個相依為命……
數一數，原來今日已經係我第三個月未離開過屋企。
呢一晚好難得，我聽到大廈外面傳嚟一陣騷動，仲聽到有人喺度大叫大喊。記得對上一次發生類似嘅事好似已經係半個月前了。但到底係好事定壞事？我真係唔知……
三個月前，應該冇人預計到人類呢種物種會走向滅絕。
最初，呢場「W流感」都只係小規模爆發，冇人特別去重視。直到疫情開始失控散播到全球，感染同死亡人數急增，我哋終於識得驚──封城、鎖國、囤物資、斷來往。全人類都做好晒可以做嘅事，然後寄望疫情盡快結束，可以過返正常嘅生活。
但結果，病毒突如其來嘅變種，無情咁粉碎晒所有人嘅希望。
一切，再返唔到轉頭。
自從兩個月前，出現第一位由死人「重生」而成嘅喪屍之後。只係需要短短一個星期，就癱瘓晒所有嘅政府同城市，將我哋嘅家園變成活生生嘅地獄。到兩個月後嘅今日，雖然我唔知外地嘅情況係點。但至少喺香港，活人已經係稀有少數……
而我同埋媽媽，就係當中嘅幸運兒。我哋住喺黃埔嘅一座私人屋苑裡面，因為住得高，加上疫情初期爸爸過度緊張所以買咗唔少物資，而且鄰里間都算係守望相助，所以兩母女先可以捱到而家仲安然無恙。
但因為一個月前已經開始斷電，所以我哋都有心理準備，到斷水嘅一日來臨，呢份安穩嘅生活就會宣告結束……
「女，今晚一於開呢個嚟食囉？」呢晚，媽喺雜物房裡面搵出一罐罐頭。
「但午餐肉……妳之前唔係話要等阿爸返嚟先食咩？」我問。
「因為今日係妳嘅生日。」媽微笑住講：「妳係咪自己都唔記得？」
「喔。」
因為手機早就冇電、電視直播又冇埋、又冇機會同其他人接觸、所以確實係冇咗件事。
「而且，都已經咁多日，我哋都應該要面對現實，爸爸佢可能已經……」
「唔會嘅，」我搖搖頭，點都唔肯面對，「爸佢一定會吉人天相……」
我本身唔係一個鍾意食午餐肉嘅人。但喺災難之下，你會發現所有嘢都會變到好味百倍。特別係用火機輕輕燒炙過先食落口，嗰種感動係會令你暫時忘記所有唔好嘅事情，又會不禁讚嘆前人嘅偉大……
只係過後，你會更加覺得失落、更加懷念以前嘅一切──我好掛住自己嘅朋友、掛住一齊出去行街食飯嘅日子；好掛住每晚屋企人齊齊整整咁食飯；好掛住日本嘅美景，呢個月份明明係櫻花盛開嘅季節，但已經冇人有心情同機會去欣賞……
「媽，」晚飯食到最後嘅時候，我又忍唔住眼淺起嚟，「呢種生活到底要維持幾耐？」
「我都唔知。」媽捉住我隻手講：「但無論點都好……我一定會保護好妳，直到無事嘅一日。」
啪！啪！啪！
大門突然傳嚟幾下拍門聲，我同媽都嚇到成個人震一震。
「陳生、陳太，你哋係咪喺裡面！？」一把男聲喺門外面傳嚟。
「係王伯伯？」我認得出呢把聲。
王伯伯係退休警察，住係三樓。因為同我爸媽係同鄉，所以關係一直非常好。記得喺王太過身之前，佢哋兩個成日都會上嚟陪爸媽打牌，次次都會食埋晚飯先走。
「等我去？」媽問。
「唔好，我嚟……」我回應，然後慢慢行到門前，「係咪王伯伯？」
「妳係琪琪？琪琪……可唔可以俾我入嚟！？」王伯緊張咁講：「下面而家好大獲……嗄……我返唔到去……」
「發生咩事？」我透過大門防盜眼望過去，可以見到佢喘晒氣非常狼狽。
「有兩個男人打開咗大堂鐵閘，仲要引晒成班喪屍入嚟，我想返屋企嗰陣班喪屍已經上到四樓……」
「但係，屋企得我同……」我望咗下媽，「好似唔太方便……」
「我搵唔到其他人！妳唔幫我嘅話，我就死硬……」
「媽，點做好？」我細聲問媽。
「女，王伯一直都對我哋唔錯，之前仲幫過妳爸。而且，由得佢一直喺外面嘅話，會唔會引埋啲喪屍過嚟？」
「嗯……」猶豫咗陣，我總算作出決定，「王伯，你等我一陣。」
「好！」
我迅速咁將屋企重要嘅嘢收埋喺雜物房，然後就回頭開門。
「嗄……」王伯入完屋第一時間走到梳化坐低，「我一連跑咗幾十層樓梯……真係辛苦死我……」
「我去倒杯水俾你。」我入廚房倒水，順便再確認一次雜物房道門有閂好。
王伯一啖就飲晒成杯水，我注意到佢件衫腰間位置有少少血跡，可能係頭先擺脫喪屍嘅時候做成？
「王伯……咁你頭先有冇受到傷？」為咗保險起見，我決定問清楚。
但其實已經問遲咗，應該喺開門前就要檢查一次。可能我太少面對呢種情況，又太容易信其他人……
「當然冇！妳睇下嘞！」王伯企起身俾我用電筒檢查清楚，我見到媽特別留意佢嘅手臂。
「王伯……啲喪屍……知唔知有幾多隻？」我再問。
「好多，我喺後樓梯睇住佢哋不斷湧入嚟，至少百幾隻……」
我聽完不禁背脊一寒。
「之前其實一直都有喪屍誤闖入屋苑裡面。但因為數量唔多，所以班鄰居會夾手夾腳解決佢哋。但今次……唉……睇怕佢哋真係搞唔掂……所以低層先會淪陷……」
「但我哋呢度成廿五樓，佢哋應該上唔到嚟？」
「睇嚟妳真係留喺屋企太耐，唔知喪屍有兩種：一種係由屍體變成，行得慢，威脅唔算大。但如果係正常人被咬傷，因為肌肉未爛，所以行得好快，而且仲有少少生前嘅記憶，甚至有人話見過識得開鎖嘅喪屍……妳屋企大閘呢啲可能擋得住，但防火門就肯定阻佢哋唔到……」
「即係話，班喪屍好快就會上到嚟……」我望向媽，佢已經驚到臉青起嚟。
「睇怕係……」王伯注意到台上面嘅午餐肉罐頭，「琪琪妳啱啱食完嘢？」
我點點頭。
「啊，我都已經好耐冇食過午餐肉。老實講，真係好懷念嗰陣味……」
「因為我生日……所以先開埋呢罐嚟食。」我回應。
「哦？原來今日妳生日？」王伯伯認真打量我，「係咪已經廿二歲？」
「廿四。」
「時間真係過得快……」佢感嘆咁講：「我仲好記得妳細個嗰陣成日都會走嚟問伯伯拎糖食，而家已經婷婷玉立。可惜我個仔喺外國，又發生咁嘅事，唔係肯定介紹佢俾妳……」
呯，廚房嗰邊突然傳嚟一下碰撞聲。
「係咩聲？」王伯即刻提高警覺，同時喺腰間裡面抽出一把菜刀。
「係隔離屋個男人，自從呢件事發生之後佢就有少少問題……」我連忙解釋，然後換個話題：「係嘞，王伯你點解會離開屋企嘅？」
「唉，屋企啲米只係夠我食多幾日……」王伯喺將菜刀擺喺茶几上面，「所以被迫出去搵補給……結果就冇機會返去。」
呢一晚班喪屍未上到嚟我哋呢層。但到凌晨突然聽到下面有人嗌救命，所以都間接證明咗王伯講嘅嘢係真。喪屍已經入侵咗呢個避難所，而我哋……大概再冇機會離開呢度。
至於王伯佢，一開始的確對我哋幾唔錯。唔單止將把刀交俾我保管，仲承諾唔會隨便入廚房，食幾多飲幾多都由我安排。
因為佢住喺低層，同守住大廈嘅鄰居有保持聯絡，所以都知道唔少外面世界發生嘅事──譬如話有班年青人冒死守住一啲重要設施，所以供水系統先可以一直維持到而家；至於班所謂警察，好早期就已經脫離職守，仲恃住有武器不斷搶奪其他生還者嘅資源……
但就算初初點好，隨住時間流逝，呢段關係終歸都係出現變化。去到第三日，我注意到王伯望住我嘅眼神開始唔同咗，成日都會偷偷望我……令我覺得好唔舒服。我有諗過同阿媽講，但一直搵唔到機會……
終於，去到第四晚……我喺睡夢中聽到有人開門。到我打開眼，即刻有人用手掩住我張嘴，仲快一步拎起旁邊把菜刀。
「唔！？」我睜大雙眼，想嗌但嗌唔出聲。
「琪琪呀琪琪，妳唔係以為鎖門阻到我嘛？」王伯用刀指住我臉頰，威脅咁講：「妳唔想受傷嘅話，就乖乖地聽話……」
最壞嘅情況發生了。你問我，我當然有擔心過。但王伯伯始終係熟人，加上阿媽都喺度，所以多少覺得佢唔會咁做，但我太天真……真係太天真……
「哈哈……」王伯笑咗兩聲，繼而爬上我張床，「係囉，琪琪，照王伯伯嘅說話做，我保證妳唔會痛苦，隨時仲可以好爽添……」
佢一路講一路想除去我嘅睡褲，我理所當然咁掙扎，結果抓傷咗佢嘅手臂。
啪！換來嘅係一巴掌，呢種痛楚即刻令我淚崩起嚟。
「嗚……」
「叫咗妳聽話呀！我同妳講，樓下個八婆就係唔聽話！明明做雞又要攞貞節牌坊，呢樣唔得嗰樣唔得，結果……哈哈，而家應該變成咗喪屍嘅晚餐……」
聽完我總算搞清楚佢件衫嘅血跡係點得嚟。但唔重要，呢把掌令我意識到只有一件事應該做……
「媽……」我邊喊邊講：「……嗚……媽！」
「妳點嗌都唔會有人幫妳㗎喇！唔係諗住隔離屋個痴線佬會嚟救妳呀？」王伯嘅動作開始越嚟越粗暴，隔住件衫用力揉我嘅左胸，「呀，細佬聽話啲啦，快啲起身……」
可能見「事情」唔太順利，所以王伯將刀擺喺佢腳邊，再用手伸入自己褲襠裡面進行手部運動。我曾經試過去拎把刀，但距離實在太遠……
「……嗚……媽……」我越嚟越絕望。
然而，呢份過於真實嘅恐懼感，卻令我嘅記憶越嚟越清晰。
「死心喇。」王伯注意到我嘅企圖，即刻用力撳實我隻手。佢越靠越近。我可以感受到佢嘅鼻息同口氣，混合成一陣陣酸臭味，「嗄……就得喇，就得……」
「嗷……」
雖然淚水朦朧咗雙眼，但我依稀見到有個身影出現喺門口。因為聲音太細，俾我嘅喊聲完全蓋過，所以王伯完全注意唔到……
「……嗚……」
「得喇……哈哈……琪琪，係咪等咗好耐？妳呢個小淫娃……嘩啊啊啊啊啊啊！？」
「嘶啊！」
媽發出一聲沙啞嘅嚎叫，成個人撲向王伯將佢推埋牆邊撞出一聲悶響。王伯都未意識到發生咩事，就俾媽一口啃咬脖頸，頓時鮮血四濺，仲有唔少濺到我臉頰上面。而我就把握呢個機會甩身，成個人由床跌落地，再忍住痛楚起返身……
「啊啊啊啊啊啊！！！」王伯痛苦咁慘叫，佢用手不斷係咁搜索，希望可以搵返自己把刀。
但今次，我比佢更快將刀拎上手，然後用冷冰嘅目光望住呢一幕。
「媽……」鮮血嘅溫熱以及腥味令我越嚟越清醒，「……妳放心食。」
「啊啊啊！！！！！救命！！！！啊啊啊啊啊！！！」
可以嘅話，我唔想回憶喺呢一切。
*
半個月前，我哋屋企嘅糧食已經完全耗盡。媽唔忍心見到我餓，所以趁夜晚我瞓著嘅時候偷偷出去搵食物。結果，佢喺超市裡面奇蹟咁搵到幾罐罐頭……
但奇蹟嘅代價，係佢俾喪屍咬咗手臂一啖。
當晚，我哋兩母女攬住喊咗好耐。自從阿爸失蹤，我同媽兩個就一直相依為命。我知道冇咗媽肯定係捱唔到落去，但媽叫我要堅強……
「女……呢啲罐頭應該夠妳食多一陣，但之後……」媽虛弱咁講：「聽講……就算係屍肉……只要用火燒過……就唔會中毒……」
媽希望我喺佢變成喪屍之前殺死佢……然後……將佢作為最後嘅糧食。
但我做唔到，我冇辦法對媽落手，所以只係趁佢失去意識準備轉化嘅時候，將佢困喺雜物房裡面。然後，無視所有喺裡面發生嘅一切動靜，用媽留俾我嘅罐頭一直維持咗成個月……
然而，食得少、連日失眠、加上失去最後嘅依靠……終於令我精神崩潰，我好似感覺到媽從來都未離開過。
嗯，冇錯……
佢一直都喺我身邊，同我講緊嘢、安慰我、保護我……
所有嘢都冇變過。
直到四日前，我終於撐唔住，強烈嘅飢餓感令我記起媽「離開」前講過嘅說話。結果，我重新打開雜物房，但其實當刻我唔係為咗充飢，只係一心想求死。
但神奇地，媽雖然已經變成喪屍，但佢並冇傷害到我。
「……嗚……」
即使身體開始有腐爛跡象，瘦削咗好多，但佢仲記得我……
媽，仲記得我。
嗰一日，就喺王伯拍門之前。我用刀割咗媽手臂上面嘅一小忽肉，燒炙過再用嚟充飢。
「因為今日係妳嘅生日呀，」我彷彿聽到媽喺我旁邊講：「餓親就唔好。」
*
「嗯……餓親就唔好。」我茫然咁重複：「媽……人肉……係咪好好味？」
終於，王伯嘅喊聲結束了。佢成個人攤喺床上面，雙眼暴凸，死狀醜陋無比。
唔知咬咗幾耐，媽滿足了。佢緩緩落床，轉身用空洞灰白、徹底失去靈魂嘅雙眼望住我。臉、口、整個上身都沾滿鮮血同碎肉塊……
「……嗚……」
幾秒後，佢開始行埋嚟，舉起腐爛到漸漸見骨嘅右手，輕輕撫過我嘅臉頰。雖然凍到好似冰一樣，但我彷彿可以感受到昔日嗰種溫暖……
「嗚……嗷……」
其他人聽落毫無意義嘅嗚叫聲，喺我耳中並唔一樣……
「琪琪，好好休息，呢份肉應該夠妳食多一段時間。」媽用和藹可親嘅語氣講。
「嗯……」我抹一抹臉頰嘅淚珠，然後細聲問：「媽……呢種生活到底要維持幾耐？」
「我都唔知，但無論點都好……」
「……我一定會保護好妳，直到無事嘅一日。」
說罷，媽就從我身邊行過離開房間。
而我，重新望向王伯嘅屍體，
然後握緊刀柄，久違地笑了。
媽，我愛妳。
【屍人屋苑】母女篇（完）
熟我嘅話應該知我好少寫喪屍故。今次呢個短篇算係破例，因為係源自於我嘅一個夢。暫定應該有四篇，當然要睇反應先決定繼唔繼續！睇完鍾意嘅話，記得留個 LIKE 同埋幫手分享開去呀。
最後，下面有嘢想講！見過嘅讀者可以直接無視，當然都希望可以繼續支持。
－－－－－－－－－－－－－－－－－
【地方的無默媽資助計劃】（試行中）（非呃嬲 post）
呢個計劃其實上年年初已經構思緊，但因為遇上反修例運動，覺得唔係適合嘅時間所以就一直擱置，結果到今年就撞正武漢肺炎。嚴峻疫情下，大眾書局突然宣告結業，令我下定決心要推出呢個計劃。
其實喺香港寫作真係好難，之前喺唔同場合都提過，作者透過賣書得到嘅錢真係好少好少。呢點絕對唔係出版社同書局嘅錯。講到底，一本書賣出去，最大筆錢係落咗去地產商身上。所以喺呢個大環境下根本培養唔到作者，一係要兼顧正職結果寫得太慢漸漸被淘汰，一係就主力寫但最後慘到要靠光合作用嚟維持生計……
所以我見到好多唔願意放棄嘅作者都開始轉型，一係自己賣書寄書、一係換個平台發展、一係直程轉第二種模式創作。而我暫時都係想寫，堅持寫落去。
有時見到讀者們話想支持作者，心裡面都會忍唔住覆一句：最好嘅方法，其實就係直接資助。既然遊戲平台可以資助，拍片嘅平台可以資助，點解寫作唔得？大家都係提供娛樂，無理由有呢種差別待遇。
而家大眾書局結業，大型書局其實就得返嗰幾間，而小型書店本身都經營困難。可以預見將來作者嘅生存空間只會越嚟越細，加上疫情持續落去書展隨時可能搞唔成。可以嘅話我都唔想用到呢種方式，但現階段……只想努力掙扎求存。因為我真係鍾意寫故事，好想一直寫落去。
而呢個計劃，就係基於以上種種理由出現。
放心，資助並唔係強迫性，有困難而資助唔到係絕對了解、想幫手足先更加係應該、剩係想買書支持亦都絕對歡迎。我唔會因為冇讀者資助而罷寫，亦唔會突然有篇故要畀錢先睇到（呢個平台都做唔到呢個效果）。當然，資助得多絕對會加速寫作速度。而資助金額係隨心而定，即使係一蚊都可以，只要有心就得。
當然，我都研究緊一啲方式答謝資助得多嘅讀者──例如聖誕送下聖誕卡、間中送下小禮物、甚至研究緊用資助嘅錢去整廣播劇、桌遊嘅可能性。但因為而家只係試行階段，唔想亂咁開空頭支票，有進展一定會即刻通知大家！
暫時只提供 payme 同轉數快兩個平台，會睇情況再考慮其他資助方式。再強調一次，資助唔係強制性，一蚊可以、繼續免費睇都得。只要有心，平時肯留個 like 分享下我都已經心滿意足了。
Payme 連結：
https://payme.hsbc/echoofheart
轉數快 FPS ID：6065460
－－－－－－－－－－－－－－－－－
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
－－－－－－－－－－－－－－－－－
IG：echoofheart
鄰居 不 關 防火門 在 [問題] 請問遇到不關防火門的鄰居怎麼辦呀? - 看板HsinChuang 的推薦與評價
家住鈴木華城這
因前幾年有失火事件
自此之後住戶幾乎皆會注意防火門要關閉 且不亂堆雜物
(管委會也會要求 如有人不尊守 通常講一下就會聽了)
但後來有新搬來的鄰居
(獨居婦人一位 個性不太好 好像跟家人關係也不太好
房子是親戚租給她的 所以房子還不是她的 竟那麼囂張)
就是硬要開防火門
我們這層住戶都很討厭她 覺得她怎麼就圖自己方便不關防火門
那是管委會公告一定要關的
只要有人去關 她如果在家就馬上出來開 還拿消防器擋門
怪了消防器又是專門給牠用的嗎
經管委會勸說無效 反正那個人就是裝傻就對了
說什麼這樣才通風 噁死了誰要跟牠家通風
請問遇到這種愛裝傻只顧自己高興的住戶
要怎麼辦呢?
遇到這種人渣真是有夠煩惱的><"
--
※ 發信站: 批踢踢實業坊(ptt.cc), 來自: 49.159.16.177
※ 文章網址: https://www.ptt.cc/bbs/HsinChuang/M.1410962686.A.D40.html
... <看更多>