我被我綁架（下）
上集：http://bit.do/e2qYk
破壞容易建設難，我辛辛苦苦建立嘅名聲、搵番嚟嘅好工，俾佢毀於一旦。
Jamie亦有提起，佢喺另一個平行時空嘅事。
佢遠遠無我咁叻，亦唔鍾意努力，無學歷無好嘅工作經驗，打散工為生。
佢老公威威同佢差唔多，都係得過且過嘅人，佢哋住喺威威阿媽留落嚟嗰層樓。
我愈聽愈驚，Jamie嘅生活比我差咁多，日子耐咗，佢會唔會唔再諗辦法返去，直接取代我嘅身份？
我生存落去嘅唯一動力，係阿峰。
阿峰一向聰明能幹，佢應該會發現Jamie同我唔一樣，然後諗辦法嚟救我。
但日復一日，我愈嚟愈絕望。
無人嚟救我，Jamie繼續搞亂我嘅生活，唔通......阿峰完全無發現Jamie係假？
而且，絕望嘅唔止係我，Jamie都一日比一日黑面，佢試極都搵唔到返去嘅方法，十分焦躁。
我心諗，你返去咪又係做廢青，做咩一心要返去啫？
但我唔敢講出口，我驚我一講，佢真係唔返去，直情殺我滅口。
有一次，Jamie餵我食飯嗰陣，我突然細細聲講咗一句嘢。
「咩話？」Jamie聽唔清楚。
我再講多一次。
「我聽唔到，你大聲啲。」Jamie將頭貼向我嘴邊。
我用盡全身力氣，狠狠用我個頭撞佢個頭，一心同佢同歸於盡！
你個賤人，你憑咩破壞我嘅人生？
我知道，咁樣撞係撞唔死人，但我手腳都被綁實，我實在搵唔到更好嘅方法。
我感覺到我嘅額頭流血，我見到Jamie驚愕嘅眼神，然後我眼前一黑。
醒番嗰陣，我瞓喺一張陌生嘅床度，我即刻爬起身，觀察周圍嘅環境。
櫃頂有張婚紗相，係「我」同一個陌生男人嘅合照。
我翻遍成間屋，終於明白，呢度係Jamie同佢老公威威嘅屋企。
我同Jamie對撞，結果，我穿越咗去Jamie所在嘅平行時空？
枱面有Jamie嘅銀包、身份證，而Jamie無跟過嚟。
我其實無興趣做Jamie，我嘅學歷、工作經驗、財富，我奮鬥得來嘅一切，呢個時空嘅Jamie根本就無。
我要諗辦法返去，但在此之前，我都要有一個身份，畀我生活落去，所以我無得揀，只可以扮住Jamie先。
夜晚，威威返屋企，對我嚟講佢係陌生人，
但為咗扮Jamie，我只可以平靜咁講：「你返嚟啦。」
好彩，Jamie同我講過唔少威威嘅事，加上我喺個櫃度搵到Jamie本日記，應該都唔會穿煲。
點估得到，三日後，我一瞓醒，手腳都被綁住！又嚟？
「我老婆呢？Jamie去咗邊？」威威睥住我，眼裡充滿紅絲。
我勉強一笑：「我咪你老婆囉，你發咩神經？」
「你唔係Jamie。」威威起勢捽我塊面，好似我面上有面具咁。
佢捽到我塊面紅晒，然後好認真咁講：「或者你嘅軀殼係Jamie，但你嘅靈魂......絕對唔係，你係咪遊魂野鬼，借屍還魂？」
「點解你覺得我唔係？」我忍唔住問。
威威只係一個爛仔，無學歷無上進心，但佢只係用咗三日，就發現我唔係Jamie；
我老公阿峰高智商高學歷高能力，出名精明能幹，居然三個月都發現唔到，Jamie唔係我？
「Jamie佢......好黑心，佢去超市買嘢，大排長龍，佢會細細聲同我講，希望排前面嘅人暴斃㗎。」
威威好認真咁望住我：「你尋日買咗支旗，Jamie最憎人做善事。」
我勉強解釋：「我心血來潮先買......」
「唔止係呢樣。」威威搖頭：「總之，我感覺到你唔係Jamie。」
我真係唔想再兜落去：「係，我唔係Jamie，我無佢咁賤格，你就係鍾意啲自私黑心嘅女人。」
「唔係，我只係鍾意佢。」威威答得爽快。
我講晒所有嘢出嚟，威威恍然大悟，然後將我鬆綁。
我隨口問：「你唔驚我呃你？」
「唔會，你講嘅嘢，的確係Jamie會做嘅嘢。」
威威拍吓我膊頭：「你都想返去屬於你嘅時空，咁我哋一齊努力，希望將你同Jamie調番位，大家返回原位。」
我望住威威堅定嘅眼神，我忽然理解，點解Jamie一心要返嚟。
Jamie自私黑心，無我咁叻無我咁有錢，但喺呢個時空，佢有威威，一個三日就會發現佢唔同咗嘅威威。
我曾經以為，愛情就係要金童玉女，好似我同阿峰一樣，大家都咁叻，大家一齊上進。
但原來，有幾愛，同有幾叻有幾善良，係無必然關係。
無論係壞人定一無是處嘅人，都會有屬於佢嘅愛情。
塵埃裡的情花，可能開得最美麗。
－完－
將專頁設定為「搶先看」/ "See first"，最新故仔馬上睇！
幫恐龍做任務：https://goo.gl/Qoegsd
雪橇狗求職記：http://bit.do/eLVtN
#短故 #短篇 #小說 #陳美濤 #廣東話 #粵語 #tomatochan #我被我綁架
金童張繼聰 在 張繼聰Louis Cheung - #金童#hongkongmovies - Facebook 的推薦與評價
張繼聰 Louis Cheung · #金童 #hongkongmovies · Timeline photos · Jul 25, 2019 ·. View Full Size · Tiffany Ding and 896 others like this. ... <看更多>