［恒指要見三位數！］世界難撈！講四位數都唔夠出位！要跌到三位數！不過石鏡泉七十歲都未退休為三餐，好打有限。
OK，正經。石鏡泉講290，就梗係29000啦。正如大劉話齋，我地講三千就梗係三千萬（註）
不過既然四位數有人信有人打氣，真係遲早有人講三位數。特別係真係見四位數（Never say never，可能聽日闔球鏟呢，總有機會，六合彩都有人中），就肯定有人講三位數。因為人係鍾意聽呢啲出位吸睛嘢。傳媒又鍾意報。
傳媒總會講係讀者主導，有咁嘅讀者咪有咁嘅新聞，謝安頭話頭個B鍾意食屎你咪畀屎佢食，是真的。當然以前會有人覺得雞同蛋問題，低質新聞係自己製造需求，你整啲咁嘅嘢讀者咪咁食咪自然低品味。但我傾向相信真係讀者先係罪魁禍首。你諗下而家咩年代？傳媒agenda setting嘅能力已經低咗好多，本地嘅更加冇。好肯定就算冇主流傳媒，讀者都係鍾意睇呢啲嘩眾取寵嘢，那怕錯到九彩，因為人性本係咁。呢點我在舊文 荷蘭西門吹雪教曉我的道理（http://bit.ly/2SmPHcE）有講，分析員都一定係咁，何況其他講咗唔使負責嘅人？
更有趣嘅當然係黃國英講嘅資產恐懼症，吾友盧志威（威廉）在專欄亦有講。好有趣地而家人人都鍾意聽人講爆煲，好簡單，因為樓越嚟越少人買得起，股票亦唔似早十年甚至二三十年咁易賺錢。樓買唔起股票又唔多買，自然就置身事外，自然就眼紅人地搵到錢，自然就想爆煲以為自己有得贏
但正如我舊文多次講嘅呢句：首先，我就真係唔信四位數。二來，就當股樓大爆煲都好，先知可能都冇乜事，一早上咗岸，但啲信徒到時咪又係含撚。肯定的。
記住埃汾呢句金句：真係唔好天真望沙士股災雷曼金融風暴，歷史話你知，呢啲大跌次次都係機會 — 有錢人既機會。每次都係財富再洗牌，富者更富。
股樓爆煲富貴金融撚仆街？你望下2008，金融海嘯十年後，最後仆街嘅係乜人？咪就係覺得美金崩潰銀行崩潰乜撚都崩潰嘅人咯。
所以朋友話我係個悲觀嘅樂觀者，核心都係好友底。其實我估多數人都係，因為呢個比較合符人性，如果我地祖先日日覺得闔球鏟嘅，嗰啲基因應該絶晒種。
係呀石鏡泉十幾隻字，我可以打千幾字。好似都係講嗰啲嘢，但我次次都會用少少唔同角度或唔同文字講。所以睇埃汾啲文真係好，就算唔準都有得娛樂下。
註：當年大劉上「今日睇真啲」畀大姐明林建明訪問，講開前妻寶詠琴。佢話有人叫寶詠琴做董事，畀寫字樓佢用，然後問佢借「兩三千」，寶詠琴唔借，人地就趕佢走。呢個時侯大姐明梗係替觀眾好關心咁，十分「今日睇真啲」地，疑惑又小心地問佢：兩三千係指兩三千蚊定兩三千萬？
大劉用啲冇乜好氣但又諒解地，憐憫地，同情地用招牌嘅潮洲口音答佢：「咁喎DEE講生千就梗係生千萬啦」
