【鬼叫我唔識拍拖：旅遊特別篇（01）】未出發，先鬧交
我：「算啦，PLAN咁多做乜啫！去旅行緊係周圍explore下咁先刺激架嘛！」
她：「但你依家邊日出發邊日番都未決定喎……」
我：「呢啲小事交畀妳決定啦！」
她：「大事又話explore，小事又我決定，咁你有咩用？」
我：「我…當有突發事咪到我出場囉！」
她：「咁我寧願你大隻到成程都拎到晒所有行李喇！」
我們坐在旺角Pacific coffee的一角，「計劃」我們的Summer之旅。
但她總覺得我不認真，也不在乎，好像去不去也罷，早前為著「究竟去邊好」已經吵了幾次架，差點就衝口而出「唉，咁煩，算喇，唔好去喇！」。
但機會難得，我們也為著這次出走而努力儲錢了很久，當然不會因一時意氣而告吹，這都只是小情趣吧，好似係。
況且，我也有特別的氹女朋友技巧。
我：「嗱，睇下呢兩本旅遊書，其實我已經Mark低晒有咩啱妳去㗎喇！妳過目下！」
她：「呢度全部都係去睇花園架喎，你唔怕悶咩？」
我：「點會，去到呢度我會係專業嘅攝影師，幫妳影好多靚相！」
她：「咁呢度呢？你唔係話最怕同我行街買衫咩？」
我：「去旅行點同呢！行邊度都咁開心！」
她：「到時又話我亂洗錢……」
我：「買啦，買啦，平時你咁慳！」
她：「咁你呢？你有邊度想去㗎？」
我：「諗好晒架喇，行完街就去食嘢！附近個Market好多正嘢食！」
她：「有嘢食你就開心，睇下你個肚腩！」
我：「今次一齊做肥仔肥妹！」
行程以外，住哪裡也是另一苦惱，近市中心的hotel太貴住不起，遠一點的話，我倆是路痴，又會迷路。
她：「呢間啦，包埋早餐！」
我：「但遠啲喎，啲feedback仲話the staff are not helpful。」
她：「咁呢間呢？喺正車站隔離！」
我：「仲有早餐！又平啲，正呀喂！唉……原來full晒無房喇……」
她：「你揀錯月份呀，六月黎嘅！」
我：「係喎，都係妳最細心！」
她：「唉，旨意你就死。」
行程大約計劃好，酒店又已訂，交通又一起Check好哪裡坐火車巴士，買一日遊還是一星期任搭較抵，萬事也應該俱備，只待出發之日……？
她：「好似仲差啲嘢，諗多次！」
我：「要去銀行唱錢？」
她：「唔係！依家個價未夠低，下個禮拜唱都仲得！」
我：「爭得幾多啫！」
她；「都成百幾蚊㗎！」
我：「要帶定暖包驚妳凍？」
她：「我緊係記得，我會執架喇……」
我：「咁……」
每次旅程，她都擔當細心的角色，檢查甩漏，精打細算，而我則負責吃喝玩樂，帶她四處逛周圍蕩，玩咗至算，最緊要開心。
她：「機票呢？」
我：「依家訂，依家即刻訂！」
她：「唉……」
煩完一輪瑣碎雜項後，出發當天，我們總會拖著兩個大喼， 笨重匆忙地趕去機場，害怕遲到上不到機，「都叫咗你早啲㗎啦」，最後順利上機，坐在機艙，我們才放心笑著 ── 「終於都可以同你去玩喇！」
【更多文章】
FB: 莎比亞
IG: shakepearelove
書展出版：《鬼叫我唔識拍拖》
