每次嘈交都要和好（下）
上集：https://bit.ly/2L6iQqW
芸芸再發我脾氣，我審時度勢，覺得佢呢次嬲得唔算嚴重，我就唔用火柴，乖乖等佢嬲完再哄佢。
古語有云：「由儉入奢易，由奢入儉難。」
可能之前過咗一排清淨日子，我漸漸覺得，忍受佢嘅脾氣，係一件痛苦嘅事。
忍無可忍嘅時候，我就會用火柴。
一次又一次，隨住火柴熄滅，芸芸嘅怒火都消失得無影無蹤。
我哋嘅相處又變番甜蜜，佢會攬住我喊「BB」，但隨住火柴嘅消耗，我個心逐漸往下沉。
我開始覺得，火柴用盡嗰一日，就係我哋分手嘅一日。
但未到等到用晒火柴，我記得好清楚，嗰一日，盒裡面仲剩番三支火柴。
「我哋分手啦！」我再一次收到呢個信息，然後被block。
我知道，只要點一支火柴，芸芸就會unblock我，但我冇咁做。
我耐心等候，四日後，芸芸主動搵我：「你有冇咩要同我講？」
我知道，佢想我哄佢，一如以往。
但我嘅回覆係：「好啊。」
「？」芸芸一頭霧水。
「你話要分手，我話：『好啊。』」講出呢句說話嘅時候，我居然比我想像中更加平靜。
芸芸完全接受唔到，佢不斷問點解，仲搵番我以前同佢講嘅甜言蜜語、山盟海誓，指責我唔守承諾。
幾咁可笑，我搏命修補呢段感情，我補好佢就撕爛佢，我再補佢再撕，終於我頂唔順，唔想再修補。
佢反而問：「你點解要咁對我？」
我哋就咁分咗手，喺剩低三支火柴嘅時候。
之後有一次，我路過嗰條街，突然見番嗰間銀灰色嘅「煩惱小店」，我下意識行咗入去。
「先生，歡迎光臨『煩惱小店』，你係咪有咩煩惱啊？」同一個黑衣女人，同一個開場白。
我忽然有啲嬲：「你根本解決唔到我嘅煩惱。我之前買咗一盒火柴，你話只要點一支，我就可以同女朋友和好如初，但火柴未用晒，我哋已經分咗手。」
「先生，我間舖頭冇呢種『令情侶和好如初』嘅火柴。」黑衣女人好平靜咁答。
「你唔認？」我一眼就望到，一模一樣嘅火柴盒擺喺櫃台隔離：「咪就係呢盒囉。」
黑衣女人解釋：「我哋賣嘅係『和好火柴』，唔係『和好如初』火柴。」
「有咩分別？」我唔明。
黑衣女人意味深長咁講：「因為『和好』容易，『如初』太難。」
我呆咗。
我意識到，我一直以為，只要解決到芸芸嘅怒火，問題就會解決。
但原來，佢每一次發無謂嘅脾氣，每一次講分手，都係將感情磨蝕少少。
直到有一日，終有一方會頂唔順。
「和好」容易，「如初」太難。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #每次嘈交都要和好
