串流當道的年代，擁有實體唱片或許意味與偶像歌手有更深的連結感，剛於昨日推出全新專輯《花約》的Twins，就獲得不少粉絲支持，除有關新碟的網上留言反應熱烈外，銷售成績亦不俗。但估唔到連阿Sa都湊熱鬧，百忙之中抽空到唱片舖買碟支持自己。
阿Sa話其實背後有段故，阿Sa:「記得人生第一次出唱片，當時我在紐約拍緊電影《常在我心》，於是就由媽媽代勞買碟，點知去左好幾間碟舖都無。我地開始懷疑係咪記錯日子，定隻碟俾人hold起左唔賣呢？誓估唔到原來CD一出就賣哂，連自己想買一隻都無。」當時初出茅廬的Twins，萬料不及唱片一出即大受歡迎，所以事隔多年對那次"買碟驚魂"都記憶猶新。阿Sa又話幾乎每次出碟日都離港工作，所以今次即使只留港數小時，都要抽時間買張唱片攞意頭，希望新碟成績大賣。
至於阿嬌，原來都習慣出碟日買碟，阿嬌:「可惜噚日我唔得閒，所以想買自己碟都要靠"代購"，我意思係揾朋友幫手買。我覺得買碟除了係意頭之外，當心意送俾朋友都開心㗎。」阿嬌仲話自己亦是昨天才第一次見到實物，所以忍不住要同CD自拍一張，放上網絡平台分享喜悅。
問到推出這張全情歌專輯後，音樂方面有冇新計劃，阿嬌回應:「宜家同時忙緊新碟、電影宣傳，成日週圍去，所以未有確實做歌時間表。」阿Sa補充:「公司同我地考慮緊推出國語歌，不過主要視乎新碟口碑同銷量先有定案，所以大家要多多支持呀！」
#蔡卓妍 #鍾欣桐 #Twins #花約
#非凡娛樂 #非凡香港
