林忌：政府在多份報紙賣頭版廣告「全城起動、快打疫苗」，後面加句「點止打針咁簡單」，真係睇到呆咗──原來打針仲唔夠簡單呀？仲要更複雜呀？究竟度橋班公關大帝，諗緊乜？嫌公信力唔夠低，想再低啲？
點解政府要谷針？因為市民唔肯打；點解市民唔肯打？因為唔信你政府囉；因為政府呢年幾以來，由反對封關到海員換人，由全民檢測到旅遊氣泡，進退失據前後矛盾嘅，真係數之不盡；公信力差，唔係諗方法改善自己嘅公信力，仲用埋啲宣傳口號，以為咁樣就得？對驚打針而唔打住針嘅市民來講，仲驚唔夠呀？
至於食物及衞生局局長陳肇始，就更奇驚天地、泣鬼神，竟然話咩專家委員會開完會後，認為資訊「太多」，特別係咩「異常事件」，話大家「只睇到樹木，睇唔到森林」，咁會令大家好混亂喎！
因此局長再講多句，減少發佈資訊，並唔係要「收埋個案」，而是「話畀大家聽有意思個案」，相信公佈有「潛在關聯」嘅個案，反而會令大家「更加清楚」喎！
呢句真係一流──繼「完善選舉制度」之後又一力作，呢班所謂「專家」認為在資訊嘅年代，減少社會流通嘅資訊，就可以令大家「更清楚」！聽完呢句之後，你覺得本身擔心嘅市民，聽完會更擔心，定係「哎呀，而家我放心晒啦，政府公佈少兩句，我哋就會更有信心啦！」
四個字講晒：掩耳盜鈴──你唔畀人講，唔畀人知？人哋就會信你？你越唔畀人知，市民就越驚呀！點會唔係公佈更多資訊，反過來係減少公佈？政府究竟知唔知道市民驚緊乜嘢？
點解市民唔信政府？點解市民唔信「專家」意見？點解市民唔願去打針？由頭落尾都係政府公信問題！「狼來了」三個字，真係咁難明咩？
開誠佈公？NO
收埋資訊？YES
政府唔公佈，靠「朋友」、「朋友嘅朋友」，或者四圍傳下又傳下嘅匿名資訊，你覺得邊樣衰啲？政府愈少資訊，流言就傳得愈勁，究竟班友諗緊乜嘢？
叫人打針時，就大大聲話包底，有事就賠；然後一堆個案出來，你未查到證據，就應誠實講一句唔知，暫未有足夠證據，但係出來安撫下人心，例如盡量幫忙先，當係日行一善，幫下病人好冇？冇，只係九秒九話唔關自己事，仲有邊個唔心寒？(節錄，全文按連結，請訂閱壹週刊）
