《廉政勤政2019》第三集-「逆流」，目前來說最好的一集
今集的時空跳得很快，上集陳家樂才剛剛和女朋友分手，今集佢前女友已經結左婚仲有個兩歲女，起碼已經過了三、四年，而佢老公居然係洪永城做，鏡頭唔多又企側邊，無大頭差啲睇漏眼。這劇每集都唔同導演，風格亦明顯不同，第二集的陳家樂變得很嬉戲，仲加入其他搞笑情節，而今集佢又變成有點沉鬱，唔如意，還帶點嚴肅，性格和風格都有點唔統一，唯有當佢這幾年的老廉生涯過得唔好，捱到人都灰晒！
今集導演歐文傑，作品有《樹大招風》、《非同凡響》，還有《十年》的《方言》。以故事、劇本、導演處理到鏡頭擺位，今集都是三集中最好的，今集也沒有飛車或動作場面，純文戲為主，但整體氣氛鋪排得很好，是最有查案氣氛的一集，前兩集都是案件問題，等人良心發現去舉報，老廉好被動。有查案氣氛外，今集主線亦集中在陳家樂身上，較容易帶觀眾入戲，尤其女觀眾，因為佢好靚仔喎😅。一開始他在工作上已經不順利，回到家中又遇上原居民的賣地利益問題，與父親不和，街坊又俾說話佢聽，理想(反貪)與現實的衝突，描寫得幾好，他和鄧英敏的父子戲，幫助這角色變得更立體。胡渭康教仔一幕幾好，查案找出他是敖嘉年背後大佬一段，未算太緊張，但見到有心思。大台一班老戲骨對今集幫助亦很大。今集都有些對白可以做金句，如：「唔好咁灰，信天網恢恢。」和「人地茅你就要茅嘅咩！做人最緊要做好自己。」
今集要彈嘅係邊有咁靚仔嘅裝修佬同咁索嘅廚房妹😅，這個純屬講笑。期待最後兩集，黃智賢反轉過來對付老廉，和鄭則士演出的「許仕仁案」。
