#隱藏景點大麻村 #漆黑睇藍光蟲
黃金海岸探險一日遊 (危險角、大麻村、藍光蟲)
你可能會好奇黃金海岸可以點探撿呀袁學謙? 嘩，仲要有大麻Cookies添!?你想點呀? 嗱，我無話教大家食呀，只係分享呢個隱藏景點比大家探下險。當然，除左一家大細都會去嘅Surfers Paradise，呢三個景點都可以fit曬早午晚用盡所有時間一日玩盡黃金海岸!
PS:如果有問題可以msg我，可介紹朋友的local tour俾大家參考
Itinerary:
10:30-12:30 危險角Point Danger & Lunch
13:45-16:00 大麻村Nimbin
17:45-20:00 春溪國家公園Springbrook National Park 睇藍光蟲
起身之後當然梗係慢慢Hea食一個早餐，食完早餐之後可以襯太陽未係太毒嘅情況下享受一個休閒嘅早上，畢竟都市人好似你同我都唔會有好多時間係可以完全靜躺係沙灘上漫無目的咁聽海浪聲。
當然係呢個時候就係我部航拍機出動既時候，天氣咁好，最適合就係飛上去影延綿無盡嘅海岸線，加上臨海嘅高樓大廈，倒映出嚟嘅影子真係好宏偉。
欣賞完海岸線同玩完飛機之後，我地就開始今日嘅危險之旅，首先出發去「危險角Point Danger」，危險角位處於昆士蘭州同新南威爾斯州嘅交界處，當你面向紀念塔，左邊就係昆士蘭州(即係Gold Coast Surfers Paradise個邊)而右邊就係新南威爾斯(即係Sydney個邊)，兩個州只有一步之隔，但時差就足足有一小時，由當年航海發現此地嘅英國船長Captain Cook所命名。危險角對於航行嘅船隻就好危險，但對於陸上嘅旅客就完全無影響。睇到呢一到，你唔會覺得我呃左你入嚟睇架可?
Point Danger其實20分鐘已經可以行完，之後我就係一間燈塔對面嘅餐廳好輕鬆咁食左個午餐，之後就出發去今日嘅戲肉 – 大麻村同藍光蟲!
由危險角Point Danger出發去大麻村Nimbin約要1小時15分鐘，呢個咁隱世嘅小鎮，一路車程經過嘅都係樹林同埋樹林，基本上無見過任何其他嘅小鎮，中間仲有一段山路係完全斷曬signal上唔到網，心入面不斷咁想像呢個小鎮究竟有幾隱蔽，會唔會見到大麻交易，會唔會見到癮君子呢，懷住戰戰兢兢嘅心情我地到達左大麻村。
好平靜。真係好平靜。時間停留左係50、60年代嘅美國西部牛仔小鎮，帶點嬉皮士嘅感覺，曾經係到有一個大麻博物館，但因為大火而完全消失，有陰謀論話因為政府唔鍾意而借機燒咗佢，但同行嘅朋友亦都話曾經有好多交易係喺警署門口進行都無人理，無錯就係咁無皇管! 但今日現場所見又唔係所講咁風行，至少我係網上讀到係男仔都會比人撩買大麻，但我今日金精火眼望左好多個人打曬眼色都無人睬我，直至我地遇到個High左嘅啊叔，佢帶左我去一個似係「交易嘅空地」……
真係好似荷里活毒品交易嘅現場，三五成群嘅人你眼望我眼，我覺我自己似係走入左一個危險國度，我即刻收埋部手機，廢事比佢地覺得我偷拍。但啊叔又High唔曬喎，入去叫左個嬸嬸出嚟，佢一坐底就好似神婆上身咁:「What do you want?」我地話要Cookie，佢話有，$20AUD 3塊，雖然覺得貴但照要啦梗係，佢就叫我地搵一個人跟佢入去草叢，我就梗係無去啦，我認我無膽。同行嘅友人跟佢入完去出番嚟之後就塞左呢3塊好似燒焦咗嘅Cookies比我，我聞一聞都無味嘅，心諗其實係唔係只係普通Cookies…(你話要Cookie嘛，人地咪比Cookie你囉)，提提大家澳洲大麻係唔合法，請自重呀!
交易完畢之後，其實真係好緊張，雖然唔知自己驚咩，可能睇得太多荷里活電影，覺得自己面對完一班毒梟，其實聽朋友講係Nimbin呢度家家戶戶係後花院都有種，所以佢可能只係一個high左嘅師奶。
行完成個小鎮之後我地就出發去睇藍光蟲啦!又要搭大約1小時45分鐘車，係時候訓番陣先，剛好喺天黑時到達。
睇藍光蟲係要係完全摸黑嘅情況下先睇到，而且絕對絕對唔准用閃光燈更加唔可以用電筒照藍光蟲，因為會殺死佢地。而當日正正我地見到超級無公德心嘅幾個後生仔跨過圍欄入去開P，又食煙又播歌，真係當正自己喺Party，附近又見唔到警衛，真係睇到勁燥。
雖然有一班好無公德心嘅人喺到，但當你抬頭望見滿天星空，個一種藍係好柔和嘅藍光，靜止咗喺到而唔會不斷閃爍，就好似跑入左一條星河咁，好壯觀，所有煩惱都唔記得
藍光蟲真係好靚，提提大家要早點到，因為係我地走嘅時候就連續有3-4架大型旅遊巴係對面線駛過，因為佢地應該係食完晚飯就成車遊客車過去，所以建議大家係8點前睇完好走。
後記:
最開心係黃金海岸睇到藍光蟲，因為呢類小生物只可以係澳洲同紐西蘭欣賞到，抬頭望上去有一種漫天都係星嘅感覺。仲有大麻村，雖然大麻係澳洲都係唔合法，但去到嗰一個隱世嘅小鎮，你見到大部份人都處於High緊嘅狀態而暗暗中有一絲神秘同危險滲出嚟嘅感覺，待上一個下午迷糊一番感覺都唔錯。
#揸住飛機去澳洲
