【成日問我有乜嘢高見，下面依啲就係高見】
飯民黃絲之前一直強調，留響立法會點樣點樣重要，佢地會點樣點樣寸土必爭、拖延惡法；但一去到遞完辭職信後，立法會對呢班飯民主派及其支持者黎講，就好似一件玩厭咗嘅玩具咁，理都唔再理佢。
但其實無論你點樣厭惡垃圾會都好，佢始終都係香港最高立法機關，即係好似而家中國就算係獨裁政府，你都無可能唔關注政治局常委有啲乜嘢人事變動推緊啲乜嘢政策，而好諷刺嘅卻係，香港班泛民支持者一邊不停走去收聽各式各樣嘅國情節目，另一邊卻完全對目前嘅議會莫不關心。所以我特別響度開個立法會寸土必爭系列，黃絲成日問我有乜高見，以下呢啲就係高見。
首先，好多人成日以為立法會就係得兩大陣營，建制派同非建制派，但其實撇除政治議題，根本各自之間都有好多分裂同衝突，甚至乎建制派係會為咗自己利益，響議會抗爭方面比泛民更激更有效：例如上屆嘅「物業空置稅」同「垃圾徵費」議案，就係由建制派自己一手一腳拉落黎。
其次，過往立法會逢親抗爭，大家都會話泛民唔夠票作為放棄任何有組織抵抗嘅藉口；但現實卻係當建制派出現內部分裂時，民意就扮演一個相當重要嘅要素：由於之前我已花咗好多時間講《垃圾徵費》，今次我就轉個方向講電子加熱煙。
目前響立法會審議嘅《2019年吸煙(公眾衞生)(修訂)條例草案，其實由主席郭偉強、去到小組委員會成員邵家輝、廖長江、黃定光、謝偉俊，大多數建制派都係傾向政府將加熱煙同電子煙分開處理，唔好一刀切全禁：
有關加熱煙同電子煙點解應該規管而唔係禁止，我諗好多人都明白箇中道理：響邏輯上面，無理由對人體更有害嘅傳統香煙可以合法售賣，而較無害嘅電子加熱煙竟然會被禁；響健康上面，鼓勵傳統吸煙者轉吸電子加熱煙，唔單止對佢地自己本身減害，甚至連我地食二手煙嘅禍害都得以減輕；
仲有一點可能唔多人知嘅係，香港曾經係電子煙一個大型轉口港，每年處理電子煙產品嘅包裝同轉發市值超過100億，製造500個相關就業機會。其實電子煙轉口商一直希望政府就算禁止電子煙，至少都容許佢地繼續進行相關轉口行為，因為電子煙響外國好多地方都仲係合法商品，不過由於前景唔明朗，好多轉口業務經已被隔離澳門搶走哂。
好笑嘅係，響立法會事務委員會質詢期間，明明電子煙係一種化學品，而加熱煙係一種煙草商品，但原來班食衛局官員係連兩者嘅分別都搞唔清，只係覺得既然兩者有個「煙」字都係差唔多嘢，總之禁哂佢就啱。仲要響會議期間多次引用偏頗性嘅醫學資料，強行將「電子煙同加熱煙一定比傳統香港更有害」講成既定事實。
即係而家一個尷尬位就係，全禁電子煙一定唔係中共政府旨意，所以建制派都係傾向將呢條法案發回重新修改，但偏偏陳肇始就同林鄭一樣死要面點都唔肯讓步。呢個時候為咗香港市民嘅福祉，最佳策略當然就係利用呢種建制內部嘅分化，用民意向建制派議員施壓又好、作民意後盾又好，總之就係要令佢地挺直腰骨，堅持陳肇始一定要將《全禁電子煙》議案分開加熱煙同電子煙處理，唔係就照辦煮碗好似上一屆咁拉布拉死個議案，甚至直頭否決成個議案。
當然又會有黃絲話：「建制派鬼打鬼，關我地乜事？」，喂當初泛民議會一事無成又係你地話建制派夠哂票做乜都無用，而家建制派拉布有哂先例，剩係差你民意臨門一腳，然後你地就坐視不理；問我有乜高見，而家高見就擺哂響度。
亦唔好同我講無乜嘢可以做倒，過去一年文宣戰大家打得少？而家以共媒01為首，經已有人Group埋一堆醫學團體，不停響網上鼓吹「電子煙吸壞細路」（你規管咗咪無細路買倒囉）、「加熱煙同傳統香煙無分別」嘅歪理。最基本嘅，就係每當見倒呢堆打手Post嘅時候就立刻留言駁斥，搞番起而家勢孤力弱嘅「電子加熱煙規管立法」嘅聲勢；
更進一步，就係去果班建制派議員嘅Facebook，敦促佢地為咗香港人福祉，推翻食衛局全禁電子加熱煙嘅建議──而家唔係要佢地爭主民主人權，但食電子加熱煙嘅自由係無論乜嘢政見嘅人都應該擁有，莫以善小而不為。
電子加熱煙 在 Fw: [新聞] 加熱菸早合法何時上市？「菸防法大遊行」 的推薦與評價