［是日Startup］原意不錯，解決到問題—如果辨識度夠高的話。
TLDR：估唔估到我原本想講乜？肯定要成段由頭執過喎，如果打字快嘅（如我），自己打應該快過再要執。又，個語音辨識都唔係自己嘅，咁core competency在邊？
1. 講明先，非挑機非罵戰非抹黑。我有朋友做start up（相信大家身邊都梗有一個），我有做顧問（建議人地雪櫃買乜嘢飲都係顧問嚟嘅）（＊），但絶對唔同領域，做硬件，所以唔會有任何衝突。唔好小人之心。
2. 是咁的，今日睇報紙見到呢檔嘢（https://bityl.co/3UUq），覺得個產品幾過癮，就去試下。拿，潛在客仔（我算係）會走去試，證明宣傳成功。證明信報係有人睇嘅，雖然係廢老（我），但廢老係客仔嘛（都係我）
3. 街邊阿叔都識講，start up嘅嘢，要針對個pain point。呢個東西就針對咗某啲人嘅痛點—影片配字幕。
4. 雖則埃汾唔係成日拍片，暫時都係同HomeBlogger合作（有同事後期製作配字幕真好）。但我工作都會講talk錄片。大家都知，有字幕嘅片好好多。特別係有人話埃汾講嘢好快（聽講係），至於埃汾講嘢一舊舊呀懶音呀咬字唔準呢啲，就各有主觀睇法，唔係重點。
5. 無論如何，字幕是重要的，但亦係難搞的。雖則埃汾打中文字相當快，舊文提過，我半個鐘出咗篇聯儲局減息嘅分析文，一路打一路諗，2300字（https://fbook.cc/3FT7）—但我都唔會幫自己啲片打字幕嘅。第一原因係懶，第二原因係：我好怕聽到自己把聲—以前上電視時，如果食飯或乜見到自己嘅片（有重播有錄播嘛），我會好唔自在。我亦當然唔會睇返自己嘅片，亦好少睇返自己嘅文，歌唱比賽我都唔聽返自己唱成點的（所以冇乜進步）
6. 呢個東西，話幫你gen 字幕喎，你send 條youtube link去，佢就幫你出字幕。試玩過，15分鐘嘅片（暫時免費版上限），一分鐘唔使就出到。好喎。咁就絶對解決到好多人嘅痛點啦。
7. 可惜，出嚟個效果，就認真麻麻。你都可以去玩下（https://bityl.co/3UVg）
8. 即係好似呢段片咁，估下我原本講嘅係乜？
9. 我講嘅係：零零舍舍有一隻Google就斯人獨憔悴
10. 結果變咗：零零四四九一只Gogo豆芽私人特橋水
11. 呢個準確度，應該麻麻地吧。
12. 你可以話，扯，你講嘢中英夾雜，好難認。但呢個應該係大多數香港人講嘢嘅習慣喎。
13. 你亦可以話，埃汾你講嘢尼格度鬼食泥咁，一舊舊，咬字又唔清，又多懶音。隨你點批評，雖則本人文化口試都高分，亦都算多講talk—我想講嘅係，當我講廣東話再難辨認，但1-10，1最難認10最清楚，我點都有3-4掛？你套嘢如果我講嘢都認唔到，應該有三成人都搞唔掂喎。再講一次，我唔係粵音權威，但連我都搞唔掂，你套嘢窄啲喎。
14. 當然創辦人都有講，套嘢初步階段啫，信報試用都見到要自己再執。佢話有七成，我就覺得冇啦—等於賣二手嘢廣告，九成新即係五成，五成新即係殘到仆街。
15. 另一個問題係：對我嚟講呢，反正我打字快，你叫我仲要執一輪，我不如由頭打過！！！真的，如果唔係完全唔識嘅，抄功課係耐過自己做架！正如自己作過篇係快過譯文的！你要我對返住自己把聲，我不如一開頭自己打字幕算數，我甚至懷疑可以一路打字幕一路拍片！—不如搵次試下！如果好似城寨之類有兩三個人一齊嘅，應該得，自己由頭講到尾當然難啲啦。
16. 明喎，免費版唔好咁多要求。明白嘅，唔好用免費版囉，唔鍾意呀？quit 免費版囉，畀錢囉。得唔得？O唔OK？（＊＊）
17. 之但係收費版，er…….好似有啲貴！「唔係畀唔起，但唔抵！」「即係畀唔起」（＊＊＊）。
18. 希望冇睇錯，但，$13.5 /每影片分鐘，即係一分鐘嘅片收我13.5，咁我homeblogger啲片半粒鐘，你咪收我四舊水？
19. 即係，埃汾Patreon，一個月打12篇文起碼，一篇三四千字，一個月都係收一舊水有找咋！！！係咪有良心先！（https://bit.ly/31QmYj7）（今次個廣告夠自然啦！）。真喎，一篇文我點都打兩三粒鐘，收你一蚊美金，時薪兩三蚊港紙（＊＊＊＊），悲慘世界。
20. Premium佢話專業團隊為你修改字幕，「即係搵條友再改啦」，咁請人當然要錢。但不幸地，埃汾叔叔話你知，「其實邊個話你知售價由成本決定？」。我就覺得窄窄地啦，半個鐘片你收我400蚊嘅，我懷疑自己搵條友返打都得，仲可以即時問我。「都唔好講我去大灣區搵個營養快線哥幫我打」
21. 不過諗諗下，條友要坐定定半個鐘聽，然後再打返出嚟，可能都搞一粒鐘，咁計時薪四舊水又唔算好過份？唔知了。但我見快餐店好似五六十蚊時薪，咁打字幕，唔使演奏級唔使CFA下話。「況且你話你套嘢有七成準嘛，你執三成咋喎，唔係咩？」
22. 講返正經，如果Premium都係要人手後期執，唔係辦法，同埋會畀人覺得好似數碼驗孕棒（https://fbook.cc/3FTF），或者keyword counter扮AI咁（https://fbook.cc/3FTG）。「即係你返去搵真人去打字幕」。當你做到有客幫襯都好，但咁嘅故事，sell唔到投資者的。
23. 投資者好現實。要乜？一係好尖端嘅技術，一係自己好勁嘅算法，一係好強嘅品牌（但start up何來有品牌），一係好多人用，一係你有政府照，一係你好多錢燒可以掟死人，一係你股東好堅。否則你再巴閉好，兩嘢就畀人抄。
24. 正如訪問都有講，佢地話「相關的語音辨識系統並非團隊自行研發，而是外接第三方系統的應用程式介面（API）。」（埃汾按：唔係Google下話？）。咁其實個core competency係在人地個技術度喎，你呢度有乜value add？又AI？（原文係咁講）。識得斷句？好似窄啲喎。「一生愛錯放你的 手」點斷句？（OK，國語嚟的）
25. 總之，提高個辨識度先吧。否則我不如開個喇叭畀Google Translate，或者錄段嘢上大灣區搵營養快線哥人肉打字，應該平好多。「聽聞啲法文軟件都係去非洲搵人人工咁去做，因為非洲連乞兒都講法文」—OK，呢個係好bad taste嘅joke．但，法國啲客服同call center就真係搬去非洲的！而且唔係咩摩洛哥，太貴了。係去馬達加斯加！
26. 繼續努力吧，創業嘅嘢，唔係咁易的。但正係唔容易先會搵到錢，人人做到就唔會有extra回報啦
（＊）但，呀朋友公司寫字樓呢，之前雪樻真係買埋啲完全冇撚人飲嘅古怪嘢。我好奇研究點解，卒之發現咗。因為佢搵個秘書兼打雜去買—而個秘書為咗唔使成日托嚟托去，就特登買啲不受歡迎嘅嘢！拿，所以真係買乜嘢飲都有學問架！我是企管醫生，主要醫肚。
（＊＊）其實我第一次測試，就係拎Brian Cha段片！Kelvin Poon會變咗九分半！唔信你試下！（https://ggle.io/3QlK）。不過費事貼佢張相，陣間你地又投訴，佢又投訴。
（＊＊＊）呢個句式好似係本人原創，相當有爭議。但幾有用。例如代入「坐頭等去歐洲」
（＊＊＊＊）聰明嘅讀者睇到個謬誤啦：埃汾平均冇錯係一蚊美金篇文，其實冇添，Patreon Paypal仲要抽—但，我唔止寫畀一條友嘛！我篇文可以幾百條友睇嘛，marginal cost極低，士基拿保呀。又學到啦啦，仲唔訂？（https://bit.ly/31QmYj7）
———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張一個月已近 500人訂，仲有兩篇免費試睇：https://bit.ly/31QmYj7
——————————————————————————
［收費短片第九擊］美股科技股是否泡沫爆破？價值投資之選
課程資訊：https://homebloggerhk.com/course_detail/?code=CC009
內容:
*美股急跌點算好
*科技股係咪泡沫爆煲？
*有乜價值投資之選？
本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145
另外想買返第八擊（美國總統大選股票部署）都仲可以：https://bityl.co/3NPn
電視外接喇叭接法 在 電視(聲寶)外接喇叭接法 - Mobile01 的推薦與評價
電視 (聲寶)外接喇叭接法- 關於電視(聲寶)，外接喇叭要怎接法？電視也要設定嗎？三組線都插了，當然電源也開了，但聲音就是無法從外接喇叭出來. ... <看更多>
相關內容