【人無事先做到世界冠軍】
2020年仲有3個幾月就完，今年究竟做過啲咩特別事？除咗日戴夜戴口罩，真係答唔出其他，完全不屑一顧。
2020年係雙春兼潤月，好多人plan好拉埋天窗，有朋友更一早搶定2020年2月20日靚日子，結果疫情令計劃搞砸了。唔驚，相信政府！Plan B改到6月，遇上限聚令，再改到9月，疫情仲未完，把鬼火改到下年。拖足一年，真係隨時滿月酒都可以一齊擺，婚禮最後如何？等我下年再分解。
疫情再勁，可以盡力預防，但係意外，真係點都避不了。
年頭Kobe Bryant，一位籃球界傳奇，雖然我不好籃球，聽到消息仍然大感可惜。年尾到小鬼，真係晴天霹靂，有痛入心感覺。自己睇《娛百》大，同小鬼年紀又差唔多，好似朋友毫無徵兆離開一樣。過去一星期，睇到好多人大讚小鬼無架子有禮貌，好似大哥哥咁照顧後輩，好似朋友咁對待歌迷，越睇越覺得婉惜。36歲正值壯年，有運動又有戒口，敵不過無情死神。七十億分之一機率，為何偏偏揀中大好人？上天呢個玩笑玩很大了吧。
2020年帶走好多笑容，帶來好多眼淚，或者你同我都忘了怎麼快樂。依依不捨捨不得，最捨得就係2020年快啲過去。老套一句，再大目標要追求、再遠地方要暢遊，前提都要身體健康。食健康啲，作息正常啲，保持心情舒暢比好多事都重要。所以就算我不要長生不老，都要為身邊親人朋友，好好保重身子，人無事先做到世界冠軍，總冠軍。
最後，希望喺平行時空下，苦苦的變得甜甜的，所有人都能夠快樂生活。
