【第一次喺香港睇完日落摸黑落山，兼且差啲蕩失路】
我唔係淆疫情唔出街嘅人，但喺一條超多人、熱門到人頭湧湧嘅行山徑，多人到一個地步個個除曬口罩，我真係唔多想行落去。呢個時候，竟然俾我搵到條支路，沿住水渠爬到冇人嘅山坡邊，坐足成個下午都冇人。或者，呢個係我旅行多年訓練到嘅直覺，行條唔係official嘅路，真係會搵到個靚景。睇住由天朗氣清到日落再直落夜景，都見唔到一個人，原來喺市中心，都可以搵到個咁嘅地方。
呢個係青衣後山嚟，仲有個位冇人攻陷。
呢啲嘢，去旅行會成日做，喺香港我從來未試過，呢個月不斷周圍咁重拾旅行感覺、搵返生存嘅意義，好舒服好正。
終極考驗都係一如外國咁，荒山野嶺日落埋，睇完夜景點走呢？我仲要爬咗條唔係正統嘅路落去，好在記得嚟果時係要過鐵絲網，回程漆黑一片，點解行咗咁耐？先發現唔記得要爬過鐵絲網，開住電筒都miss咗，旅行蕩失路嘅一刻恐懼都返返嚟，只係你唔會驚miss咗最後一班車。返返正路再行多大半個鐘，喺市中心入面，可以漆黑一片，抬頭會睇到星－－癡線，真係青衣市中心會睇到星，我今年好似冇睇過星。
月光引路，熜埋手機盞燈，竟然坐喺度曬咗陣月光。旅行成日一個人摸黑行山，香港係第一次，原來有啲嘢香港做，都好舒服。
當身邊一個又一個人係咁走，而我開始都覺得不如出去闖吓時，以我性格可能會突然無啦啦走咗去，who knows？我喺度諗，如果真係有一日要永別呢個地方，竟然連呢個所謂成長地方嘅景點、隱世秘景都冇去過，好似又有啲過唔去。
趁呢個你每一日已諗唔到有咩好做時候，四周圍亂咁行下，一來做返個小小遊客解悶，二來都留返個紀錄啦。
去完一度，不如去多個。我習慣一嘢就完成一個地方嘅，好似之前長洲南丫島，我試過連續一星期去三次，去完了咗個心願。行完輕鬆嘅郊遊徑，不如挑戰青衣另一條三支香。以為青衣入面難極有限，點知當我行咗一大半都唔覺得有乜咁難時，開始發現一件事：我反咗方向。
有啲路，一定要向上行，向下行你就仆街了，行開山你會明我講乜，一如呢段。
本身我係打算南峰附近睇完日落再影埋夜景－－前一日去影青馬咁正，但開始天黑，有少少危，咪住先，果條唔係路嚟喎，講到明「一落冇回頭」、前面明顯係直落好斜喎。睇等高線未至於去到直落，但重點係冇路要搵路果隻，睇埋夜景肯定瀨嘢，直覺話我知，不如走先？
好彩決定走先。有去過三支香你都知，果條路要喺樹林入面行，行行吓仲要冇路果隻，相信朝早落山都唔係易，仲要得有限光線落，即使有絲帶都唔係咁易睇到。
雖然地圖勉強有條線，但太多分叉路、中段甚至有堆亂石係冇路，連地圖都唔係好Locate到你啱唔啱位，但路同崖，都係一步之隔。成件事好諷刺，明明下面車水馬龍，你一個人喺山頭上面，唔係話跟住光行就得，行錯一個位，堅係冇路，真係會仆落山。喺亂石果堆位，漆黑一片要照返條路出嚟，頭都大埋，有一刻諗，不如返轉頭行返有路地方？
憑直覺、信自己，好耐冇試過咁樣同自己對話，以前每次行山蕩失路，都係同自己講，第樣嘢唔好信自己、行山直覺要信自己，咁多次都成功。如是者，我向住一個方向爬落亂石，終於去返一個我睇文見過嘅小平台，當時已經係熄燈伸手不見五指。
呢啲嘢，去旅行成日都話發生：做錯一個決定影響所有行程，足以連鎖效應影響一切，估唔到喺香港都會發生！
行行吓條路開始明顯，只係條路超窄要行得好小心－－就算天光，如果同時有人一來一回遇到，要讓路都有少少難。辛辛苦苦終於見到有石屎路，果種感動，堅係香港第一次。
其實臨走經過高速公路天橋底，堅恐怖，但對比呢段要沿繩落嘅路、冇路要爬亂石嘅，已經唔算得咩了。
以前去旅行，隔日就有次奇怪意外、錯誤決定嘅連番驚險事可以分享，好耐好耐冇試過寫呢啲經歷了。
估唔到，嘗試去搵返旅行嘅感覺，竟連旅行面對恐懼都搵埋。
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
青衣 後山 在 青衣三支香春花落｜城市後山夜景拍攝好去處 - YouTube 的推薦與評價
更正！5:07 的鐵絲網後面有一條小路，會容易一點！ 青衣 三支香為 青衣 的一座山脈，有三個山峰所以被稱為三支香山，這條三支香路線本身都是容易的石級， ... ... <看更多>