練成絕世武功後（上）
八歲嗰年，我同屋企人一齊去旅行。
我同孖生細佬都好貪玩，行到山上，我哋商量要嚇大人一跳，就偷偷行遠咗，結果就盪失路。
我哋行咗好耐，個天愈嚟愈黑，個肚愈嚟愈餓。
正當我以為自己會餓死，細佬突然指住前面：「有光！」
我哋向住發光嘅地方跑過去，跑吓跑吓就暈咗。
醒番嗰陣，我瞓喺暖洋洋嘅被窩，眼前有一個白鬍子老伯伯。
伯伯對我哋好溫柔，餵我哋食嘢，仲問我哋點樣行入嚟。
我老實講晒，然後問伯伯，可唔可以送我哋返屋企。
伯伯好為難咁講：「呢度係桃花源，出入口每十年先開一次，依加已經關咗。」
十年？我聽到呢個可怕嘅數字，幾乎以為伯伯就係傳說中嘅「拐子佬」。
我拉住細佬，跑出屋外，但見到出面就好似古裝片一樣，人人都著古裝，仲有牛、有人耕緊田。
我唔敢相信自己嘅眼睛，我哋拚命往外跑，無人攔住我哋，但我哋跑吓跑吓就撞到牆。
成個村莊，好似被一個透明嘅罩所罩住。
細佬嚎啕大哭：「我哋係咪走唔到啦？以後都見唔到爸爸媽媽啦？」
伯伯出現，摸吓細佬個頭：「乖啦，十年後，你哋就可以出去。」
「十年係幾耐？我先八歲。」細佬繼續喊。
伯伯不斷安慰細佬，細佬依然喊緊，伯伯手忙腳亂，突然話：「唔好喊，我教你哋絕世武功！」
伯伯唔知從邊度拎出一把劍，耍咗一套劍法，睇落好鬼勁，比電視上嘅更好睇。
細佬睇到呆咗，即刻唔喊，纏住伯伯要學武功。
流落野外，遇上世外高人，學習絕世武功，咪同電視劇嘅劇情一模一樣？唔通我哋就係男主角？
從此，我哋就喺桃花源住落嚟，村裡嘅人都對我哋好好。
我漸漸知道，呢條村嘅祖先係幾百年前嘅人，為避難嚟咗呢度，並建立結界。
每十年結界先會鬆動一次，令外人有機會進出。
所以，村民極少接觸外人，亦無咩現代科技，就維持住古人嘅生活。
我哋跟伯伯學武功，日日苦練，漸漸都有啲成績。
除此之外，我哋每日飲桃花源嘅靈泉。
伯伯話，飲靈泉唔止可以強身健體，仲可以增進學習能力，頭腦靈活……
細佬問：「即係會點㗎？」
「即係你哋出到去之後，無論武功定智謀，都會遠遠超越凡人，鶴立雞群。」伯伯好驕傲咁講。
十年時間好快過去，有一日，伯伯話，我哋可以出去啦。
我問：「伯伯，你唔同我哋一齊走？」
伯伯搖搖頭：「祖宗遺訓，後代子孫唔可以離開呢度，你哋走啦。」
「但我好驚，出面係點㗎？會唔會有壞人㗎？」細佬一臉忐忑。
伯伯語氣堅定：「以你哋嘅武功，天下間無嘢難倒你哋。你哋一定可以創一番事業，封侯拜相！」
憑住苦練十年嘅絕世武功，我哋會封侯拜相！
抱住呢個諗法，我哋離開咗桃花源，第一件事當然係想搵番父母。
但路上，我哋路見不平，拔刀相助，同當地嘅黑幫發生衝突，中咗幾槍。
中槍唔係重點，畢竟可以慢慢用內力逼出子彈。
重點係，我哋狼狽地逃出嚟，先赫然發現，苦練十年嘅絕世武功，根本打唔過槍械。
我仔細思索我嘅失誤：「如果我嘅身法再快啲，可以閃過嗰顆子彈；我嘅內力再高強啲，或者可以令子彈射唔入……」
「阿哥，無用㗎。」細佬拎住一部手機，應該係混亂中某個黑社會跌嘅。
細佬用手機播咗幾條片，全部都係現代嘅武器片。
「就算你擋到子彈，唔通你擋到飛彈？」
細佬嘆氣：「喺呢啲高科技武器面前，武功根本無用。」
下集：https://bit.ly/3azc1EQ
將專頁設定為「搶先看」/ "See first"，最新故仔馬上睇！
我租咗層樓畀個殺人犯：https://goo.gl/D8jl6e
愈愛愈肥：http://bit.do/eRypz
#短故 #短篇 #小說 #陳美濤 #廣東話 #粵語 #tomatochan #練成絕世武功後
