今日發生件好嬲嘅事。我去剪頭髮，指住張圖話想剪「層次」、染髮、焗油。
剪咗一陣，發覺好唔對路，因為啲頭髮打結時，個髮型師用把梳由頭頂直扯落髮尾，好痛，而且髮尾仲剪到翹哂出嚟。於是我就問佢：「點解會咁翹？」佢話「未吹丫嘛」。但我根本唔會日日吹頭，咁唔吹咪好肉酸？於是我同佢表明，佢就話：「唔使吹嘅，揚兩揚就唔會翹。」「點揚？」「隨便揚兩揚。」「用咩揚？」「搵風筒揚兩揚。」「我都話唔會日日吹頭咯。」「我都未剪完！」「我真係唔想翹，亦唔會日日吹頭。」「都話未剪完咯！」
真心唔對路之下，我同佢講：「我都係唔染喇，你齋剪同埋焗油啦！」因為我怕佢咁嘅手勢，會染斷我啲頭髮。點知佢就話：「吓？開咗喇喎（支染髮劑）！」我問佢，咁即係點？佢話：「開咗喇喎，要成本㗎！」我份人係咁嘅，唔會想人哋蝕畀我，所以我同佢講：「我畀返你開咗支嘢嘅錢你。」又點知佢話：「唔係咁計㗎嘛！」「咁你想點計？」佢無出聲。
跟住，佢又再剪我啲頭髮，又係一把梳由頭頂扯落髮尾，我真係好痛亦好嬲：「你唔可以咁樣㗎，我會痛㗎，我啲頭髮會斷㗎！」再點知，佢唔知係咪發脾氣，竟然拎把刷一嘢刷落我額頭，再梳落頭髮，然後又一嘢刷落我隻眼，再梳落頭髮，果啲髮刷係好尖，痛到我覺得有啲損咗，跟住佢仲要喺我耳邊講：「算啦，我唔同你做焗喇，你咁唔滿意我，我做生意無謂攪，大家成年人唔想嘈！」
終於，佢覺得自己剪完，我叫鄉里畀完剪頭髮嘅錢即刻走。返到屋企洗完頭，髮尾係多方向咁翹出嚟，完全見唔到層次，只見到好碎。
我嘅眼簾同額頭，當時已紅咗一撻一把長髮刷形狀咁嘅樣。其實我都已經話畀返支染髮劑嘅錢佢，亦都諗住唔好咁啦，照畀佢做焗油，等佢做吓生意啦，係佢自己唔要唔做，你話個客撒賴死唔畀錢就話嬲啫，依家我話畀返你喎😭做乜仲要搵把刷刷落我額頭同眼、扯我啲頭髮⋯⋯真係好激氣，點解可以有人咁樣對另一個人😭😭😭我仲要拍嘢㗎，咁肉酸點出鏡⋯⋯⋯（王小姐話介紹佢個髮型師畀我，希望救得到啦😔）
