關於 麻煩share畀你識嘅新任區議員朋友 ，我們在網路上蒐集到這些相關的討論、資訊與評價

一，區選過咗咁多日先寫，因為想沉澱下想法。

二，我有唔少朋友當選，亦有唔少朋友落選，有朋友第一次做議員，亦有朋友第一次失業。當中，有黃亦有藍。嗯，但係，近距離睇，佢哋有肥有瘦有甩頭髮有出暗瘡，總之，就係一個人；唔完美，但又未至於絕對邪惡。人，就係唔完美嘅動物；缺陷當中，總存有一點善。

三，贏咗嘅朋友，我冇特別去祝賀。反而有啲輸咗嘅，我傾咗一輪。「選舉政治就好似十二碼，一係入，一係唔入。」廢話，係咪？「輸得有風度，係任何從政嘅人，對自己嘅支持者最好嘅回應。」我呢啲朋友，有人可能會退出，亦有人會考慮捲土重來。不過，作為一個朋友，我都係勸佢哋：「服務社會，有好多途徑，參選只係其中一個。」

四，甚至乎，我覺得輸選舉嘅朋友，佢哋呢次敗選對社會嘅意義更大。「清晰，明確咁畀真正嘅當權者知道，市民唔收貨。」

五，建制大敗之後，新聞報道話北京由港澳辦成立一個危機應變辦工室，西環中聯辦會轉人。假如呢個係北京嘅回應，作為一個經常幫人處理危機嘅人，我會話：「危機應變嘅第一項任務，就係搵出真相，面對現實。」

六，可以好肯定咁講，所有危機都係因為「現實」同「理想」有完全不可以並存嘅落差；無論個人層面，社會層面，甚至國際層面，亦如是。理想唔係唔可以有，但現實永遠都會以最無情嘅方式回應。由現實去到理想，有一定嘅過程，亦需要努力。夾硬咁將「理想」當做「現實」，就係一切危機嘅始源。

七，何謂現實呢？每個人都有自己嘅理想，可以好偉大，亦可以好卑微。正正因為每個人都有自己嘅理想，所有人嘅理想加埋嘅最大公因素，就叫做社會嘅現實，亦即係叫共識。其實，社會真正嘅共識唔多，但有嘅就成為大家都接受嘅制度。

八，香港人嘅共識，同北京嘅理想，有一段距離，甚至見到距離越來越大。危機嘅出現，因為北京同藍朋友接受唔到香港嘅社會現實；諷刺係，北京同藍朋友，但反而覺得香港有人唔接受現實，太過理想化。

九，更正確啲咁講，係香港有好多人唔接受北京心目中嘅理想。

十，改變嘅出現，就係現實一步一步咁被理想同化。社會唔再進步，係因為理想向現實妥協。

十一，好耐之前都寫過一篇講「牛頓第三定律」。其實北京同香港人，各自有唔同嘅理想；甚至香港嘅藍同黃，亦都有唔同嘅理想。大家都一齊想改變現實，但方向唔同。所以，北京眼中任何運動都係港獨，係顏色革命。而黃嘅香港人眼中，北京想香港變成一國一制。

十二，現實，即係我成日講嘅最大公因素又係乜？坦白講，當前嘅思潮泛濫之下，我見到呢個最大公因素越來越狹窄。似乎「當乜事都冇發生過」， 都唔係可以收貨嘅結局。

十三，話說回頭，呢次選舉，建制派其實仍然有四成票；當然你可以話當中有好多公公婆婆，但我真係識得有人真心藍。再講，建制派得票係有增長，我亦唔信全部都係因為動員又或者種票。

十四，了解係改變嘅第一步，先入為主嘅假設，對雙方尋找共識係完全冇建設性。對贏出今次選舉嘅朋友，除咗恭喜晒，你話我唔識做人都好，我都一定要講以下嘅說話：「由你上任嘅一刻開始，你代表嘅除咗支持過你嘅選民，投過你對手嘅區民，其實都係你去代表。你真正代表嘅，係一個制度，係一個信念，係一個價值。今次輸畀你嘅對手，就係因為代表唔到社會嘅共識，你先至有呢次機會去取代佢。」

十五，選舉，只係代議政制民主嘅高潮。我經常咁去形容：「民主係愛，選舉係做愛。多數人，鍾意做愛，但唔識得去愛。正如從政嘅人，大多數都係沉迷選舉嘅激情澎湃，但去到做代議士嘅時候，就立即現形。」男人會比較明白呢個比喻，好似係。

十六，有人話，千祈唔好學何秀蘭；其實我都有聽過何秀蘭嘅事，所以唔識點評論。不過，星期日我行咗幾個區，發現今之選舉同以往最大嘅分別，在於多咗一班支平時唔係好活躍社區嘅街坊。有人話因為 TG ，但我覺得另一個 TG （Telegram） 都起到關鍵影響。

十七，其實好多人話建制派淨係識蛇齋餅糭旅行團，但實情係未出現嚴重社會撕裂之前嘅香港，社區裡面最得閒，最易接觸到嘅退休人士，就係要呢啲。老一輩嘅民主派，何嘗唔係一樣有蛇齋餅糭旅行團？曾幾何時，區議會選舉投票，唔係投立場，係投熟悉，你可以話係為著數，但亦都可以從公共選擇學派裡面嘅「理性無知」去解釋。

十八，即係咁，假如我對新上任嘅朋友有咩期望，我會希望所謂嘅新景象，唔單止換人，而係徹底咁改變地區政治及行政嘅現狀；無錯，呢個係一個理想，同現實有一定距離，有失敗嘅風險，但成功嘅話，社會就有新嘅現實，有進步。

十九，具體咁講，香港公共行政，事無大小，集權中央，行政主導。行政主導，自然由少數官僚嘅理想，去嘗試改變多數人身處嘅現實。結果造成浪費同矛盾不在話下；只不過呢啲事發生響地區層面，局限性大，所以絕大多數人唔察覺。不過，日積月累之下，其實大家都見到問題所在。

二十，之前政府撥款畀地區做小型工程，大家都笑係小白象，點解？因為區議會層面，其實都冇乜公眾參與。即係，又係小圈子圍威喂。我真心希望今次當選嘅朋友，由依家開始，好似選舉咁，恆常持續咁去建立維繫同居民嘅溝通同關係，搵出社區入面嘅問題，處理矛盾。呢啲粗重功夫，好辛苦之餘，亦好多時令人極度氣餒。

廿一，區議員，講真冇乜權，甚至區議會本身，都冇乜權。區議員最大嘅功能，就係話畀佢代表嘅社區民眾知，其實佢哋本身就有嘅權利。某程度上，呢個都係「還權於民」嘅精神。假如我哋繼續相信「選你出來你就用權力去改善我嘅生活啦！」咁，今次區選根本就冇贏過任何嘢。換人唔換價值觀，只不過係另一班人被權力腐化。

廿二，由傘後嘅深耕細作，到 2019 年嘅真正遍地開花，忽然間香港好似見到一條出路。希望，呢個將會係新常態嘅起點。

廷伸閱讀：牛頓第三定律 http://bit.ly/2rpwPhf

#麻煩Share畀你識嘅新任區議員朋友