瑞士纯美小镇【龍疆】
五年前我由琉森(Luzern)到因特拉肯(Interlaken)嘅火車上經過呢個隱世桃園小鎮， 火車緩緩經過，眼前嘅風景雖然只有一分鐘， 湛藍嘅湖水翠綠嘅山丘，一直令我難以忘懷。 龍疆呢個地方大家無聽過係好正常，就算旅遊書都無介紹過，即使網路亦只有廖廖可數幾個介紹。正因為龍疆名氣小遊客只有零星幾個，更能保留小鎮純樸自然美。#啱曬我呢啲已經退隱江湖嘅隱蔽青年
蘇黎世坐火車到龍疆只需兩小時。須從琉森轉車，坐上開往因特拉肯嘅黃金線火車。琉森---因特拉肯---勞特布龍嫩係黃金線最靚嘅一段 (⭐謹記坐係火車右手邊) 坐右邊可以零死角飽覽龍疆湖(Lungernsee)全景。當火車緩緩靠近龍疆時，窗外湛藍嘅龍疆湖引起車內乘客拿起相機瘋狂拍照。 佢哋應該跟我五年前一樣， 諗都冇諗過開往因特拉肯嘅路上會途經一個隱世桃源小鎮，我慢慢站起來走到車門下車，車內乘客投以羨慕嘅目光， 此時不禁有一絲虛榮感呢。講返龍疆呢個小鎮，真係好細。 整架火車亦只有我同三個遊客落車。
純美小鎮之向左走........琉森開往因特拉肯嘅火車下車後，你可以向左邊係往山上走，亦可以向右邊下坡到湖邊。今日就介紹向左走嘅路線。
(⭐落火車後，左手邊係一個又一個嘅山坡，越過路軌一直往車尾方向往上走，大慨15分鐘就可以睇到整個龍疆鎮)。可惜地勢唔算高，未能完全俯覽整個湖但此處打卡實屬一流，經我非正式統計一個鐘內有至少三架火車經過。紅色嘅火車、翠綠山丘、遠處湛藍嘅龍疆湖；又是一幅美麗嘅風景。 左邊除咗可以觀賞火車經過嘅龍疆美景 ，亦係行山人士嘅熱點 (看圖)。 (⭐你可以行一個鐘去返前一個火車站Kaiserstuhl 又或者行三個鐘頭15分鐘到前兩個火車站 Giswil。 可以喺山谷中的小鎮行山欣賞沿途風景， 真係身心舒暢。
我今次冇行山，只喺山谷中百無聊賴地漫步。用心體會小鎮寧靜嘅生活。 湖光山色， 確實有點 美得不真實。
#龍疆 #瑞士龍疆 #龍疆湖 #瑞士龍疆湖#瑞士 #瑞士山區肺 #塵世美 #純樸 #瑞士自由行 #瑞士風景 #童話小鎮 #小鎮 #隱世 #山谷 #阿爾卑斯山 #少女峰 #瑞士火車 #觀光火車 #黃金線火車 #lungern #lungernsee #瑞士行山 #行山 #打卡 #夢幻村莊
