【最難忘旅伴系列 #10：我遇上嘅第一場雪】
喺最近咁悲情嘅氛圍下，或者都要諗返以前嘅開心自在，先可以令自己情緒正面少少。之前喺2020年嘅總結都分享過，我喺2015年離開咗一間公司之後，似乎六年嚟都未試過行咩大運，或者有咩順利過。
但係，我好慶幸當年離職之後，我做咗個決定，去次話長唔長、話短唔短嘅旅行，正正係果一次，開啟咗我對長途背包旅行嘅熱情，係我呢幾年入面，維持到我仲可以開心嘅原動力。
呢次旅行遇上過好多難忘嘅事，其中一樣，就係遇上我嘅初雪。去好多地方都見過雪，但真正遇上「落雪」，就從來都未試過。當日喺保加利亞某間Hostel起身，見到出面落緊雪，Hostel花園都鋪上咗厚厚一層雪，我從未見過呢個景色，興奮到我走出去拍片－－成間Hostel得我一個咁興奮。
當日我報咗Local Tour去Rila Monastery，算係保加利亞最熱門嘅旅遊景點，或者因為落雪，竟然完全冇人，就得我同三個日本妹。可能好多人都會幻想過，同班女仔喺個雪地度打雪戰，冇諗過你人生第一場遇到嘅雪，真係有三個女仔同你咁玩，佢哋仲要一路玩一路唱《Let it go》，喺成個修道院一個人都冇下，幾有氣氛。
去得巴爾幹半島，就同南美一樣，唔會係你無啦啦想去幾日就幾日嘅地方，旅途上遇到過嘅旅人，冇乜邊個係去短過半年，但呢幾位日本妹妹就係好典型嘅「冇假期亞洲人」，只係嚟保加利亞同奧地利，加埋十日就返東京－－雖然唔知點解揀兩個咁唔順路地方，就係佢三個好姊妹講咗好多年，第一次成行嘅旅程。佢哋都係讀緊書，啱啱就到有假期，竟然第一次成行就係「說走就走」嘅旅行。或者佢哋冇乜做資料搜集，誤以為首都索菲亞真係好似西歐大城市咁有得Shopping，點知有「Shop」都唔係佢哋想像中果種「Shop」，變咗夜晚無聊冇事做，一齊食飯飲嘢直落，其中一位仲真係keep到contact，直至今日。得意嘅係，香港人去到保加利亞物價之平真係驚為天人，佢哋作為日本人，簡直覺得自己係富豪咁，呢個文化衝突，已經夠我哋有排講。
人生第一次睇到落雪堅會開心到癲、第二次睇到都仲會開心、第三次開始覺得煩，第四次寧願落雨都唔好落雪，更加唔好計後尾喺黑山共和國、拉脫維亞遇上暴風雪，又凍又濕，真係不了。
今日諗返，最難忘嘅除咗係人生第一場雪有班日本妹同你玩外，更加係當時自由同無拘無束嘅感覺。雖然，喺Working Holiday都係咁樣路上識人，但呢次算係第一次長途旅行咁樣玩法，冇詳細計劃，往往因為路上識到咩人、路線又完全改變，去咗更多你從冇聽過地方，而呢啲人，竟然可以一直keep到落去。
喺冇得旅遊嘅日子下，我諗最回味唔單止係果種可以飛嘅回憶，更加係旅途上了無牽掛嘅自由自在。當你決心要走一段日子，果段日子目標就只有盡力去完成旅程、踏上一個又一個未知嘅國度，你唔會諗搵唔搵到工、你唔會諗交唔交到租；對比今時今日嘅你，唔會諗咩防疫意識，有咩好嘢街頭小食，隨手買完就拎嚟食啦，仲洗手？當你參加野外團、露營團，導遊就咁喺郊野公園張枱，冇鋪嘢攤曬啲食物，大家天生天養驚咩唔衛生？
最懷念嘅，唔止係可以周圍去嘅感覺，更懷念係，果種自由奔放，冇壓力嘅輕鬆感；「說走就走」講緊你離開屋企出發嘅姐，旅途上「說走就走」，跟一班陌生人去一個陌生地方，一齊玩一段日子，呢種咁自在嘅生活，疫情後他日通返關，仲可唔可以做到？
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
黑山共和國香港 在 富豪都有一本？ 「黑山護照」花錢免坐移民監 - YouTube 的推薦與評價
許多人移民，都必須坐上移民監，也因此只需要花錢投資就可以拿到護照的國家，顯得更吸引人。像是巴爾幹半島的 黑山共和國 ，先前推出投資公民入籍計畫， ... ... <看更多>