在香港時嘅偽中產日子與在英國的真生活 (3)
等如我最初所講，香港嘅政治環境只係討厭，但係唔足以迫走我。不過，厘十年幾年香港嘅政治變化，去到近年，我覺得可以係一個催化劑，令我一家人已經有好多原因而離開香港去英國重新生活嘅決心更加大。老實講，本人痛恨香港社會我地厘班偽中產，比CY政府尤甚。因為無咁嘅社會，就唔會有咁嘅政府同咁嘅議員。
今日嘅香港中產，唔多唔小都經歷過殖民地時代英國管治嘅香港生活過。經歷過幾多，又記得幾多，因為年紀，每個都唔同。唔好話係唔係戀殖，或者係唔係人心未回歸都好，我至少我感覺到以前嘅香港大家都好專心咁「搵錢」，中產好、藍領好、邊個都好都有機會向上流動。政府唔係好理，亦同時刻意唔比你理政治意識形態嘅嘢。公務員無政治立場，市民政治冷感，總之唔犯法、唔貪污，各自努力。點好似依家咁，唔好講話大是大非，就算同親戚朋友傾下計，都要諗下對方係「乜絲」，就住就住咁無癮呀？
如果大家記得，其實香港人從前都幾係愛國，但係又唔憎英國喎。我至少記得細個同阿公去國貨公司買彩電同單車送比大陸嘅親友，華東水災成家打去電視台捐錢，民運大部份香港人出錢出力，六四睇到阿爸同啲uncles對住部電視流馬尿。如果香港人當年已經唔當自己係中國人，咁激情做乜。愛唔愛國，係唔係香港人，唔洗人教，唔洗人地幫我代言。同時我唔明，點解唔可以話自己係香港人，大家番大陸，去問北京人係乜人，去上海人係乜人，你expect佢點答呢？
自問做咗幾十年香港人，我覺得對香港偽中產黎講，有無民主，就唔係最重要。最重要嘅係自由，法治同機會。但係，偏偏厘三樣嘢都慢慢減少嘅時候，民主就變得好重要，因為中產心態：「點衰，點壞，都係自己揀」。點知真係唔比你，而同時又驚無咗剩番嗰小小搵錢機會，又怕自己層樓會跌，所以從來都唔敢點出聲。當嗰啲真係無機會又無樓嗰啲年青人出聲嘅時候，就話人地搞亂自己個飯碗。
乜嘢時候最大聲最齊心呢？咪去到沙士嗰時囉，錢無得搵，樓跌到入骨，咁就同啲年青人最齊心！同埋，搞到自己仔女話要國教嗰時，都好齊心呀！
其實，香港偽中產响我眼中都證明咗關於民主嘅兩樣嘢。其實香港都唔係完全無選舉吖，大家睇下歷年嘅投票率，同啲中產選區選啲乜嘢人出黎？第一，又要唔開心，又唔投票，去投票，又驚選到出黎嘅人搞事，影響到自己。第二，厘幾十年，有無出過有能力（唔係剩係sell理念）嘅政治人才？就係咁，睇見都無希望啦。（記唔記得當年有幾多人話啲政棍，叫個婆婆出黎，阻住佢地買領展上市買股票？依家又話商場嘅嘢貴？）
變下變下，唔理唔選唔出聲，結果係點？咪比嗰啲以前諗都未諗過，想象都想象唔到嘅人，例如類似義和團呀，大媽形狀呀，疑似社團人士嘅人士，人肉錄音機呀等等代表香港人，話自己有幾愛國囉。怪得邊個？
其實愛唔愛國，係唔係中國人，有無民主，對我黎講都唔係問題。最大問題，而加強我走嘅原因係對香港厘個社會心死。就係當日，我自己生意唔見咗三成有嘅時候，而同時比幾個年青同事早啲放工去金鐘嘅時候，睇到新聞嗰啲所謂反佔中人士，已經好心灰。又唔係要你地革命，又唔係要你地爭取獨立，只係要求多小小權利，咁都唔齊心小小，就算大陸政治比晒完全民主香港，結果咪又係一樣。
唉....講講下，離咗題，真係唔好意思。
只係想講晒所有移民英國嘅原因，如果唔同意，只可以講句sorry！因為，厘啲係個人原因。
下個post保證入番正題！
#香港偽中產 #英國真生活 #有乜嘢社會就有乜嘢政府 #我真係唔介意愛國但係唔洗人代我講 #點解唔可以話自己係香港人呢
