【作為80後，見證電視台的興衰。】
我係80後，生於電視汁撈飯的年代。放學睇卡通片，夜晚追連續劇，假日睇遊戲節目，年尾睇頒獎典禮，係好多香港人集體回憶。如果夜晚有大結局，收工會立即趕返屋企，甚至約三五成群食茶記一齊睇。當時香港人睇電視大過天，亦係TVB最風光時期。
TVB經典劇集，隨口數得出，大時代、原振俠、美味天王、大鬧廣昌隆、西遊記、尋秦記、衝上雲霄、烈火雄心。當然仲有羅嘉良系列：天地男兒、天地豪情、難兄難弟、創世記、流金歲月、先生貴姓……每套都深入民心，回味無窮。如果你都係電視精，總有一套改變你人生價值觀，而我就受到「撈家」影響，由細立志要向商界方面發展，做商場大亨嘛，建造屬於自己的「無煙城」。當時電視劇影響力真係好大，可以營造一種社會風氣，聞說衝上雲霄出街後，投考空姐人數急劇上升。打一個比喻，當年追電視劇，就好似依家後生仔都用Instagram、telegram、連登，你無追的話，同朋友之間就少一個共同話題。
見證TVB由全盛時期，節節衰退跌入谷底，可以話關網上串流平台崛起事，又可以話係TVB咎由自取。持住壟斷電視台市場，多年來不思進取，編劇求求奇奇，製作是是但但，題材翻炒又狂抄，管理層大搞山頭文化，契仔契女有着數，非我族類無運行，導致積下的因，結成今日的果。依家香港人開電視，選擇不再限於免費電視台，可以連上YouTube、Netflix，世界各地劇集，任君選擇。再反觀TVB，台前幕後有名氣的已離巢，受新一代觀眾嫌棄，廣告商相繼離棄，收視屢創新低，盈利由盈轉虧，正慢慢步向ATV後塵。
其實我已經無睇TVB好耐，不過知道將會重播美味天王，童年回憶返晒嚟，亦令我有所感觸。無論對TVB有幾厭惡，舊日精彩劇集陪伴我渡過無數夜晚，都係鐵一般的事實。所以未來幾星期，我決定每日抽1小時，坐定定等睇美味天王，回歸昔日煲劇日子，懷緬當年最光輝的歲月。
套劇雖然有返咁上下歷史，但卡士強勁同劇情跳脫，相信重播仍會製造起不少話題。如果大家同我一樣，寧願追舊劇多過新劇，無疑係對依家TVB失望及不滿，又或者在大家的潛意識裡，TVB在電視歷史中的任務已經畫上句號。
00年代tvb卡通 在 90後00後TVB卡通片主題曲 ｜懷舊童年系列 - YouTube 的推薦與評價
大家好～歡迎來到彼岸！當年 TVB 兒歌首首都是經典！90後 00 後一定都聽過！*******************0: 00 -2:45 吳卓羲- 太極千字文《太極千字文》2:45-6:36 樂 ... ... <看更多>