我老婆隻鑽石戒指係假嘅（上）
結婚十年，我一直瞞住老婆：我送畀佢嗰隻結婚戒指，係假嘅！
其實我都有苦衷，話說結婚之前，老婆成日同我講，啊邊個隻鑽石戒指係三卡㗎，如果隻戒指細細粒，真係好冇面，唔結好過。
作為一個男人，一個想娶老婆嘅男人，梗係要頂硬上。
但一隻三卡嘅鑽石戒指，點都廿萬起跳。
我唔係唔捨得用錢，錢唔係問題，問題係冇咁多錢！
畀首期、搞婚禮，已經用晒我嘅積蓄，點樣用廿萬去買隻戒指？
唔買嘅話，我付出咁多就係想娶個老婆，臨門一腳，就係因為廿萬娶唔到？
所以我決定：買隻假嘅戒指。
我用咗幾千蚊，買咗一隻超高仿真度嘅三卡鑽戒。
老婆冇發現，我諗佢根本冇想像過，一向忠厚老實嘅我，會喺結婚戒指呢啲大事上造假。
到依加，我哋已經結咗婚十年。
呢十年嚟我努力上進，有升職加薪，經濟愈嚟愈穩定。
對於送假戒指呢件事，我一直都有愧於心。
所以，我儲咗錢，打算買一隻真嘅三卡鑽石戒指畀老婆。
我曾經同老婆提議過，不如買一隻新戒指畀佢。
老婆問：「吓，咁我咪要戴兩隻戒指？」
「唔係，係戴新嗰隻，唔戴舊嗰隻。」我解釋。
老婆摸住手上嘅假戒指：「梗係唔得啦，呢隻係結婚戒指，好有紀念價值，我無論點都會戴住㗎。」
各位男士都明白，我冇理由話老婆知，之前隻戒指係假㗎，分分鐘家變都似。
而我唔講出真相，又搵唔到叫佢放棄假戒指嘅理由。
至於老婆同時戴兩隻戒指，就算佢樂意咁做，我都唔敢。
原因好簡單，一真一假兩隻戒指擺埋一齊，老婆日對夜對，容乜易發現第一隻戒指係假。
本來「送真戒指」呢件事，只係我嘅一個心結，冇咩逼切性，慢慢嚟都得。
但突然間，老婆話佢有個姐妹，推薦佢一齊加入珠寶協會。
老婆心思思：「入咗會，可以睇好多珠寶展覽，買珠寶又有折，仲可以免費鑑定，真係好多著數㗎。」
我個心即刻跳得好快，珠寶協會一定好多專家啦。
老婆入咗會，就算冇專登拎戒指去鑑定，但佢日日戴住隻假戒指招搖過市，總會有專家提醒佢，一定會穿煲。
我逼自己思考，好彩，畀我諗到一個天衣無縫嘅好方法：換戒指！
我訂一隻真戒指，係同老婆隻假戒指一模一樣。
我再偷樑換柱，以真換假，咁就既可以解開我嘅心結，又解決咗假戒指嘅問題。
老婆每晚沖涼，都會將隻假戒指除低，擺喺梳妝枱。
於是，我用手機影低假戒指，再拎去珠寶公司訂造。
下集：http://bit.ly/3vBtM1V
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我老婆隻鑽石戒指係假嘅
