《我係一個收咗錢去遊行嘅阿伯》
「喂！龍哥！聽日嗰單嘢五舊水得唔得先。」
我係一個阿伯。
一個喺香港長大嘅阿伯。
有啲人生成富貴命，一生多姿多彩...但係呢啲人萬中無一，至少唔係我。
我浮沉大半世，無咩成就，死唔去就夠。
「喂！龍哥！聽日嗰單嘢五舊水得唔得先。」話說聽日有單「反佔中遊行」，所以我去到同鄉會辦公室，捍衛自己嘅權利。
「一口價四舊，唔做罷就！聽日幾萬人，多你一個唔多啦阿伯！」龍哥肥斯大隻，喺室內都帶黑超，分明唔係好人，但偏偏係佢出糧俾我。
「龍哥…我老人家嘛…聽日又曬…」我扮委屈，用另類手法捍衛自己嘅權利。
「得！你聽日唔好嚟啦！」龍哥谷起個二頭肌，裝腔作勢。
我心諗：「四舊好過無，殺你。」於是點點頭。
龍哥見我屈服，洋洋得意：「不過阿伯你惦唔惦呀？之前你扮反佔中啲街站職員，點知除件衫你就扮埋市民，一條友簽幾廿個名，俾記者影到哂！俾你累死喎。」
我心諗：「每個簽名成50蚊...簽多幾個日薪拍得住大學生呀...梗係簽啦...」
龍哥繼續講：「咪啦！同你練下先！點解要反佔中呀？同埋我哋大佬係邊個？」
我不慌不忙：「反佔中就有真民主囉...我地嘅口號好似係『愛與和平反佔中環』呀嘛... 我哋大佬咪周融囉...」
龍哥突然大力拍枱：「你個屎忽鬼！唔可以提民主呀！有民主嘅我哋就無工開！同埋『愛與和平』係對家口號！仲有咩周融周融，周你老味咩！我哋大佬叫張融！記好佢！唔係聽日無糧出。」
講真，對家口號係和平，我哋口號係反暴力...咪一9樣...不過算啦，咩普選我又唔識...咩佔中我又唔明。咩都要反嚟反去...呢家啲後生真係不X所謂，俾著以前咁反法，一早拉你去打靶啦！
不過反正有錢收...近年多咗呢啲工，生活都舒適咗，每日可以嘆返幾枝萬寶路。
天已黑，
所謂訓前食支煙，快活過神仙...
「反普選！反佔中！」
好快到第二日，我都交足戲，大嗌口號。
突然有個後生仔拍拍我：「阿伯，應該係保普選，唔係反普選喎。」
我諗一諗又係喎，我就話：「後生仔幾醒喎，搵到窿路嚟行，你邊條Line架？龍哥定華Dee？你收幾錢呀？」
後生仔苦笑：「我喺中資銀行做嘢嘅...我無錢收，老闆叫我嚟，唔通唔嚟咩，唔嚟實有手尾跟啦，講真佔唔佔中我理得佢，總之唔好阻我加人工。阿伯唔講啦，我快快手手行完仲要返去做嘢。」
「反普選！反中央！」天氣愈來愈熱，我繼續嗌口號。
前面有班撐佔中嘅人，立即同我哋起衝突，推撞之下我撞落一個中學生到。
學生見到我渣住個「反佔中」牌，眉頭一皺：「伯伯，你知唔知自己做梗啲咩呀？」
我一聽火都嚟，你唔係教我做人呀！老子渣機關槍嗰時你連精子都未係呀！
我做梗咩？我做梗啲令自己有飯開嘅嘢囉！
於是我話：「我呢啲叫愛國！你反中亂港！等俾人打靶啦！」
學生搖搖頭：「你知唔知你個國變成點，GDP幾多，CPI又幾多？同埋，香港係無死刑嘅...你呢種停留喺好耐之前嘅觀點，真係可以應用喺呢一秒？」
我被逼得急：「咪X講英文呀！外國狗！我有身份證！我有投票權！你吹呀？」
學生點點頭：「我明白，所以我誓死捍衛你說話嘅權力，同時，我都要捍衛自己嘅觀點。」
我再鬧佢：「捍衛捍衛捍咩Ｑ呀！人人都捍！香港咪亂囉！我就無嘢衛捍既！交俾政府幾好呀。」
學生微笑：「你有架，人總有嘢為自己捍衛，只係可能你自己唔覺啫...」
講完之後，學生慢慢離開，但突然回頭，再問我：「伯伯，你話自己愛國，如果國家需要你俾架私人飛機去接領導，你肯唔肯？」
我答得乾淨俐落：「無問題！」
學生再問：「咁如果國家需要你捐幾塊地皮呢？」
我答得爽快：「無問題！」
學生再問：「咁如果國家領導落到嚟無帶錢，借住你四百蚊先又得唔得？」
我諗一諗，再答：「梗係唔得啦！」
「點解？」學生問。
「咁我真係有四舊水喺身呀嘛！」我理直氣壯。
學生一邊笑一邊走，同時留低咗一句令我在意嘅說話。
「其實呢個係一個老笑話，面對呢個社會，或者當笑話去睇，人會開心啲。伯伯你可以投票，但你呢票帶嚟嘅後果，你有生之年見唔到，但未出世嘅人將會繼受你種出黎嘅果。我哋呢班未來嘅主人翁，即使100%團結，都係避唔過上一輩嘅因。」
我無時間深究呢番說話，因為龍哥打俾我：「阿伯，你上網簽埋『網上反佔中』，加多你一舊好唔好？」
「好！」我二話不說。
我係一個阿伯。
一個喺香港長大嘅阿伯。
我今日賺咗一張金牛，同時蝕咗一個未來。
PS. (張圖我真係上《反佔中》網整的)
狂賀18歲以下，英文名叫阿伯嘅人，利用唔係自己嘅 ID，加埋19890604電話號碼成功反佔中 (anyway，未提交，亦唔會交)
PS2. 呢篇文以「個人身份」發表。這行為是「冇乜野中立性」之分，至少我唔會call記者招待會去話自己寫咗篇文，亦無咁嘅能力。
PS3. 此文內容純粹虛構，如有雷同，實為香港之不幸。
IG: cheungson88
