《讀者投稿》長篇
由同居、結婚、生bb，一直惡化，有時我會懷疑佢係咪咁憎我？
但我自問我一直都對佢好好，我好聽佢話，我從來都係密密做唔會出聲。但慢慢 真係好難頂！🤦🏽♀️
利申：我老公幫我出左好多次聲，但99係雙面人，同埋最叻惡人先告狀，仲要勸幾多次都無用！因為講極都無用，又無咩地方發洩，所以揀左投稿！
1. 我一星期煮3-4次飯，佢嫌我用佢啲煤氣搞到煤氣費貴左$200（有俾家用）
2. 嚴重衛生問題
- 一條廚房布 抹地板、垃圾桶、枱、爐
- 將煙頭、垃圾塞落任何渠位，煙灰彈晒係洗手盤唔會洗
- 沖涼毛巾全家共用，我自己買過條用，佢私自攞左去用
- 洗碗唔用洗潔精，我用洗潔精會話我嘥野
- 啲碗未乾就放入櫃，一係就用晒一卷廚房紙黎抹乾
3. 會係朋友面前當面數我，話我淨係識煮飯唔識做家務。
而佢覺得我唔識做家務就係因為我洗碗會用洗潔精、我吸塵拖地唔係日日做、放工返去洗唔切衫
4. 講野語無倫次 成日失憶，結婚前教個仔第時點包二奶，結完婚叫我要俾心機養佢個仔。成日話我一定係貪佢個仔靚仔先嫁俾佢，但轉個頭又話唔明點解佢個仔咁窮我都會嫁
5. 成日話我地好多野所以要我地搬走，但我地兩公婆只係佔用我地自己間房，我成日直頭覺得我係住緊劏房！我話要租屋又唔俾，最後逼我地買樓，話資助我地但到買完又反口！當初我地話想齋註冊，佢話佢想我地擺酒，最多佢俾錢，到book晒野又反口！佢話佢負責過大禮，最後就到先反口叫我自己搞！佢話因為佢買左好多金器俾我，最後當然唔係啦！
6. 成日掉我啲野，我成日唔見左野，問佢佢一定答
- 你㗎咩？你做咩唔寫名？
- 發晒霉咪掉囉！（明明唔會發霉）
- 你買過個未得囉！唔掉都掉左！
7. 我有左bb後，開始要買定野執走佬袋，佢唔俾我買，原因係佢唔想我擺啲野係佢個廳。生完我返娘家坐月，無關心我都預左，每次視像都一定無句好聽。
- bb黃疸未退：嘩咁黑咁樣衰嘅，似晒你一個餅印（我成日曬所以不嬲都皮膚黑）
- 胎毒未清起左啲粒粒：嘩啲皮膚真係差，一定係個老母食垃圾搞到佢咁啦
- 經常攞我個bb同佢另一個孫比較
- 我bb好少扭計：你執到啦，個b咁乖 珍惜下啦你
8. 坐完月返去住，日日都有野煩
- bb訓覺又唔俾，係要整醒佢！話訓咁多夜晚唔使訓呀？痴線！初生bb係要狂訓教㗎囉！
- bb自己係床玩，我食飯。佢對住bb講：你阿媽咁衰唔要你呀？真係衰啦你阿媽！唔緊要 我知你想嫲嫲抱你㗎啦！我抱你啦！但到bb真係扭抱，佢又話你咁曳，我唔抱呀！
- 成日叫我唔准買野，要我儲多啲錢買樓同養佢個孫，佢教佢個仔唔使儲錢，仲叫我唔可以逼佢個仔儲錢！
- 我俾牙膠bb咬，佢又話都唔知我啲牙膠係咪好，我話有晒證書佢又話唔信
- 佢唔俾我用朋友俾嘅二手bb野，話買唔起咩？但由陀到生到幾個月後，佢一樣野都無買過俾bb
- 成日勁粗魯，大大力閂門開門執野講野，佢一係屋企，bb就訓唔到，仲成日嚇親，提左好多次都唔肯改，仲要答：咁細膽嘅？咁更加要嘈啲俾佢練下膽啦！
- 成日叫我唔好餵人奶，話我啲奶無益，又話我餵人奶盞餓死個女！但bb明明食人奶食到肥肥白白！
- 成日都好無禮貌，衝入我房睇我餵人奶，試過佢同人視像緊都想俾人睇我餵人奶，痴線㗎！有無問過我想唔想俾你地睇我餵奶呀？但我又唔想鎖門，驚有咩事叫救命都無人救我！
仲有好多..... 我有時真係會覺得好辛苦，但新屋方面又未搬得！真係好折磨！！！
＃我的極品四大長老
