【龔成問答信箱】（Q14761-Q14780）
Q14761：
龔成，因為你既關係我開始投資股票。
我吾識股，只想月供好似儲錢咁儲。
我抄底曬你講每隻股既初步便宜價，以下係你曾經講過的：
銀娛 $40
盈富 $24
比亞迪$40平宜，35更安全
不過，個市好波動，我調低左每隻股供既月供數，我係咪應該改供其他較平既股呢？
龔成老師：
首先，我計算企業價值的平貴，並不是預測股價會點走，而是以企業層面分析價值。
我地就可以因應這些平貴作為指標，去作出投資決定。
如果股價在平宜價，我地可以較大力少少入貨，如果在合理區，會以分注投資、月供等方法進行。
現時上述的股票，都處合理區底至平宜區，因此，你唔需要改變你的投資策略，月供是長期的，保持進行就得，同時，唔建議轉來轉去。
當然，你本身都要有一定的現金在手，大市好波動，要善用，把握機會。
------------------------------------------------
Q14762：
龔成老師
我是你的粉絲 一口氣買了老師多本著作
但時間關係暫時未睇晒
今次想再深入請教老師
小弟31歲 太太29歲
家庭月入9萬
每月洗費約6萬
每人各一香港物業
本人剛開始供股現共三萬(一手 阿里巴巴
煤氣 地鐵 盈富每月各供$1000)
太太股票約十萬(港交所及小米 恒指32000入還未返家鄉)
現有現金100萬
因每人已有物業所以不會再考慮物業
故想加碼股票作收息之用
請問我現在股票組合還有什麼改善地方
應再加注其他股票嗎？
應如何使用該100萬及如何分注？
家庭洗費5萬
謝謝龔成老師撥冗回覆
龔成老師：
你地現時持有，以及月供的股票，都是有質素的，可持有，就算部分未翻買入價，都無問題，有得守的。
由於你地已持有2間物業，因此在之後的財富分配，應著重股票類別。你現時現金較多，以你地的年齡，仍是財富的增長期，可以將現金投入到股票，增加財富的增長力。
平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。
同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。
不過，以你地的年齡，我會建議較集中在平穩增長類。
以現時的大市平貴水平，你可以動用$30萬-$50萬投資。分注進行，例如每阿隔2、3個月入一次，分幾次入。
同時，你地可以月供股票，其實每月金額增至$10000-$15000都無問題，盈富及其他優質股就得。
------------------------------------------------
Q14763：
丫sir ,如果有筆錢，創業好？
定買樓好
我29歲 月薪2萬尾
龔成老師：
如果你本身有做生意的知識與經驗，又或已有一個不錯的創業計劃，又或現時已有一些小生意，想再投資搞大，我會建議你將資金用作創業。
物業投資，能給你基本的回報及現金流，但創業，就可以爆得好勁，你在財富與事業上，都會有一定的提升。
當然，這是有風險的，但你29歲，可以試，這是仍可以衝的年齡，但先要有好的創業計劃。
------------------------------------------------
Q14764：
你好龔成老師，去年開始月供盈富基金、中生製藥及長江基建（共＄4000)，想於今年增加供款，你認為提高其中一隻的供款較理想？
還是再月供多一隻有增長潛力的股票呢？如後者，你有何建議呢？謝謝
龔成老師：
首先，上述月供的，都是有質素的，保持長期進行就得。
另外，如果想加金額，建議你加上原有的股票，因為本身中生製藥（1177）已經是潛力股，如果再加多另一隻潛力股，比例就會較多。
所以，加大原有的金額，是較為平衡的做法，特別是先加大盈富（2800）。
------------------------------------------------
Q14765：
老師，我想問你點睇中駿集團呢隻股票?
龔成老師：
中駿集團控股（1996）近年發展得唔錯。
佢主要係中國從事物業開發、物業投資及物業管理服務等業務，集團在廈門、上海設立雙運營總部。
佢近年的生意不斷增長，就以2018年來講，連同其合營公司及聯營公司共超過100個項目處於在售狀態，分布在31個城市，主要集中在二線及強三線城市。
另外，佢負債比率不低，這是風險。
簡單來講，業務不差，增長力強，但業務集中在二、三線城市，加上負債高，企業整體的風險較高，加上現價唔算特別平。這類股，如有貨可持有，但無貨想入，就只能小注。
------------------------------------------------
Q14766：
老師你好，我想問2013 微盟集團是潛力股嗎，我見它財務在5年內也健康上升
龔成老師：
微盟集團（2013）集團主要在中國從事提供軟件即服務產品及營銷服務。
佢的產品分為「商業雲」解決方案、「營銷雲」解決方案及「銷售雲」解決方案三類。
「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。
這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。
------------------------------------------------
Q14767：
老師，我想問1728正通汽車可持有嗎？
預揸半年
同埋1622可買過嗎？
龔成老師：
正通汽車（1728）係汽車經銷商，亦提供汽車相關物流業務、潤滑油貿易業務，以及金融服務。佢銷售之汽車品牌包括寶馬、ＭＩＮＩ及奧迪等豪華品牌，此外，還包括日產、現代、本田及雪佛蘭等中檔市場汽車品牌。
近年生意都有增長，但見盈利增長有減慢情況，同埋中期業務有所轉弱。而股本回報率處較低水平，同埋佢較受經濟週期影響，所以股價會較為波動。
近期中國車市放緩、外來競爭、行業競爭加劇等不利的因素，都對整個汽車行業造成影響，相信中短期較一般，不過，股價唔貴是吸引力之一。
半年只是一個中短期投資，不確定性會大。
至於力高集團（1622），主要在中國從事物業開發、物業投資及項目管理業務、保健服務及買賣建築材料。主要包括泛海峽西岸經濟區、中西部地區、環渤海經濟區、珠江三角洲地區及其他地區。
佢業務上落比較大，企業規模唔算大，質素算是中等。以現價計，投資值博率未算高。
------------------------------------------------
Q14768：
呀sir請問你點睇必瘦？
龔成老師：
必瘦站（1830）有投資價值的，佢近年業務發展得唔錯。佢在大陸都有市場，生意增長明顯，而盈利亦保持向上，不過中間就有少少波動。
相信長遠仍有增長力，現價都算合理的，但由於近年已升左唔少，最好分注投資較好。
------------------------------------------------
Q14769：
老師小米 可長期持有嗎?
咩價位可以入呢 謝謝老師
龔成老師：
其實小米集團（1810）其實有增長力的，因為佢的產品的確受歡迎，同時處於增長狀態中。
但估值是最大的問題，佢不斷在投資，同時無人知幾時先有較理想的現金流，大家都只是憑「將來價值」去推斷，因此股價一定好波動，市場估值經常處於不一的狀態。
所以，你要預佢將來會向好，但未有確定時間，因此，就算現價比之前上左，只要分注，相信現價是無問題的，佢前景都算正面。
------------------------------------------------
Q14770：
老師! 百威係咪有質素嘅股呀？唔該
舜宇光學(2382)及高偉電子(1415)
老師好少聽你講呢啲手機設備股， 請問你點睇佢哋
龔成老師：
百威亞大（1876）主要於亞太地區從事啤酒釀造及經銷，集團擁有知名啤酒品牌包括百威、時代、福佳等等，未來會主力在亞洲市場發展。
此股有品牌和規模，有長遠投資價值。雖然現價比之前回落，但未算平，不過，都可以分注入。
舜宇光學（2382）是優質股，有潛力，不過，股價唔平。
高偉電子（1415）風險會比舜宇高，不過，都算是有點質素，如果投資注碼不多，都可考慮。
------------------------------------------------
Q14771：
老師我有一個問題想請教。我和老師一樣老師是公屋出身，但大家都知道公屋有富戶政策限制入息和資產，亦即是資產累積到一定程度就必須遷出公屋。
可否請教一下老師當年是怎麼做的？例如當股票市值累積到哪個數時就搬出去自住？或是有其他大家都明白的方法？
龔成老師：
當我去到一定的資產水平，有物業時，我當時已在公屋除名。我建議如果你到了這水平，也是這樣做。
當然，坊間的人，除名後有不同的做法，有的搬出有自己的地方住，有的會留在公屋偷雞住，我並不是鼓勵你要留在公屋偷雞住，只想話比你聽，坊間有人咁樣做，至於多與少，我不知。
------------------------------------------------
Q14772：
老師，我現在有這些股，我應該加注在現有的股票上還是再買另一些優質股比較好呢？
通常一個組合裡要有多少隻股？
龔成老師：
通常一個成熟的組合（$100萬以上），可以有10隻-15隻股票，如果$100萬以下，5-10隻。
其實無絕對的，如果你裡面有盈富（2800），隻數可以小D。另外，如果你本身投資實力較高，可以更集中投資。
------------------------------------------------
Q14773：
請問1800，3323，2628，941 這幾隻質素如何？
龔成老師：
中國交通建設（1800）質雖然不差，但增長力較弱，只是收息，你預股價上得較慢，但這股並不是無質素，所以睇你投資目標，持有收息可以。
中國建材（3323）本質都有質素，但不算強，這企業最大的問題是盈利不穩，主要由於成本問題令佢出現這情況，結果就是令股價不穩，投資者亦會視為有風險，因此這類股的估值不會太高。
這股現時在合理價水平，但賺錢能力不算好強，長線投資都可以，但就未必值得投入太多金額。
中人壽（2628）正面，但近年平安（2318）的質素比佢好。
中移動（0941）有質素，但由於政策令賺錢能力無過往咁勁，你預收息及平穩增長。
------------------------------------------------
Q14774：
老師，現時恒指升至2萬9千，咁盈富基金好似就有少少貴
如果呢個時候月供緊6千（盈富，港鐵和恒基各2千），應唔應該減低月供金額先？定係每個月相同金額月供呢？
龔成老師：
恆指雖然比之前上升了不少，不過，這刻仍算是合理區內，加上你月供的，都是有質素的，我唔建議你減。
月供是一個長線的投資策略，保持長期進行就得。不過，現時大市的確不能稱為平，你最好同時有一筆現金，作為等投資之用，這是較好的。
------------------------------------------------
Q14775：
成哥，點解3333負債咁高又派咁高息既?
龔成老師：
恆大（3333）的模式，就是利用極高槓杆，去投地、起樓、發展，只要樓市向好，佢就可以用好少的資本，去創造一個理想的回報，公司就會有可觀的利潤。
當佢有利潤，大股東等人希望收息，又或佢想股東們都能得到理想的股息回報，佢就會將盈利作股息派出，令股東得到理想現金。不過，這動作會由於企業仍處較高負債，而提高了企業的風險。
------------------------------------------------
Q14776：
我依家 22歲讀緊書，得2萬可以投資，你覺得5G股 投資 長飛，華虹同中芯邊隻更值得投資?
我曾經29蚊睇中平安醫生，10蚊睇中碧貴完，9蚊睇中比亞迪電子，但都錯過左，點先做到守呢一步?
龔成老師：
你22，是財富增值的黃金時期，要好好把握，盡你一切的力量去儲蓄、投資、學投資知識。
你可能有選股的知識，但未有企業估值的知，你找到上述的股票，但不知幾時投資，這反映你未有捕捉大市冷熱、企業估值的能力。
另外，我地進行理財，是一個財富配置的過程，這是分配，當中不一定能捉到低位，但如何用你手上「貶值的現金」，建立出一個「增值的組合」，就是你要做的，有時，股價就算不是最低位，只要合理價，你都可以買入，唔好嘗試捉最低位，反而建立一套有策略的投資模式陸，會更好。
以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
------------------------------------------------
Q14777：
阿sir 你好 最近研究緊0855中國水務
睇好佢平穩增長同息唔錯
阿sir 點睇佢現價 ？
6蚊樓下屬便宜嗎？
龔成老師：
中國水務（0855）本質正面的，業務發展不差，生意保持理想增長，不過，負債是佢最大的問題，這令佢的風險度增加。
當經濟轉弱時，佢這類負債較高的企業，要對的不確定性會更高，所以佢股價不斷下跌，只是市場正常反映佢的風險度。
這股可以長線，現價合理，$6以下在合理區中下部。現價注碼不建議太大，同時你要明白佢股價仍會波動。
------------------------------------------------
Q14778：
龔sir您好,點睇6060眾安保險?
龔成老師：
眾安（6060），並不是無質素，佢業務高增長，但最大最大的問題，就是這企業仍處燒銀紙的狀態，虧損不斷出現，根來無人知幾時先有較似樣的盈利。
這就會出現一個嚴重問題，企業值幾多錢先合理？
答案是無人知。
市場根本無法正確估到佢地企業價值，那就只能單憑概念、前景，去估這股的股價值幾多。這就會令這企業的股價十分波動，因為大家都只是估估下。
------------------------------------------------
Q14779：
如果我現在有小小現金，可以投資什麼，還是作定期穩正的。我收入不高
龔老師，如果買月供股，買邊的幾隻股好的
龔成老師：
我地理財，要做到攻守兼備，你先要做好防守，例如留有一定的應急錢，基本的現金，而餘下的現金，就可以作投資。
月供股票是很好的做法，但同樣，你要先預留一筆現金，然後才開始進行月供的計劃。月供盈富（2800）是適合你的，就算每月小資金都無問題。
------------------------------------------------
Q14780：
如果我想5年累積到100萬 (2020-2025)
港鐵066 月供$2000
煤氣003 月供$2000
盈富2800 月供 $2500
比亞迪 月供$1500
月供共$8000, 再每月留$2000觀察 低價入市 請問有機會有100萬嗎？
另一個問題 月供到底幾時放好？如果5年內我見到升咗好多 我應唔應該放？定點都等5年先好放？
龔成老師：
如果用上述的計劃，我相信5年會滾存到$80萬-$100萬。
能否成功打上$100萬，好睇你點運用餘下的$2000，因為這涉及選股及把握時機的能力，如果做得好，就有機會，不過，我會建議你努力儲多$2000，令你每月剩下現金$4000，成功機會會大增。
至於月供幾時賣，一般會長線，月供5年以上，持有時間可以更長。
因此，就算你永遠持有，無問題。但如果出現一些情況，都可以考慮賣出：第一，這股的質素已變，第二，股價遠超企業價值，第三，有另一個明顯更好回報的投資項目，才考慮賣出，轉換。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
