【龔成問答信箱】（Q14661-Q14680）
Q14661：
阿sir我係你舊生,完成一份6869的分析，想你比D意見，分析如下
優勢及機遇
1.全球光纖市場中，在需求上，中國佔52%，而6869則在中國佔有37%市場，以及在全球佔有20%市場，可以算是壟斷，而且產品亦是持續有需求
2.完善生產系統，擁有全球光纖業最優良的pcvd生產技術（由大股東draka授權）生產光纖預製棒
3.中國未來5g市場機遇，相信會為6869帶來更正面優勢
4.各項財務數據算是良好，負債不大
弱項及威脅
1.上邊據及的pcvd生產技術為6869目前主要的生產技術，但此技術專利卻屬於另一股東draka,draka亦同為光纖行業的另一企業，雖然一般都會維持合作夥伴關係，但畢竟是同業對手，在這個因素上存在一個風險
2.客戶群應該主要為電訊商，但電訊商始終有限，客戶群因此較穩固及集中，令大部份收入來自主要幾個客戶（如國內三大電訊商），因此相信6869的議價能力會較弱
3.未知的同業競爭風險，全球的頭8間光纖預製棒供應商已佔85%市場，如對手能研發更高水平的產品，對市場格局有較大影響
推算估值：15-22.5
想知以上分析及估值合唔合理？
另外，進階班3月暫時未有空，但之後一定會報，分析了股票一年多，現時感覺自己開始上手了，但總係好似小學生咁想要「對答案」，想知阿sir你初學個陣做完的分析，如有唔明白，又有誰解答你？
我是一個唔太自信嘅人，雖然明白有自信去做事會更有更好效果，但奈何性格係比較冇自信，而我是否又應該相信自己的分析，唔需要每一次都要問你，有時我會諗，如果你唔再回覆，都係要靠自己！
另外，「企業評估表」你會唔會考慮用excel做，雖然寫落紙會深刻d,不過始終唔太環保，而且持有嘅組合都要定時更新
龔成老師：
你上述的分析，方向正確，長飛光纖光纜（6869）本身質素不差，你優勢部分正正講出了這企業較重要的優勢位，這些優勢令此企業有一定的實力。
而你所講的弱項，正是這企業面對較大關鍵的因素，draka問題。雖然是股東，但同樣是對手，這一定會為企業帶來風險，相信背後有一此複雜關係，當中的利益問題，是一般投資者很難分析到的。
另外，佢之前受惠三家國有電訊營運商發展網絡基礎，所以生意算是不差，但這亦令這公司出現風險。睇翻過往，之前中移動的中標結果，佢排名唔算前，這反映市場競爭有所加劇，佢的賺錢能力有可能略有減弱。
因此，投資者只能明白有這些風險存在，同時在注碼方面未必能太過進取。以及在估值上略為調整。
估值方面，宜調低翻少少。
我自己初學股票時，大量睇書及上堂，同時我大學讀財務學。不過，我現時的股要知識，好多都是睇書及睇年報得來的，如果你不斷睇年報，好多野唔識都變識，我十幾年前開始，每星期分析一間企業，好多野都會慢慢掌握得到。
我建議你多睇書，多睇年報，自己分析先，自己思考先，真的有唔明就問我，這是令你自我尋找答案及進步的過程。
至於「企業評估表」excel，我唔比的原因，是擔心版權問題，因為好易比人在網上廣泛流傳。
------------------------------------------------
Q14662：
我#00388 ＄230.8個時買入，係咪應該由佢keep住放係到，唔好郁佢呢？
另外#02382 $128.5 買入，呢d係咪應該依家高高地放左佢用d錢放去其他地方呢？
龔成老師：
港交所（0388）是好優質的股，你買入價處合理區中上部，這股有長線投資價值，建議你長線投資。當股市進入狂熱期，牛三，成交額不斷創新高時，你到時可以考慮賣出部分或全部。
舜宇光學（2382）有質素，長遠仍有潛力，不過現價已唔平，如果你貨多，可升多少少後賣出部分。不過，我會偏向建議你長線。
------------------------------------------------
Q14663：
龔SIR你好,我之前睇你d片的讀者問答
我有類似情況
月入2萬3左右 , 歲數28,
可以儲到1萬1個月1,
儲蓄有10萬
我諗住月供 盈富 同 比亞迪
我個人都想進取
應該點分配比例會比較好呢?
同埋我應該搵邊間銀行或者證券行 呢?
或者 如果再進取d 有冇其他選擇?
依家我個10萬做緊3個月定期, 有冇拎呢筆錢更有增長?
多謝老師幫手..十分感謝
龔成老師：
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只宜小注。
你可以做月供股票，每月$8000。
你可以考慮盈富（2800）$4000。比亞迪（1211）$2000。
另外再加1隻（$2000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。這樣組合會比較平衡。
如果你想進取d，就月供中生製（1177）$2000。
至於現時持有的$10萬，唔需要急投資，等機會仲好。又或你可將部分，如$3萬，投資盈富（2800），令你有翻少少貨先。
銀行及證券行都可以，都穩健，香港監管不差的。匯豐、南洋商業銀行都可月供。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q14664：
成哥，如果現有50萬現金
怎樣最升值，而且吾會輸?
龔成老師：
如果你是低風險者，以保本為首要條件，咁樣投資的回報就唔會太高，所以，你要在風險與回報方面取平衡。
現時，投資一些收息股、房託，是較好穩中求勝的方法，例如目標是5%、6%的股息率的收息股，如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。
部分收息股比高位有所回落，例如置富，這是由於受香港運動影響，但長遠的質素仍在，因此，現價有投資值博率，穩定股息，同時有升值潛力。
當然，唔建議只投資一隻，你可以投資一個組合。
另外，現時大市處合理區，可以一邊投資一邊留現金（因此你不能用盡現金），而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q14665：
龔生點睇大市走勢？
龔成老師：
其實我一向都唔預測走勢，我只集中分析企業質素、前景、平貴。
不過，經濟與不明朗因素較多的年份已經過去，之後各方都會慢慢好轉（雖然經濟仍未好），但股市較經濟行先，因此正面的機會較大。
------------------------------------------------
Q14666：
龔成老師, 你好, 剛睇你的片，講你分享如何從月入1萬, 計劃五年儲100萬, 聽到之後我好奇你個計劃係點?可否具體分享一嗎?如果俾我唸, 我會咁分析:
1. 五年儲100萬, 即每年要有二十萬
2. 每年要有二十萬的話, 即每月大約要有16000元
3. 人工10000月, 即人工年薪是十二萬
計劃實現初步構想:
1. 怎樣才可以每月額外賺取穩定收入約16000元?
2. 如果我人工收入可以儲一半, 那可怎樣用一半的人工來賺取額外16000元?
3. 有甚麼其他渠道或工具可以達成每月16000? 股票? 基金?
我自己是月入大約6萬元, 36歲, 有家庭有小朋友, 生活穩定, 但支出多. 可能每月只能留1萬多儲蓄. 近幾年開始思考如何達至財務自由, 具體D講即我怎樣才能通過用每1萬元來創造多每月5萬或以上的收入?
你這條影片剛好引起了我的共鳴, 所以想請教一下你. 希望龔成老師解答一下.
龔成老師：
我當年23歲，月入$8000，大膽定了一個計劃「5年累積$100萬」，雖然知道有點遠，但唔好理，定左先。
之後，我將大目標化成小目標，如果要做到「5年累積$100萬」，每個月就要儲到$10000，合共本金$60萬，其間合理投資增值，就有機會滾存成$100萬，這是我23歲的計劃。
由於最初正職只有$8000，每月無法儲到$10000，於是我利用星期六日，找兼職，增加收入，然後再大幅減少支出，成功每月儲到$10000。
加上我不斷投資，在4年半後，成功累積到$100萬，完成了當初的目標！
所以，我建議你增加收入，可以從一些高時薪的工作著手，如果現時人工不算高，那就要想想，長遠來說，要睇下現時職業有無得升，前途如何？
同時，要做到應慳就慳，應洗就洗。
另外，要開始投資你，最簡單就是月供盈富（2800），你可以每月供$8000，長期進行，已可以累積一定的資產！
當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。如果你到時有足夠的資產，到時產生的現金流就會多，因此，做好這刻「增值」先。
------------------------------------------------
Q14667：
Hello 龔成，一直很欣賞你很用心回答粉絲問題，想就本人家庭未來之財務安排請教一下！
兩夫婦月入約7.7萬，打算今年下半年換樓，購入一750萬樓自住，作9成按揭後扣回洗費及裝修等，預算有200萬現金作投資及家庭儲備。
因每月供款達25,000，因此未能有多餘現金作儲蓄，打算使用150萬左右作投資 (留50萬現作流動資金)，欲請教以此等資金應使用分段購入收息股的方法。
還是使用此資金每月月供股票 (如1-1.5萬)，兩者看來那個方法的複息效應較佳？預15-20的投資時間，先謝謝你！
龔成老師：
以你地的情況，可以以投資收息股，再加上平穩增長股，當然，亦要預留一定的現金。
當你完成買樓後，如果有一定的資金剩，可以以分注模式投資股票，同時，可以開始做月供股。
你可以建立一個收息股的組合，目標是5%、6%的股息率的收息股，利用現金部分去分注投資，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。
至於月供，你可以投資一些平穩增長股，平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。
------------------------------------------------
Q14668：
龔成老師，想請教你月供股票既意見。
我24歲, 供左2個月。
呢家個組合係:
盈富 $3000 220股
騰訊 $3000 17股
呢家我想加多2隻股票做月供，想total 每月供$9000
我睇緊
6823 香港電訊,
1038 長江基建集團,
941 中國移動
想問下可以點樣分配比較好?
同埋現有既駛唔駛做調整?
多謝你先~
龔成老師：
盈富（2800）與騰訊（0700）都是有質素的，你保持長期月供就得。
如果你想加多2隻，可以加長建（1038），這股有增長潛力，質素正面。而另外兩隻電訊股，質素有，但增長力不強，以你的年齡，未必最適合。
你可以考慮：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。
------------------------------------------------
Q14669：
老師 請問1681康臣藥業質數如何？
發盈警後，合理價位應該是多少
現有5手 , 應否繼續持有
龔成老師：
康臣葯業（1681）優質度有少少下跌的情況，不過，仍算是有質素的，以佢的最新經營情況，相信中短期仍會弱，但長遠不會太差。
現價合理區中下部，可持有，但不要加注，相信要耐心少少先可以上翻去。
------------------------------------------------
Q14670：
龔成老師您好！
本人月入55000，4成樓貸，每月供樓13000，租金20000。
太太月入30000，5成樓貸，供樓15000，租金14500。
現在自己和太太租樓住16000。育有一女。
每月家庭盈餘50000。現在持有30萬股值領展823，10萬股值中石化386，黃金（實體金）15兩。
另做月供股1萬，有以下股票:2800盈富，939建行，0016新地，1299友邦，700騰訊，2318平安。手頭現金約10萬。
請問，我可以如何善用每月盈餘作投資?有沒有機會5至10年達到財自?
（每月被動收入5萬），再過半年就樓按罰息期會過，我應該加按套現買股嗎？我適合借孖展嗎？如果借，你建議借多少%呢？感謝。
龔成老師：
你現時的財富組合，偏重於物業資產，你應該加強翻股票部分，令股票更為平衡。
中石化（0386）雖然都有質素，但不算最高質之列，加上增長力不強，唔值得過多持有。你可以考慮將部部轉為其他股。
至於月供，都是有質素的，但當中有2隻都是保險類，其實，建立一個分散風險的組合，都是重要的。
至於手頭現金、以及黃金，無問題，持有就得。
如何善用你每月的盈餘，將會影響你能否在5-10年內財務自由。
你可以運用「先增值，後現金流」作方法，初期應投資較多增值類資產，之後，則應投資較多保守類項目。例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
你這刻可以集中投資平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。
至於是否加按，只要你將錢，投資於長期增值，穩健的股票，是可以的。由4成加上6成。
不過，在時機上，這刻大市只是合理區，不是平宜區，因此又未必最好。所以，你這動作可以做，但資金不應立刻投資，而是等機會。
同時，加按投資始終有風險，建議你多增加投資知識，在選股、企業估值、投資時機上落功夫，對你長遠財富有好大影響。
------------------------------------------------
Q14671：
你好。本人34歲，儲蓄20萬，可月儲20000。請問三年後目標150萬可行嗎？
暫時打算hkd 10000 儲蓄，另外一萬月供盈富基金可以嗎？
龔成老師：
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。
你做月供股票，每月$10000，集中供盈富（2800），可以的。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
預計你可以累積到$120萬-$150萬，能否上到$150萬，好視乎你在這段時間，能否好好運用餘下的現金，把握投資機會。
建議你多增加投資知識，在選股、企業估值、投資時機上落功夫，對你長遠財富有好大影響。
------------------------------------------------
Q14672：
想請教吓老師，中低風險嘅人是否會比中上風險的投資者更慢做到財務自由呢？
我定自己做中低風險的原因是我家有爸媽，還有一個正讀中二的妹妹。
屋企正在排公屋，不久將來需要一筆約十萬的裝修費，所以我很多時候都不敢投資潛力股，擔心「一鋪清袋」。
龔成老師：
其實不一定，要睇你的投資實力。
因為我見好多高風險的人，反而太進取而輸得多，行得更慢，你穩健，一步步，成功機會高，不過就要用長少少時間。我會建議你「穩中求勝」。
如果你資金在中短期有用，的確不能投資潛力股，你要處理好相關支出先。
你可以在資金中，考慮如果扣起這筆錢後，餘下就可以投資平穩增長股，我相信是適合你的策略。
------------------------------------------------
Q14673：
Hello 龔成老師你好 留意咗你一段時間 我係投資新手 係投資上希望你能比少少意見我 謝謝！
我打算用5萬做中短期投資 係咪同樣需要從平穩增值股+收息股+潛力股入手？
平穩增值股 盈富2800
收息股 深高速548
潛力股 比亞迪 1211
我應該如何分配5萬資金？
謝謝
龔成老師：
首先，我唔建議中短期投資，因為我地買股票就是買企業，中短期的企業發展，好難在股價反映，因此，中短期股價只能受外圍因素影響，比較波動，如可以的話，建議你長線。
另外，初學者可集中投資優質、平穩增長類的股盈富（2800）、深高速（0548）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。盈富是重心。
------------------------------------------------
Q14674：
想問問中國鐵塔788有潛力嗎？
可買入嗎？
龔成老師：
中國鐵塔（0788）有質素的，之前有少少炒概念，所以之前估值有少少貴。
這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。
佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。
考慮到佢的質素、發展能力，這股算是合理區中上部。
由於這股有發展力，可長線。
但如這刻買入，分注慢慢入，可以的。
------------------------------------------------
Q14675：
你好 龔成老師。我常常看你問答教室，完全是一名新手不知應該買邊本書開始參考。所以想請教老師
我是一名教練 今年29歲 月入大概3萬蚊，剛剛2019先開始儲錢每月大概儲15000$ ，現金有20萬。如想3年後有100萬會有可能嗎？
我現在有一份供20年每年5600$的儲蓄保險和一份供20年的醫療危疾保每年12000$。
本人的工作不穩定多勞多得所以很怕有一天因為受傷而工作不了會變成零收入。我現在上班時間大多數在3點才開始，早上很空閑很想做一些網上生意增加額外收入，但還在考慮因為很怕失敗又要重新儲錢再來。
如我想40歲前有安穩的生活的話，現在想買一些月供股票來收息是否應該買一些進取型還是平穩增值的股票？要怎樣分配才好？
麻煩老師
龔成老師：
以你的情況，並行開發其他能力，是重要的，不要只靠單一收入。
我會建議從兩方面著手，第一是學投資，除了有效管理好你的資金外，到你財富不斷累積時，這些資金可以幫你創造一定的收入，對你長遠重要，因此你這刻要好好增加投資知識。
現時你有保險，是打好了防守部分，另外，你都要合理地進攻。
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。
你可以考慮做做月供股票，每月$10000。
你可以考慮盈富（2800）$5000。
另外再加2隻（每隻$2500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。
利用先增值，後現金流的方法，將你的財富滾大。如果要3年打上$100萬，有可能，不過仍要睇市況等因素，我建議你除月供外，加強投資技巧，把握買入股票時機，懂得選股先有機會。
另外，頭先講你有兩樣野要做，令你長遠不要靠單一收入。
第二點，你要做生意，你利用空閒時間，慢慢發展你的生意，利用網上都得，你可以想想你的專長與興趣，這是方向。
如果你怕失敗，可以設定一個資金的上限，例如幾萬，利用網上試，起碼叫行左先。如果你用整個人生的角度去睇，好多錢都唔需多。
------------------------------------------------
Q14676：
我大概一年前買咗呢一隻大中華債券，佢每個月都會派息大概8%左右。我每個月收到嘅利息都會攞去買你介紹平穩增長股票。
你有冇研究大中華債券？你覺得呢個風險高唔高？我都係諗住長期持有的。諗住有穩定嘅現金流再去不斷買平穩增值嘅股票。
定係我應該慢慢賣債券，然後慢慢換返做股票？
龔成老師：
惠理集團的基金，不差的，一般都有投資價值，你可以長線持有。
不過，我未有仔細研究該基金的投資策略，首先，大中華債券可以投資的，但要確認，當中要有「投資評級」（即是BBB以上的評級）。
因為現時有不少債券基金，都話會投資「高息債券」，其實是非投資評級的債券，我地稱為「垃圾債券」。
你一定要睇佢持有垃圾債券的比例多與少，這點才是關鍵，大多反映風險較好，要小心。
第二點，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。你要睇下該基金的策略，是否高風險，如果佢投資策略，炒賣的情況不算多，就可以持有
第三點，佢可能以槓杆去放大回報，以平息借貸去賺取息差，這一定會提高了風險，如果有，比率為多少，你要清楚翻。
我不是說債券基金有問題，只是說明當中的風險，最重要的，這不是保本產品。如果確認上述都是穩健，就可以投資，只要不投資太多就得。
------------------------------------------------
Q14677：
龔sir, 我26歲 有小朋友 ，想儲大舊錢俾小朋友讀書又好咩都好，亦都多舊錢旁身。
現想1月開始按以下組合月供 ，請問適合嗎？
月供完就不能再留現金了，留的現金都是要作年繳保險（約6萬元），這舊錢想在繳費前滾大佢，是否不適合黎個短炒呢 ？
00003 香港中華煤氣 $500
00012 恒基地產 $500
00027 銀河娛樂 $1,000
00066 港鐵公司 $500
01211 比亞迪股份 $500
02800 盈富基金 $3,000
手頭仍有約16萬現金，有機會今年尾用在家庭中，又係想再滾一滾大佢，可以嗎？如是 點做好？
另外 一個月想收息1.5-2萬元，本金要有幾多 買咩收息股先做到？謝謝
龔成老師：
首先，不要短炒，如果短炒可行的話，我一早叫讀者做左，就是我過往做過10年銀行、證券行，見到短炒的，就是輸最多的一群，所以我先唔建議短炒。
如果你月供後已無法儲現金，那麼，你現時手上的現金，就不要再動用買貨。只能憑月供去投資，因為你點都要留一些現金的。
至於上述月供的股，有質素，可月供，長線投資就得。但要提翻，如果你年尾家庭會用盡$16萬現金，令你變成零現金，這這刻月供最好減少少金額，令你可以儲翻少少現金。
如果要一個月有$15000息，即是一年$18萬，假設收息股股息回報6%，你要有本金$300萬。這刻唔好想收息果邊住，集中力量做好「如何有$300萬」先，增加儲蓄，加大投資，提高投資知識。
------------------------------------------------
Q14678：
龔sir, 想請教你，我小朋友5歲，明年升小一，想小一給他零用錢，想教小朋友管理財務，請問應該怎樣進行及教懂他理財觀念呢？
零用錢金額？儲錢目標？ 怎樣運用儲蓄？想買零食或玩具應佔儲蓄多少呢？
謝謝你
龔成老師：
你應該比小小零用錢佢，教佢點樣有效運用錢，可以一星期比一次，每次固定金額，佢用完唔可以再加，等佢為自己的行為負責。
暫時零用錢不要多，集中比佢買零食的。
你可以試下一星期比一次零用錢佢，試一段時間先，然後再從中教佢一些理財知識。同時鼓勵佢有儲蓄的概念，例如可以儲起每星期零用錢某部分，之後就可以買到金額較大的項目。
------------------------------------------------
Q14679：
成哥，你點睇香港電視，配股係咪玩財技？
龔成老師︰
香港電視（1137）唔係算係財技股，佢有實實在在業務需求。集團宣布配股，某程度上反映企業都認為這些的估值過高，是合適集資的時機。
佢業務不斷發展，但現時未到收支平衡，故有一定集資需要，而唔係現財技。
反而，你要留意翻佢有兩點風險。
第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。
另外，這企業現時搞網購，有增長力的，但同時存有一定的未知數。。
佢多年來不斷在燒銀紙，不斷等收成，雖然佢的業務的確增長中，但無人知幾時會有真正的盈利，同埋無人知真正的結果會點。
所以，這股只合小注投資，大手就有少少保留，除非已跌到好平宜的水平。
------------------------------------------------
Q14680：
現年33歲 想開始月供股票。想55歲前。做到可每月有被動收入約2-3萬 現時可月供6-9千左右 應月供投資較適合呢？？
看了你的Fb 。大多你較堆介
2800 盈富
0027 澳門娱樂
0066 港鐵
那我怎樣分配較好呢？
龔成老師：
上述都是有質素的股，同時適合你這個年齡去月供，只要長線進行就得。
你可以供：盈富（2800）$4000、銀娛（0027）$2000、港鐵（0066）$2000，只要長期進行就得。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
55條第1項第2款罰多少錢 在 關鍵3分鐘！如超時「臨停變併排」 罰鍰金額漲4倍@newsebc 的推薦與評價
【東森新聞YouTube會員開張啦】現在就加入》https://bit.ly/3gpoY8w持續追蹤違停的小貨車，被依「併排停車」開罰2400元，但如果當時他停留的時間不 ... ... <看更多>