同「依法施政」嘅政權講法治？
Medium Link: https://link.medium.com/odLdScmaK0
//
唔經唔覺，原來香港人嘅抗爭運動已經進入第五個月。賴叔修讀法律，亦已經踏入第二個月。當我同同學傾偈，講起學到嘅知識，如何套用喺香港當下嘅情況，每每到講到無話可說，同聲一哭。
喺 2019 年 6 月 9 日， 100 萬人上街遊行，當時仍然有所謂嘅「不反對通知書」，大家上街唔使戴口罩。三日後嘅 612 ，大家再次聞到催淚彈嘅氣味，但仍然相信，被捕後只要堅持「我冇嘢講」、「我要見律師」，基本上仍然可以平安獲釋，返到屋企仍然有安樂茶飯可以食。
因為大家當時仍然相信，香港有法治 ( 1997 年政權移交前，講法係「香港有皇法」) 。
去到 2019 年 10 月，警隊已經唔知幾耐冇發出過「不反」，使用過嘅催淚彈同各式各樣嘅子彈，成千上萬。大家上街，即使想戴口罩，亦可能面臨警方引用「禁幪面法」而逮捕。被捕之後，律師唔一定有得你見，返唔返到屋企，亦都已經係一個問號。
唔使半年，香港已經變了樣。變到第三世界國家咁樣樣。
- - -
香港而家嘅狀況係半死不活。換轉係中國大陸其他地方，發生咁嘅規模嘅示威，解放軍老早出動去「止暴制亂」。但係因為呢度係香港，所以仲未出現血腥鎮壓。守住香港嘅，係香港嘅法治制度。
唔好「吓」住。我係話，由於香港喺「一國兩制」之下仍然保留 97 之前嘅法治制度，外資可以繼續香港喺呢個資本主義社會投資，香港依然係亞洲時區嘅金融中心。
但係好諷刺嘅係，香港嘅混沌狀態 (limbo ，唔明嘅睇返早幾年嗰套電影 “Inception” ，香港個陀螺轉到唔識停) ，亦正正係因為法治制度名存實亡。未亡得晒嘅，學立法會議員葛珮帆話齋，有警員「超過十成皮膚受到燒傷」，咁相比之下，香港嘅法治都只不過係死咗八成啫。唔多，唔多。 Not very well done, yet.
- - -
所謂「法治」，香港人，以至國際文明社會嘅認知，普遍係 “Rule of Law” 。以法治精神，喺三權分立嘅原則下，司法獨立，與行政及立法機關互相制衡。「法律面前，人人平等」，我細細個就聽過。
但係「法治」，喺今時今日嘅特區政府以至北京政府嘅角度，係 “Rule by Law” 。新聞成日都有講，「中央政府支持特區政府『依法施政』」。
或者你會同我拗，差一個 preposition 啫， by 同 of ，咪又係兩個英文字母？我小學讀書嗰時，都好多 preposition 可以撈亂嚟用架啦！
喂，你讀書求乸其還求乸其，英文呢種語言相當精準，差之毫釐，謬以千里。何況 Rule by Law 本質上真係有別於 Rule of Law ，唔好聽到政府或者保皇黨日日夜夜將「法治」掛喺口邊，就以為佢哋真係同你咁君子，講法治先得架。
- - -
講白啲，香港嘅法治制度，已經成為咗特區政府嘅工具。就好似一把較剪咁，正常人可以用嚟剪紙、裁布。但係唔正常嘅人，可以用嚟殺人。
港英政府遺留嘅一套「普通法」 (Common Law) ，以案例及對法例嘅演繹、解讀，作為判決嘅依歸。警隊執法，拘捕疑犯，一日未被法庭定罪，疑犯都係假定無罪，理論上唔應該受到任何懲罰。警隊要落案起訴，可以徵詢律政司嘅意見，證據不足或者贏面唔夠嘅，就冇得告。
之但係，喺 2019 年，香港市民見到嘅，係政府有權用盡，警方可以唔守《警察通例》而且冇後果，拘捕示威者嘅時候使用過度武力，帶返警署或拘留所之後濫用私刑，更加係時有所聞。
面對記者提問、受害人挺人而出作出控訴，警察公共關係科嘅回應係乜嘢？叫市民向投訴警察課投訴。即係，我對一間茶餐廳嘅服務唔滿意，我屌柒個侍應，個老闆走出嚟，叫我打服務熱線投訴，而結果投訴由另一個侍應處理？正常情況下，我會選擇以後唔幫襯，甚或上網唱衰間餐廳。但係香港警察，市民有冇得換過隊？好似冇喎。
進一步講，呢幾個月，警員如何稱呼遊行示威嘅市民為「曱甴」，如何毒打一班已經被制伏嘅前線抗爭者，喺傳媒嘅鏡頭下都已經有目共睹。中國古代「官官相衛」嘅文化，嚟到廿一世紀喺香港重新體現，你叫投訴警察課處理警隊 7 月 21 日喺元朗唔見人、 8 月 31 日喺太子地鐵站打死人嘅投訴？就連廉政公署對 721 元朗恐怖襲擊嘅調查都只聞樓梯響，不見人下來，我如何相信投訴警察課會公正處理同僚嘅濫權、濫暴行為？
另一方面，面對唔同立場嘅示威人士，警方執法尺度亦完全係兩把尺。喺深水埗開車撞到途人斷腳嘅的士司機，至今未被落案起訴，連「老不」 (不小心駕駛) 都冇，莫講話「不小心駕駛引致他人身體受嚴重傷害」呢條可以判監嘅控罪。八月份喺將軍澳連儂牆斬人、令女記者肺部重創、一度命危嘅疑犯，亦只係被告「傷人罪」而唔係較嚴重嘅「蓄意傷人罪」。
警隊如何落案起訴？律政司又畀咗啲乜嘢法律意見？喺法律制度及條文下賦予嘅空間，行政機關對於撐警、保皇嘅疑犯寬容，對於異見者濫捕，即使證據未必足夠，亦至少可以拘留 48 小時，落案而不能入罪，亦可以令被告人承受精神困擾一段時間，甚或影響當事人嘅生計，增加反政府抗爭嘅成本，最終形成白色恐怖。
- - -
公務員 play by the rules 、 seen to be done 嘅官僚行事方式，向來都街知巷聞。你做又卅六，唔做又卅六，最多只係無效率。但係警隊同律政司將法律制度視為鎮壓市民嘅工具，行政長官甚至動用「緊急法」呢條本身就範圍過闊、權力過大嘅陳舊法例，去頒令實施「禁幪面法」，就反映咗普通法制度喺極權政府嘅玩弄之下，可以如何誅除異己。
「我哋都係跟規矩做嘢」、「特區政府依法施政」，呢啲說話，而家真係難聽過粗口。規矩本身固然有其彈性，何況執法者有方法繞過或迴避呢啲規則？警員本身唔配戴委任證，普羅市民如何追究？當上水站出現便衣警員、對閘外市民舉強力電筒及胡椒噴霧之後，警方可以揚言「所有警員絕對不會進行任何違法行為」，香港市民又如何相信「永遠唔會錯」嘅警隊會將濫權、濫暴嘅警員繩之於法？
「法治」已經淪為特區政府為香港吊命嘅遮醜布。如果行政及執法機關不受制約，公義又如何得到伸張？當警權無限大嘅時候，一味將法治掛喺口邊，只不過係自欺欺人。
common preposition 在 Pin on Learn english - Pinterest 的推薦與評價
Mar 30, 2019 - 100 Most Common Prepositions List! Prepositions are words which link nouns, pronouns and phrases to other words in a sentence. ... <看更多>