Search
【#Nj短評《#怪誕黑巫后》】
珍惜每次在海運戲院睇戲的機會
擺明係小朋友片，擺明誇張作狀+可愛小動物特技吸客
但我同女版主都睇得幾投入又開心
呢套戲令我諗起上年聖誕RDJ那套幼童級《怪醫D老篤》
定位相近，又係要玩奇怪口音講對白，但今次呢套肯定好睇得多
咁樣怪音講野，其實大人真係唔會覺得好笑，小朋友就唔同
只要你明佢對象唔係你，就會接受
不過全套戲最大粒星Anna Hathaway既女巫look超核突
直頭用恐怖去形容，竟然唔怕嚇親細路…？
我明點解揾佢，無人個口夠佢大
故事簡簡單單，室內搭景+CG搞掂，唔算係咩大製作
叫做輕輕鬆鬆100分鐘，有得笑下放鬆下，我OK
【#Nj短評《#八佰》】 今日正式上，我之前都係咁兒預告過，真係好好睇嘅
又想笑佢係飛機片，又想話我睇紅片，知你地啦
唔敢講話無呢類訊息，但真係已經好soft，仲比上期夠自然嘅《奪冠》更舒服更好接受
何況，佢都無把國軍勇猛魔改成解放軍… 俾足面
係支旗得返青天滿地紅，白日調到好淺色咁囉… 明啦收貨
.
本來我淨係諗住睇氣勢睇技術睇場面，原來仲有埋劇情有埋人物描寫
真係呀，唔係《紅海行動》那種面目模糊，死咗都唔知邊個無感覺嘅麻木
今次主力聚焦起碼有十人，個個都認到，個個交到戲，有角色成長，有生有死有傷有故事
唔係下下講打講殺，仲有啲反戰想逃走，人性睇到晒
人物有血有肉，要平衡動作同文戲，真係唔簡單
.
超過兩個半鐘秒秒精彩，打得勁，壯烈，睇到喊都無作大
玩攻城，玩刺殺，玩毒氣，玩心理戰，場場精彩
呢場仗個時代背景，對岸租界歌舞昇平，自己呢邊等死
幾大對比，幾咁絕望，發展到隔岸民眾用盡方法幫手…
套戲真係唔係淨係講打，係講嗰種齊心嗰種每人出少少力嘅強大
我諗起上年至今嘅香港，真心好似，唔係抽水
.
呢篇短文只係一個引子，希望吸引到你放下成見俾個機會
邊個角度去睇都會覺得正
而我地有版友們睇完套戲，忍唔住出力幫手寫文推介
佢地寫得好好，好詳盡好多歷史虛實互對
會未來一個星期分享俾大家，再同大家討論下
【#Nj短評::〈魔髮精靈：唱遊大世界〉】
開頭連續10分鐘都接近冇故事瘋狂起舞唱歌，好笑又開心。冇睇過上一集比較唔到，不過應該唔會叫人失望，角色設定以及世界觀都極具創意。
.
故仔雖然又係講細路都覺老土的和而不同道理，但用音樂發展史中不同流派分支去包裝故事中的種族鬥爭其實好有趣，呈現了活生生的文化現象。
.
作為一部以愛音樂為主題的電影，不同種類、時代的樂曲特色於故事中透過用心塑造角色造型、對白、行徑去表達，又反映樂迷之間互相抗拒，這些只有成年人先有能力去理解。
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你起頭！
