【乞人憎？】每個人一生中總會遇上好多乞人憎嘅人，而且人越大，唔知係咪要求高咗，好似遇上嘅就越多。有時我心諗，點解乞人憎嘅人唔覺得自己乞人憎，究竟係咪我自己嘅問題？不過每次咁諗嘅時候，我都可以好快從周邊嘅人得到答案，因為呢類人都有一啲共通點：喺群體裏面都係佔少數、所作所為都唔係根據原則或道德標準、做事隨心所欲、唔顧其他人感受。我講緊嘅呢類人，並唔係罪犯，反而佢哋就係按住一個大原則做事，令自己問心無愧：我都冇犯法！但係偏偏就係呢五個字令到佢哋更加乞人憎，因為大家都奈佢哋唔何。
我試過瞌埋眼幻想自己做咗一個乞人憎嘅人，腦海中模擬自己做晒所有平時唔會做嘅嘢，包括：隨地吐口水、大大聲講粗口、打乞嗤唔掩嘴、逼人食二手煙、煙頭隨處扔、排隊打尖、買嘢同人鬥搶、揸車唔打燈隨意cut線、攞袋一個人霸幾個位，上網攻擊同自己意見唔同嘅人、帶隻狗隨街屙屎屙尿唔清潔、笑淫淫周街𥄫女、唔跟燈亂過馬路、垃圾周街扔、對侍應呼呼喝喝、坐喺人隔離不斷䟴腳、超大聲打喊露、凌晨時分係屋企大大聲唱卡拉OK、搭飛機除咗對鞋楝起隻臭腳、疫症期間唔戴口罩周街逛、凡事輸打贏要自己利益行先⋯⋯(睇次序就知我幾隨心所欲)，發覺原來做一啲明知自己唔啱但係想做就做嘅行為，真係有一點點嘅爽，爽就爽在唔使負責任，唔使理人感受。但係當我一諗到如果俾我遇到一個咁樣嘅人，內心不禁無名火起，之前遇過嘅畫面又再重現腦海，發覺自己都係做唔到呢種人，畢竟人類一步一步走向更文明，尊重別人權利及做個對社會有責任感嘅人正是文明嘅表現，而顧及他人感受亦是友愛的展現及公民責任的基礎。
所以，為咗令呢個世界美好啲，令到自己生活得開心啲，我除咗選擇唔做呢種人之外，遇到佢哋最好避之則吉，千祈唔好浪費時間、心機企圖同佢哋對質，希望佢哋明白及改變。因為當你遇上一個咁樣嘅人，而你太上心的話，糾結於佢哋嘅歪理上，隨時破壞晒你一整天或更長時間嘅心情，倒不如好好珍惜每一分時光，愛惜你身邊嘅人或寵物，為社會做更有意義嘅事，多點發揮正能量。
我寫咁長你都睇到呢度，唔知你係咪身同感受？係嘅話不妨留言分享你嘅慘痛經歷，原來寫咗出嚟個心舒服好多。一個post兩個用途，今日覺得自己總算做咗一件好事。
#乞人憎 #英文點講
#patpatEnglish
#PatrickSir #HKEdutainer
Produced by Giraffe International Productions Limited
Supported by EDFLOW-Education & Party Baby
