［點解業績好股價反而勁插？］好簡單，你肯定份業績真係「好」？有冇望過下半年同上半年有乜分別？
TLDR：就算你當下面呢堆係廢話都好，至少出業績後我極有信心話你知，股價必然大插，冇馬後炮。記住，股票係炒未知嘅嘢，就唔好飛機乜嘢「全年轉虧為盈」。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，已成失業人士。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80
＝＝＝＝＝＝＝＝＝＝＝＝＝＝
1. 有人問，出完業績，都跌咗兩日（第一日11%，第二日5%）先嚟講，做乜？唔見你之前講？事後孔明。差矣，首先，點解唔之前在FB出Post？因為忙，同埋第一日插完11%，咁驚第二日彈返嘛，到時篇文又 「過時」。到跌完兩日，就放長週末，咁唔使趕啦，都未開市。
2. 最重要係，邊有馬後炮？有圖為證，一出業績嗰晚我就在Patreon講啦。咁當然係嗰邊啲讀者優先。寫明估大插的，有冇點你？
3. 但，除咗用嚟鳩威，亦都有其他嘢。至少呢個例子好見到啲股票嘅基本嘢，示範下初級嘢畀你睇，順手等你訂Patreon學埋中級班。
4. 首先費事啲盲人唔知，本人稱得上係王維基嘅瘋狂fans，舊文寫過我20年前去佢公司見工之類。然後，我亦曾經好睇好呢隻股票，Exactly 一年之前嘅4月6日，我在明報寫過《匯控已死 維基當立》（不過匯控冇死到，所以都係唔好短倉，後話），當時疫情已「遍地開花」，HKTV（下稱1137）已炒咗轉，仲趁高批埋股（醒目！），網友係咁鬧，明顯連公司上司係為乜，股市係用嚟做乜都未知。而當時本人力推公司，當時股價係5蚊，之後見過17蚊，而家都仲有11蚊。但，我有碗話碗，出完業績，覺得唔得，咪話唔得。唔通死頂？因為鍾意佢所以係咪都會話會升？因為覺得佢掂所以係咪都會話升？咁寫嚟把撚咩。我錄段音畀你每日聽得啦。
5. 咁但，業務不等於佢個人（雖然好大程度都一樣），股價亦不等於業務。冇錯股民係短視的—但，可以一秒N咁多個交易，梗係短視啦。你有冇買其他嘢會一秒鐘個價變咁多次？記住，股價唔得又未必等於業務唔得，業務唔得又唔等於CEO唔得（你睇Jack Dorsey同時做Twitter同Square CEO ，股價爭幾咁遠）。最重要係，你地做呢啲比較時，要搞清楚個time horizon。股價反映乜？視乎你講幾耐嘅股價啦，呀畢菲特師傅話齋，短期係 Voting Machine（即係你啲識兩句網友講嘅「供求」，講咗等於冇講，點解升？因為升咯），長期係 Weighing Machines -（拿，「供求」呀。但點解長期有需求？）。
6. 順帶一提，嗰啲成Q日講咩「股市同實體經濟表現脫節有問題」嘅，亦係犯呢種錯誤。已經寫過十幾廿篇文恥笑。我好奇怪，2020年後仲有人可以拎呢句嘢出嚟講。股價每秒鐘咁變，你啲乜七經濟數據N咁耐先出嚟，我使唔使等2010年9月NBER出嚟宣佈衰退結束，然後大家先好似香港重光咁爭相通報「嘩衰退結束啦」然後股票先升？你覺得個世界係咁運作嘅？
7. 但由呢點去開始討論都可以，股價反映嘅係乜？經常我都講一句（實情好多人都講，對行家嚟講呢啲真係常識），股票係炒將來炒前景嘛。但，真係要做哲學家，咩叫「將來」？冇你諗咁簡單
8. 上星期在小炒王嘅節目講開，好多觀眾奇怪，點解好多時啲業績好反而股價跌，業績差反而升。咁除咗股票有時就唔講道理，或者有啲人都識講嘅「好消息出貨」外，有冇諗過，咩叫「業績好」，咩叫「業績差」？
9. 有啲人以為，哦，盈利升100倍就係業績好，轉蝕錢就係差。真係？不如諗下，好多公司（例如國泰），係咪出業績嗰日先知轉蝕錢？如果一早知道蝕嘅，點會出業績先插？一早就大插啦。
10. 你見鬼佬台（叫你睇少啲垃圾評論架啦）報業績，都必要會講收入升幾多，同埋，分析員預期幾多。呢樣先緊要嘛！另一金句：只有好過同差過預期，冇好壞。但1137可能都冇乜分析員跟，不過冇所謂，照解。
11. 嚟啦喎，我見1137出業績，有啲仲喺度飛機，包括飛機王維基親自寫嘅主席感受（係好睇，可惜，無助股價嘅，除非佢開個Patreon寫文），或者飛機公司改名（同上）
12. 但最不知所謂，莫過於飛機公司「轉虧為盈」，修成正果。好啦，要爆粗啦，我仆你個街，早兩日偷渡落嚟的（歧視是不對的，我阿爺都係偷渡）？人地半年己經一早轉虧為盈啦，鳩唔知全年賺錢咩！除非你覺得下半年會輸錢，仲要輸突（咁就多災多難）。
13. 實情，即使係舊年上半年，都唔使去到出業績先「發現」，因為公司一早出咗盈富。拿，炒將來呀。到出業績時，已經人人都知。（又話實，做乜今年全年業績冇出盈喜？）
14. 頭先講個，股價係反映將來。正式啲講，係反映「未知嘅嘢」。股價，就係incorporate 所有人人已知嘅information，同埋所有人嘅期望（當然有唔同權重，你以為公司賺100億最後佢冇，係唔會影響股價，除非你係大基金），亦即係類似「人類智慧總和」 嘅概念。
15. 你話，扯，「未知嘅嘢」，咪即係「將來」。差矣。以前講過，鬼頭老細對於某啲用字好執著。例如我地報告寫2021嘅純利（預估），咁就2021F啦，forecast。但例如2021年2月，我估間公司嚟緊出業績，2020呢，就不能F，要E，係Estimate．因為當時2020年已過去，只係你未知盤數
16. 我要講明，呢個係佢個人嘅強迫症，我見好多其他行都唔會咁。但呢個例子話你知，「未知嘅嘢」同「將來」未必係同一回事。例如港交所咁，日日你睇到有幾多成交，根本佢啲收入就冇咩好大秘密。又或者，1137咁，個個月都話你知啲生意數，咁生意一差，股價即插，唔使等開業績先知。
17. 但同樣地，所以你話「股價炒來將來」，「點解出啲舊績績又會影響股價？」。就係以上嘅原因。因為「業績」雖然係舊嘢，但真係未知嘅嘢。
18. 好啦，哲學咗一輪（但很重要），講實際嘢啦，反正呢啲好簡單。上半年公司賺1.1億，全年轉虧為盈，多撚謝喎，但邊個唔知？全年純利1.8億喎，即係下半年純利7000萬。
19. 用你嘅常識，覺得呢個業績得唔得？仲唔明嘅，話多兩句你知。Suppose呢隻係疫情受惠股，咁疫情都叫做2月先全面爆發。正常期望，都覺得公司下半年好過上半年吧。再加埋，公司會有自然成長嘛，仲要cap咗舊錢嘛。（再講盡啲？我話你知，下半年日數係多過上半年的！7月大8月大！）。
20. 點知，上半年賺1.1億，下半年先賺7000萬。其實成個Post幾千字，講呢句已經講完啦。你飛機嘅，係「全年轉虧為盈」，但現實係「下半年盈利大跌」，你話觀點與角度半杯水？Nonononono，你「全年轉虧為盈」呢個資料係廢嘅（除非係全年賺10億），完全零價值。咪講撚咗半年賺錢咯。
21. 唔止，細心啲睇，睇埋政府補貼（希望我冇睇錯），上半年佢收咗1630萬，下半年就收咗5460萬。好啦，當然不能就咁減，但大約，扣走呢舊。上半年就賺9370萬，下半年就賺1540萬，你覺得點？
22. 所以，你飛機「全年轉虧為盈」，我就話「下半年唔計政府補貼近乎冇錢賺」。是有點偏頗，但肯定呢個先係有用嘅資訊。（同樣地，寫TVB我都寫過，佢全年蝕錢唔係重點，下半年轉賺先係）
23. 細節可以好多講，但個業績真係唔多掂，其實你睇舊年下半年啲訂單數字都麻麻地，甚至今年出嘅數都麻麻地，要達到佢地自己嘅目標，都有啲難度（舊年就輕易達到，仲中途上調的，時勢做英雄）
24. 業績最大亮點就係公司財政好穩健，唔好再以為咩「爭人好多錢」，如果我冇睇錯，銀行貸款係……零。Net cash 9億幾！唔怪得王維基都吹話有機會派息。拿，咁又唔同講法。9億net cash，一股派1蚊呀！十厘息呀！（但當然唔會發生）
25. 好，講到呢度，真係要講返，呢啲只係case study，同公司嘅前景，可以係全無關係。首先公司總會有順境逆境，另外，就算公司一路都順境，股價都可以大上大落，咁而家呢兩日，就反映個業績啫，咪話股價炒前景，好快就會睇另一啲嘢。例如乜？例如公司3月嘅數，應該呢幾日會出。亞馬遜2000年都高位跌九成幾啦，然後咪又升返幾百倍！王維基當然係有計之人，一次業績唔掂，唔等於公司之後都唔掂。但都係嗰句，有碗話碗嘛，咁呢兩日，個股價當然係睇你業績啦。唔明嘅，將呢篇文由頭睇多次啦，time horizon嘛。
26. 最後一個可能好多人睇到四份一已經想問嘅問題：喂，咁知呢啲嚟，有乜意思呢？又唔係有錢賺到。
27. 的確，正常呢啲，係唔會賺到錢嘅。冇錯，我係業績後已經話大插，但已收市嘛。第二朝就即時低開架啦。等於你睇完個業績知道勁，多數都賺唔到錢，因為第二日已經大高開啦。你估得你一個知咩（但，如果啲股票冇乜人睇，個股東／莊家又唔太狗嘅，就有機會）。你話除非我業績前兩日就知，就有用啦（好似犯法的說）— 不過即使係咁，都未必有用，好消息都話可以入定貨。壞消息呢？散戶好難做沽空喎。
28. 咁但，仲知嚟做乜呢？就真係都有用嘅。首先，你會知道個世界係點運作的。行家當然恥笑我咁嘅嘢都寫幾千字，但，大佬，有好多人真係唔知架。證據？咪就係仲有好多人出嚟問「點解個業績咁勁都會跌」（唔止呢個case）。咁你至少，而家知道咩叫好嘅業績，咩叫差嘅業績，同埋股價反映緊啲乜。
29. 第二，有時真係有用的。因為可能隻股票真係冇乜人睇，或者明明個業績好但因為其他嘢忽然無啦啦跌，咁你咪可以有信心買。但如果你連業績好定差都唔識分嘅，邊敢買？你仲以為因為業績差而跌添
30. 不過啦喎，中級班話你知，有時呢啲嘢真亦假時假亦真。真的，股票可以升／跌到你Literally懷疑人性。就舉一個例，你以為個業績好勁，點知出嚟股價勁插，開頭你可能諗其他原因，「個market 睇錯」，你仲係咁叫人買（做分析員的話），甚至自己係咁買（做基金經理的話）—然後隊多幾日，我包你懷疑人生，一定覺得自己最初分析錯，或者有啲嘢係其他人知你唔知。See？就係咁矛盾，同一單嘢上面，幾日前你覺得「個market 睇錯」。但隊多幾日你就覺得「個market 唔會死錯人」。情況同人生好多嘢都相似的，好似避開人群行捷徑咁，開頭你梗係爽，見到少人更加爽 —但，如果一個人都見唔到，你反而驚，係咪自己先係錯嗰個？
31. 仲有，都未講另一樣重嘅嘢（留返下次講）：你個股價在咩位，都影響股價反應。殘到仆街嘅，往往百毒不侵，出點爛（真爛）嘅業績都冇事甚至升，貴嘅就相反，明明業績勁，都頂唔住。現成例子兩個，首先，一樣係嗰日出業績嘅中銀香港2388，我一樣話大插，原因亦差不多，但留意中銀香港股價都在高位，更加脆弱。例子二？過去兩三季堆大型科企，FAANG 同阿里巴巴騰訊都係，明明業績好過預期，股價都照跌的，因為炒得太衡了。
32. 拿，咁又醒咗4000字畀你，抵訂Patreon啦。我啲讀者當晚就已經知呢啲嘢。我仲寫埋中銀香港.，仲寫埋其他嘢。
33．搵日得閒寫埋王維基啲option，但會唔會too personal？
＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折
＝＝＝＝＝＝＝＝＝＝＝＝＝＝
voting machine 在 Voting machine - Wikipedia 的相關結果
A voting machine is a machine used to record votes without paper. The first voting machines were mechanical but it is increasingly more common to use ... ... <看更多>