《糖尿》
♂：早晨
♀：早晨，尋晚我見到有對情侶當街嘈交，我真係唔明點解要搞到咁，其實唔肉酸咩？
♂：你之前拍拖未鬧過交咩？
♀：認真，真係無
♂：咁你地有衝突既話，會點做？
♀：講完就算，聽就聽，唔聽咪算，做乜要鬧交？
♂：咁你都幾男人
♀：下……關男唔男人咩事，我只係覺得鬧係無用
♂：最好既關係，係大家發現問題，然後解決問題，要鬧交，即係兩個人搵唔到平衡點，然後情緒到就爆發
♀：我睇得好簡單，接受咪繼續一齊，接受唔到咪分手，鬧交係最無用既行為
♂：所以你係唔會鬧交
♀：係，你係咪好喜歡鬧交既人？
♂：我都唔鬧交
♀：咁如果我地一齊，應該會幾好笑
♂：話唔定我地會對對方無不滿，成世都唔鬧交呢
♀：童話故事都唔敢咁寫
♂：唔知點解我對住你，係無不滿既感覺
♀：我都係，最多都係失望同唔開心，但我唔覺得有不滿
♂：咁你要唔要試下同我一齊？
♀：見完面你再講啦，一陣你見到我，即刻想同我做一世朋友咁就無謂啦
♂：其實我有好深近視，我可以一直都唔戴眼鏡，世界有時睇得無咁清楚都幾好既
♀：我怕你到時望住我唔想貶眼啊！
♂：你知唔知係我心目中你係點？
♀：點，我拎左紙筆出黎喇，你講，我記低
♂：好似阿儀咁
♀：哦，好，阿儀咁，我記住喇，你以後成世都要為你講過既野而受罪，到時唔好問點解
♂：我可唔可以叫你阿儀
♀：你喜歡
♂：阿儀，我愛你
♀：七師傅都愛你
♂：係呢，你拍過幾多次拖？
♀：一次
♂：比我想像中多，阿儀應該仲係A0
♀：你呢？
♂：三次
♀：比我想像中少，我以為你靠把口都可以呃到好多女仔
♂：我可以，但我為免生靈塗碳，封印左自己既能力
♀：炭啊天才
♂：係係係，哈哈，我捉人錯字捉得多，比人捉既都係第一次
♀：平時見你嘅哋㗎我都無出聲，你仲唔快少少多謝我
♂：多謝！
♀：乖，我係咪好好？
♂：你好好啊，所以我咁鍾意你
♀：唉，有時個人太好都係一種煩惱
♂：你怕煩既可以只對我一個好
♀：好啊，你為免生靈塗炭的話，亦可以只禍害我一個，我不入地獄，誰入地獄呢
♂：喂，我屋企有家族遺傳病
♀：咩病？
♂：糖尿病
♀：哦，所以你嫌太甜係咪？
♂：呃……唔係咁既意思，我係指你好甜
♀：為左令你唔好病，咁我唔咁甜囉，你呢種人唔吃苦都唔安樂，我成全你！
♂：喂，唔好啊！
♀：我比機會你兜，睇你引以為傲既語文能力有幾多料喇
♂：我做運動！
♀：？
♂：糖尿病患者做多少少運動可以分解糖份
♀：咁你打算做幾多
♂：我諗遲少少可以參加三項鐵人
♀：好，比你過關
♂：你真係好好
♀：有咩好？讚美既說話我從來都唔抗拒
♂：你係少有收放自如既人，好多人放完成後唔知邊個位應該收，但你好識比下台階我
♀：呢層同一開始個問題係一樣，我點解要令我喜歡既人難堪呢？
♂：你講得輕鬆，但唔多人可以做到
♀：麻煩你好好珍惜我
♂：我一直都有
♀：同你一齊係幾開心既，好喇，你都好好休息
♂：好，你都應該攰，早少少訓喇，晚安
♀：晚安
♂：其實……係隔離酒店，我真係唔攰，但我知你攰，所以你訓啦，我會好好掛住你
♂：我希望我地可以一直都好似依家咁
♂：同你一齊，我好似呼吸每一啖空氣都比以前開心，真係晚安
♀：仲諗你會打到幾多句，點知得三句！我都掛住你，真係晚安
——
長傾·不見 第一回 @筆友
https://bit.ly/LongchatEP1
長傾·不見 第二十六回 @星座
https://bit.ly/LongchatEP26
好久 不見 第一回@久違
https://bit.ly/LongtimeEP1
好久 不見 第四回@離婚
https://bit.ly/LongtimeEP4
