《為何不浪漫亦是罪名》
返到香港，心思思想執下個書櫃。跟住見到一大堆自己寄畀自己仲有朋友寄黎嘅明信片。跟住就掛住睇，唔記得左執書櫃。睇下睇下，中間都夾住左d大地之子寄畀我嘅聖誕卡同生日卡。睇返覺得好搞笑，佢通常寫得好簡短同敷衍😂因為每次都係我厚住面皮同佢講記住寄生日卡同聖誕卡畀我。佢就會臉有難色：「但係我唔識寫信架，唔知寫咩好。」枉我每次寫親畀佢都唔夠位仲要加紙XD 所以佢為左令張卡睇落無咁空，會畫下畫，通常會畫我最鐘意嘅小丸子，有年聖誕佢問我想要咩聖誕禮物，我講笑話要鑽石，佢就好認真咁去買左把間尺畫左粒好工整嘅鑽石💎畀我，我好滾動😂近年佢仲學識寫大大隻中文字，可惜quote 錯歌詞，首歌寫畀媽媽架wor。其實大地之子真係一個不懂浪漫嘅老實人，佢唔太識講甜言蜜語，我同大家分享嘅浪漫小故事真係萬中無一，我已經無乜貨啦，完架啦🤣所以今日想同大家分享佢不浪漫的故事，有大把貨🤣🤣🤣🤣
一.世界末日到了嗎？
記得有一日佢放工返黎，佢同我講：「有人話今個禮拜六會世界末日。」咁我就情深款款咁望住佢：「咁世界末日前你想做咩呀？」然後我諗住佢會講d浪漫肉麻嘅野：「雖然不能同月同日生，但願能同月同日死」又或者：「要擁抱到末日。」類似d咁嘅野啦下。點知大地之子講嘅係：
「我一定要喺世界末日之前激嬲ABC(係佢朋友，我畀個代號佢😂），琴日打機嗰陣佢好唔合作，搶晒我d武器，我地明明係同一組（下刪一千字）激到我死！世界末日前我要激返佢。」
我用左15分鐘聽佢講，然後我開始見到幻覺，好似王傑喺我身邊飄過，唱住：「為何不浪漫亦是罪名～」
完。
二. 大地之子的邏輯思維
未搬去法羅群島之前，我同大地之子晚晚都會video chat，但係後尾佢搵到份工，佢放工已經係香港夜晚11點，到左冬天時差仲多左一個鐘，佢放工已經係香港12點。有時真係等到好眼訓，有時第二朝仲要返早，5點就要起身。其實大地之子返工時間好彈性，如果佢早一個鐘返工就可以早一個鐘收工。於是佢自己就提出早一個鐘起身返工咁我就唔使等咁夜。但呢個方案實行左一個禮拜，佢又忍唔住賴床。咁我就扮嬲，嚇下佢。我就同佢講：「你做唔到就唔好應承人啦。」佢嚇到三魂唔見七魄😏😏😏 我問佢：「咁你以後會點？」咁當然我又有幻想嘅model answer :「我以後應承左嘅野都會做到。」咁又當然有獨特邏輯思維嘅大地之子有獨特嘅答案：
佢好認真思考完🤔然後用好真誠嘅眼神望住我：「放心啦，我以後唔會應承你咁多野，咁我守唔到承諾嘅機率就會降低。」
重點佢當下係認真答，唔係講笑。我好似彷佛見到王傑又出現啦：「為何不浪漫亦是罪名～」
完。
三. 預早知道的驚喜
話說今年去台灣嘅時候，我地慶祝週年紀念，佢想畀個驚喜我，於是就偷偷搵左間餐廳，卜左位。然後一切都好順利，直到間餐廳覆左佢。點知，間。餐。廳。用。中。文。覆！於是佢想搵人翻譯，當然最方便嘅翻譯方法就係...當大家都諗緊google translate 嘅時候，大地之子當然唔係一般人嘅思維，佢選擇左最方便嘅中文人肉翻譯機，即係我呀！☺️佢轉寄左封電郵畀我。我一睇：「先生，請問你慶祝週年紀念需要我們的特別服務嗎？！們有特別的餐牌可以印上你女朋友的名字。」然後我同大地之子講：你回覆唔使啦😂😂😂
王傑又喺伸展台彈出黎：「為何不浪漫亦是罪名～」
完。
其實我諗我就係鐘意大地之子嘅直線單純思維。佢諗野好簡單直接。一開始都會期待佢會畀d驚喜我，但到後尾了解左佢呢個人之後，反而佢做少少野已經好感動，因為佢做少少野其實已經花左佢好多心思。張卡粒鑽石佢真係買把間尺好小心度住黎畫，寫句中文歌詞對佢黎講都好難，佢要好小心咁睇住d筆劃黎寫，佢練習左幾次先寫喺張卡。仲有如果大家記得我件山寨小丸子Tshirt，佢都花時間上網搵架。所以有時唔好淨係睇個結果，當你用心了解一個人嘅時候，你知佢為左呢個結果做左好多野，可能份禮物或者驚喜不盡人意，但係要識得去欣賞對方做嘅野。同埋大地之子同我講過：「我係男仔，有時諗野無女仔咁心思細密，但係你有咩唔開心或者有我做左令你唔高興嘅事，你要直接同我講，我一定會改架。」呢樣野佢真係講得出做得到，我而家真係咩都會講出黎，唔會收埋收埋，反而大家關係仲好左。如果對方真係著緊你，佢真係會用心聆聽同記住架。所以到而家每當大地之子做左d想浪漫但失敗嘅事嘅時候，當下我都會踢走王傑，然後直接同大地之子講：「你真係一個好唔浪漫嘅人，但係好得意，我鐘意😌」
---------------------------------------------------
想睇更多法羅群島靚相同我同大地之子仲有魚蛋嘅日常大小事，請follow ig: whereisfaroeislands
https://www.instagram.com/whereisfaroeislands
abc歌詞翻譯 在 【英文兒歌】ABC Song 字母歌｜English Songs for Children ... 的推薦與評價
YOYO點點名最新完整版▻▻https://bit.ly/2kvCN9L【ABC Song 字母歌歌詞】A - B - C - D - E ... ... <看更多>