《踩低別人不會讓自己變得高尚》
曾經我都係一個藐藐怪，尤其係讀緊中學嘅時候，咩都鍾意藐！E-kids、余文樂、陳冠希我藐佢哋太MK，去到飛輪海、棒棒堂我更藐，之後到韓風一樣藐。唔知道哪來嘅自信去藐人哋，但嗰陣根本未了解過對方，就直接拒絕，直接藐！
後來我終於搵到自己咁鍾意藐人嘅原因。大概都係源自於自卑嘅心，以為藐人哋、貶低人哋就可以抬高到自己。笑人哋MK笑人哋柒，笑完仿佛覺得自己比對方高一層次，仲有種自命不凡咁去睇唔起其他人。
去到近年有身邊朋友話好鍾意姜濤，我都係百思不得其解，但我無再好似以前咁藐咗先，但完全係零興趣，完全無法理解。去到再後期，慢慢分別喺唔同渠道認識到Mirror同Error中嘅個別成員，開始覺得佢哋又幾有趣，慢慢開始睇Error，再慢慢開始睇番造星一。
本身我最想藐保錡，由外型已經係我好鍾意藐爆嘅死MK，到負面新聞，更加覺得毫不討好。但睇完Error遊，我最鍾意嘅就係保錡，好鍾意佢嗰種MK仔嘅衝動、勇敢同義氣。佢跳唔到笨豬跳，我同佢一齊喊㗎，因為我自己都係好多野驚，驚玩過山車驚高驚死，所以我見到佢咁驚都可以企出嚟試，我覺得佢已經夠盡力。
然後再睇番造星一，我終於明白點解身邊有啲朋友三十幾歲人，仲咁瘋狂追星。好多時我哋藐人都係覺得人哋不勞而獲、人哋唔夠好、人哋憑咩。但原來有好多人並唔係一行出嚟就做咗明星，好多人係靠比我哋呢啲平凡人用多咗好多倍嘅努力同付出，先行得上今日嘅地步。
藐人真係好易，但後來我發現藐人亦都好幼稚。踩低別人，永遠都無辦法可以抬高到自己，只會令自我感覺良好，以為自己企高一線。但現實係你只會令自己變成井底之蛙，攬住自己同自己圍爐，脫晒節仲沾沾自喜。
長大了我學識咗去欣賞別人，明星好、藝人好、KOL好、又或者係身邊嘅朋友都好，唔好再急住去踩低對方，唔認識就少作評論，唔認識呢個世界新興嘅人同事就要嘗試去認識，如果唔係好快會同後生仔斷層，去到40歲仲以為自己後生仔，好型In Ray，到時自己柒咗都唔知。
Anyway，雖然我支持保錡，但始終最鍾意Edan同AK，唉，內心都係外貌協會。Sor9 Poki 吳保錡
IG：@hkgirlfriend
FB： 港女友 Hong Kong Girlfriend.
ak女友 在 林愷鈴《繩角》飾江𤒹生女友讚AK粉絲有禮貌 的推薦與評價
談到在劇中與MIRROR成員江𤒹生（Anson Kong，AK）演情侶，林愷鈴被問到 ... 林愷鈴《繩角》飾江𤒹生女友讚AK粉絲有禮貌｜蘇麗珊表示其角色性格冷血有 ... ... <看更多>