［觀自在］吳清源，殘劍，358
唔寫政治唔寫金融唔寫職場，寫自己。其實最最最初我就係寫自己，寫得都幾好，但被朋友批評話，其實我寫自己真係好叻，但唔識代入人地心態去寫其他嘢。所以玩唔到RPG，扮唔到女人，亦都做唔到編劇。如是我聞。
我亦發現，同其他作者有啲唔同，我寫自己，係特別多人睇嘅。咁做乜仲要寫啲咩八爪魚眾數係乜（http://bit.ly/2MUzolH），雞煲分析（http://bit.ly/2MW4edX）之類？
簡單。李敏（係呀，嗰個李敏，上次寫Both Side Now寫過佢（http://bit.ly/2MQBGSL））有本書叫《港島之戀》，認真麻麻，但講個主角（劇透了）原本都係不屑建制，最後都係讀書做律師。點解？因為佢知道，唔係人人講嘢都有人聽，佢要搶咗嗰個位先。我寫八爪魚雞煲等等，都係咁嘅原因。否則，識我老鼠，邊個會聽我嘅故事？除咗本身啲朋友。
置地記者寫過《吳清源》（http://bit.ly/2MXkz1N），套戲，我估並唔係太多人留意嘅一篇文，但觸動到我。我估對作者嚟講，一篇文觸動到一個人，已經係成就。
我在自己Facebook寫上寫（http://bit.ly/2MVprV2），是為First Derivative（置記好似文科人？）。全文如下，修改咗少少：
「
置地記者 寫過 《吳清源》。我都睇過套戲，話我壞品味都好，都係要講，係催眠妙品，藝術嘅嘢真係識條鐵。我理解個主題係，一代大師，點樣在中日衝突，世局搖盪中，話知你出面點打，有乜恩怨，大是大非，關我鬼事。佢專心於十九路棋盤，自己嘅小天地，搵到內心嘅寧靜。換著而家就當然係日豬台豬
正如黃念欣之前寫，六四時，亦舒照樣個個星期寫賈寶玉寫英式下午茶寫點退休。
亦都正如我而家都係寫人地寫吳清源，寫下其他人點細細個睇我嘅稿大，或者係Elon Musk 冇收入點過壓力測試點買樓，巴西人點樣好鍾意開刀生仔之類。
應該講過廿歲前成日想死，廿歲後冇呢啲念頭。首先開始做嘢就死都唔得閒，二來廿歲初嘗雲雨（即係，第一次扑嘢），驚歎世間有咁美妙嘅事，幾乎信咗教，覺得造物主好偉大。自瀆雖則都爽，但同真嘢都係爭太遠太遠。
其實就係伊比鳩魯，有吃喝玩樂咁爽，做乜要死。咁多書未睇咁多地方未去咁多好戲，咁多傻仔畀你恥笑（例如有人話狙擊港元系統已經有初步勝利），邊捨得死。真的，有書睇有文寫，就已經好夠。仲有傻仔笑，不用再強求乜。
傳說中該學派居於他的住房和庭院內，與外部世界完全隔絕，因此被人稱為「花園哲學家」。據說在庭院的入口處有一塊告示牌寫著：「陌生人，你將在此過著舒適的生活。在這裡享樂乃是至善之事。」
」
________________________________________
而家寫上寫上寫，comment on comment，second derivative．
就係講返，《英雄》呢套戲。值得睇，冇睇過記住搵嚟睇（http://bit.ly/2N5Apay）。忙嘅，只睇呢段「谷阿莫」式嘅分析都不錯（http://bit.ly/2MVQRdI）
我知，維穩擦鞋嘛，支持暴政嘛。肯定。當年都好多人鬧，而家更加係。但你知，我個人鍾意睇能力多過立場。佢維穩擦鞋歌頌暴政，都歌得好高質。
留意埋個時代背景，中國入世貿不久，當年好似都仲未咁自信咁霸道，而亦都仲睇下你香港人面色，你睇演員就知。套戲，唔算叫好，冇乜國際大獎，但十分叫座。真係全世界咁上，睇到鬼佬眼都突。咁撚勁嘅？
劇情，係犯駁的。大佬，秦王最初做乜諗埋啲咩十步對飲嘅白痴嘢啫，賞層貝沙灣畀佢加埋章子怡任砌一世咪得。但聽故唔好駁故。順帶一提，戲入面砌章子怡嘅係梁朝偉，唔係「主角」李連杰。然後在《2046》，梁朝偉再砌咗章子怡好多鑊（亦有人話係掉轉，你有睇套戲就明）。靚仔有著數。
即使最苛刻嘅評論，都不能否認，啲畫面拍得好靚！顏色靚，取景靚，選角亦都無敵，係殘劍啲鬚好撚鹹濕咁解。仲有，王菲嘅歌好好聽（http://bit.ly/2MWmmV1）。我好後悔當年其實並唔係特別佢嘅歌迷甚麼，演唱會都冇去過。
但我其實想講嘅係，下面呢張張劇照。
天地良心，置地記者寫吳清源之前，我都用過好多次《吳清源》呢個題。情況，都係你懂旳。出面紛亂，腥風血雨，世局搖蘯。但有人都係照搵心中嘅平靜。
六四時，亦舒照樣日日寫紅樓夢寫英式下午茶。出面打生打死，國仇家恨，吳清源繼續沉醉於佢十九路棋盤。《英雄》入面，一樣，出面射箭射到箭豬咁，趙國人照樣寫大字。
正如上一個豬年，罝地記者仲係返通頂更，事前去睇《吳清源》。我呢？仲係精力無盡（讀者心諗：你而家都係喎），工作上，似周瑜咁，雄姿英發，當年真係出花紅已經夠畀首期（你諗下當年屯門市廣場不過係一球嘢，甚至有找）！美好嘅pre 雷曼年代。
亦都正如置記所寫，嗰個係「北妹250、陀地280、鬼妹360、雙飛500」 嘅年代（佢寫咋，我其實都唔係好明即係乜）。你自己諗下，而家起雙飛幾錢？你人工加咗幾多呢？當年太古城幾錢，而家幾錢？當年大家樂幾錢，而家幾錢？而你信官方嘅咩每年3%通脹？
同樣地，另一次，幾年前，啲酒色財氣場合（可惜係冇色的，得班佬）。金融才俊A講起，多年冇再北上尋歡，問才俊B，而家仲係咪358。358者，唔係江西銅，正式嘅寫法係3/5/8。明嘅明，唔明嘅問老豆。才俊B哈哈大笑，「大佬呀，深圳都成皮嘢一尺啦，仲358？柬埔寨都唔得啦」
然後，你話我知，哦，股市有風險，樓市有風險。係呀，唔買就實冇風險，保證輸死。你去邊度搵返你嘅358？真係孟加拉都唔得
係喎，講咁大輪都係話你知，唔投資向下流。每個人心中都有一座斷背山，正如每個人心目中都有一個358。可能係太古城，可能係大家樂，可能係退休唔使做嘅數，可能係買起仇家請條湖南仔要用嘅錢。全部都敵不過邪惡嘅印鈔機。
不過搵唔到358，都可以搵到其他嘢。港豬唔港豬，label嚟啫。你去屌亦舒係港豬丫。最緊要都係，心中嘅平靜。
