【JARvelogue・和牛學／上回】
唔知大家係咪和牛魔王呢？有時候我會收到關於「去日本吃和牛推介？」之類嘅問題。而大家嘅要求往往都係「要抵食、好味、A5和牛」！前兩樣
先唔討論住（脷申: 抵食同好味呢兩樣嘢真係好主觀同好睇你條脷㗎嘛...所以真係好難講，再者今日唔係講呢樣），不過「食和牛必揀A5和牛」呢個諗法，可以知多啲先再決定噃~
A5和牛，一直被視為和牛中最靚嘅等級，而其實A同5，係代表兩個唔同嘅評級。根據《日本食肉格付協会》所訂嘅標準。A 同 5 分別代表「步留等級」同「肉質等級」。步留等級係指一份枝肉（枝肉係指牛豬等去除皮及内臓、再由頭到尾一分為二之後其中一份連骨嘅肉。係有少少複雜sor…）中能夠取得可食用嘅肉份量，由高至低分為ABC，B係標準，比標準多嘅為A，比標準少嘅就係C。
至於肉質等級，則根據脂肪分佈、肉質色澤、脂肪色澤、肉嘅結實度、紋理四大範疇做嘅評核。四個範疇各自會得到一個等級，等級為5（優）、4（良好）、3（標準）、2（較差）、1（劣）。四個範疇中最低評級嘅，就會成為該肉嘅最終肉質等級。例如: 某肉嘅四個等級為5553，最終肉質等級都只會歸納為最低數值3（標準）、即係話咁多5都無用，最後比個3拖垮咗...
講到呢度，我諗聰明嘅朋友應該有頭緒喇！對食客而言，肉質等級當然重要，但係步留等級，其實係評定由每隻買入嘅牛當中，能夠切出幾多份量嘅肉，呢一點其實係對畜牧業界、肉商同餐廳比較有關係。細聲講：隻牛可以切到幾多肉同消費者又唔算有直接關係嘅，反而肉質夠靚緊要啲...(不過，其實仍然有「間接關係」嘅，始終能夠飼養出「步留等級」高嘅牛，代表嗰個牧場都有一定實力同品質保証，所以都係食客嘅參考標準) 無論如何，A5係最高等級呢點係無錯嘅，但係呢個標準算係俾業界睇、綜合食客同商家利益嘅一個等級。
好喇睇到呢度，可能會有人話: 嘩咁同一品種、同一部位嘅A4和牛 VS C5和牛，係咪應該見5就揀、唔好理 A 唔 A 啦? 嗱嗱嗱...冷靜啲...「牛學」之大點會咁簡單呢？下回繼續「牛學分享」～
#JARvelogue
#講開又講牛真係好難推介
#大家要求真係可以好唔同
#所以放過我啦
#有咩想知置頂post嘅周遊地圖啦
#btw圖為福岡某燒肉餐廳
#好多人識嗰間
#睇吓有無朋友都去過先
#如果無下次再講返係邊間
#又btw我個樣好肚餓吓喎
btw圖為福岡某燒肉餐廳 在 至少要體驗一次！福岡15間必吃的美味燒肉店 的相關結果
福岡 除了有吃不盡的美味料理外，也有許許多多好吃的燒肉店唷。這回將為您推薦15間必吃的燒肉店。 ... <看更多>