關於 cfa level 1課程 ，我們在網路上蒐集到這些相關的討論、資訊與評價

［不如轉行賣飛機餐？］舊年國泰收入係1070億，大家樂係80億。慢慢賣。

TLDR：你一HKG- HKG賣百幾個位，當你買到幾千蚊，夠唔夠出一個機師一個月糧？並非針對機師，而係航空公司收入之大，遠超你想像。但開支之大，亦遠超你想像！

1. 冇法，航空業而家困境就真係百年一遇，大鑊過金融海嘯。同金融海嘯唔同，呢個唔係信心問題，唔係流動性問題周轉問題。係十分簡單地，啲機全部晒太陽，冇得飛，點搞？（＊）

2. 之後會寫，但我以為係常識。國泰舊年一年收入107b HKD（1070億），一日就係293m （293！邪！又可以在信報寫返一版講數字玄機！）。一日近3億收入。正常情況下，而舊年已經唔係特別好嘅一年。

3. 咁所以，用你嘅常識諗下，你嗰啲咩空中暢遊HKG-HKG，之前寫過，一班收入，先得10萬左右—都未同你計任何成本—但當你淨袋，蘋果個圖都好多人講啦，機師幾球嘢一年大有人在，你班咁嘅空中暢遊，未夠佢一個星期人工。你搞得幾多班？

4. 一個月燒緊15-20億，你可以計下條數。唔復航都係冇得搞，至少都開返大陸。

5. 所以，乜乜空中暢遊，正如一路講，當marketing 當corporate image就可以。但你啲網友講到「開拓新收入」，就going to far了。不妨睇多次上面兩段

6. 至於賣飛機餐，可能好少少，懶計。但，近乎最大嘅香港上市餐飲公司，大家樂（341），一年先做得80億港紙生意。國泰一年做1070億。你話呢？（當然，理論上，可以話大家樂利錢高過國泰嘅—但你總唔見士歪呀一早摺咗國泰去搞間士歪樂）

7. 以上種種，都係畀你睇到，航空業呢啲，就真係「好睇唔好食」。收入多多，利錢低低。

8. 係喎，國泰話一個月燒緊15-20億—應該都只係講現水，都未同你計折舊呀之類，「仲有買快運嘅goodwill write off」「4倍book 買咁過癮丫拿」（當然事後講梗易）

9. 之後會再寫下，國泰人工，係咪特別高。請訂定Patreon（https://bit.ly/31QmYj7）

10. 不過可以透露嘅係，大家總要搵something to hate，咁除咗怪肺炎源頭外，最常見就梗係「炒咗啲高層最實際」，雖然你發現「高層」好似唔係特別多。

11. 可以分享嘅係蔡東豪嘅名句：公司搞到大裁員，十居其九都係有人做錯決定—今次你可以話唔係，我唔會反對—但下半句先係重點：不幸地，一般嚟講，負責炒人嘅，往往亦係最初做錯決嘅同一班人。

12. 咁會唔會炒咗自己？都唔一定唔會嘅，但幾大拎到大大個黃金降落傘啦

13. 至於「重組成本」一大舊，到時乜都打晒落去，big bath kitchen sinking，就指定動作了。同咩供股供質數11供7之類一樣，真係指定動作。你求其考個CFA level one 都應該識—「但都仲係有人唔知然後同你講我係咪要好波過美斯先可以質疑佢」

14. 記住，應該Patreon篇文會寫下蘋果個表（其實都係國泰年報），人工係咪特別高？當然係高層嘅實畀人屌（人工包埋），機師就靚仔冇人屌。但除此以外，應該仲有其他方法去判斷下嘅。我就唔認為特別高。Stay tuned （https://bit.ly/31QmYj7）

（＊）不過呢，話說回頭其實韓仔或者台仔嗰啲航空公司甚至唔使點輸錢，就真係因為貨運。但國情不同啦。希望唔好又有人出嚟話「一早應該學乜乜乜」。正如個撚個早兩年講香港足球學「冰島模式」，而家當然得啖笑冇人講（冰島係歐國聯咁多隊戰績最差）。你不能見人乜乜乜就去學的。再直啲講，「學台灣模式下話」，你減七成人工先再討論。我肯定台灣冇咁多人用埃瘋拾二食米芝蓮用愛馬士。

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張兩個月已600人訂！仲有兩篇免費試睇：https://bit.ly/31QmYj7
——————————————————
instagram @ivanliresearch．七成金融（短打）兩成嘢食一成其他嘢。

——————————————————————————
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010

內容:
*軟件股IPO狂潮
*買平台股好過
*人民幣強勢買咩好?

本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145

［宏願縱未了 奮鬥總不太晚］其實都係個人喜好啫，不用上綱上線。

TLDR：埃汾唔買錶。扯，手得兩隻，戴得幾多隻？都唔明啲人買咁多隻做乜。不過男人賓周都得一條，但個個想三妻四妾，OK你唔係咁膚淺你係神交唔係性交，但你個腦都係得一個啫。

1. 華爾街日報（我是付費訂戶，幾抵睇）選中埃汾做survey！梗係kai 先啦，粗身People喎，可以做猶太皇民喎。

2. 咁但，明顯地，華爾街日報冇偷睇我啲FB Post，或者小朱冇賣我嘅data畀佢地，或者仲未識睇廣東話。

3. 應該寫過幾次（https://fbook.cc/3HK5）（https://fbook.cc/3HK6），埃汾係唔戴錶嘅，由2008年8月後就冇再戴（你可以估下點解係2008年8月，後記解）（＊）。500蚊美金隻蚊？真係所託非人。我成世夾埋買錶都未用到500蚊美金，除非你計埋部電話

4. 當然啦，自己唔戴，都可以買嚟收藏嘅。香港人嘅理想係ISSEY MIYAKE三宅一生嘛，一層炒一層住一層收租嘛。同樣地，我聽啲炒家朋友（OK，佢地話係「收藏家」），波鞋紅酒都係咁玩。波鞋就一對著一對炒一對收藏，紅酒就一支飲一支炒（怕且唔係炒牛尾）一支收藏。「如果女都可以係咁就好」。又，香港人對個三字真係有異常嘅執著，果然個個前世都係日本人，你知日本乜鬼都要三大乜乜，御三家是也。牛肉飯都有御三家，吉野家Sukiya同松屋，養錦鯉都要大正三色昭和三色（而呢兩又正係「錦鋰御三家」嘅兩款，可惜並冇平成三色或者令和三色），我真係醉了。

5. 不過本人，其實近乎係唔收藏任何嘢的。投資就只係股票同樓，「仲有投資落自己度」。勉強講，咪有金幣，十幾廿萬咁啦（梗係港紙），完全唔係乜。

6. 但，作為一個盡責又玩嘢嘅用戶，我都有照參加個survey！結果佢問「有幾多隻五舊水嘅錶」，我照揀「一隻都冇」，就GG了！

7. 其實，咁多隻錶，手就最多得兩隻（除非你係八爪魚），有多嘅肯定就係炒啦。正如屋都係，有兩間屋嘅肯定係炒家啦，我地一齊鄙視佢地。

8. 不過諗真啲話又唔係咁講，係呀，「手得兩隻」。但，賓周得一條添，啲有錢佬咪又係要三妻四妾，晚晚換情人床頭燈餐餐照唔同人理過癮（識唱一齊唱）（＊＊）。你見啲愛情動作片咪又係要3P 4P，幾時都係貧窮限制想像力（＊＊＊）。

9. 其實講到尾都係個人喜好，中產很多就係麻撚煩（我冇話我唔係），要人認同嘛。之前Punch Magazine就如此形容Middlebrow（當然同中產唔係完全一樣），係咩人？ It consists of people who are hoping that some day they will get used to the stuff they ought to like.　自己細味下。有幾多人迫自己鍾意飲紅酒？

10. 中產嘛，唔好虧代自己（＊＊＊＊），冇隻勞點似樣？我阿爺我老豆都好似咁同我講，但我幾時有聽過佢地講嘢？我令田家（＊＊＊＊＊）絶後都係咁啦。

11. 都係，喜好同價值觀啫，我有個朋友（是真的），同條女意大利，餐飯又幾千銀，開支酒都幾千銀—但佢為咗酒店平兩百蚊港紙住到遠一遠，睇博物館就等星期一定二免費。我舉呢個例唔係批判佢，而係，都係價值觀啫。可能每個人心中都有啲洗錢行為，係其他人不能理解嘅。姐係，我覺得人買隻錶嘥錢，人地一樣可以覺得我買報紙嘥錢—問題係我又訂電子版又買印刷版喎！歷年嚟，都夠我多買幾隻錶啦

12. 所以，好煩，但再講多次，好多時都係喜好同價值觀嘅問題。咁喜好價值觀就無分對錯嘅，「雖然有啲人鍾意睇人獸交，有啲人鍾意睇小朋友，都係一種品味啫，無分對錯嘛」。

13. 最後一講，我唔知價，但，「5舊水美金叫fine watch，香港會唔會畀人笑？」。又，講明係mechanical timepiece，明顯踢走啲iWatch撚，雖然我連iWatch幾錢都唔知（都話2008年開始冇戴錶，iWatch都係錶）

（＊）冇錯係北京奧運，但只係咁啱。實情我係嗰年考CFA Level III 兼Pass，資深讀者應該知到。咁，唔使再考試，就唔使再戴錶。

（＊＊）咁就三十年（https://ggle.io/3Xoh），又，首歌夠晒有前瞻性，「鬼妹賓記南韓亞太各國統統有我份」，早就預言韓妹堀起，雖然我估只係歌詞啱音夾硬填入去，「南韓」咪「亞太」一部份，但做人唔好太過古德明。又，識睇當然係睇柏安妮，當年佢拍埋呢套嘢就引退，而家變咗Ann Bridgewater，真係Trouble over Bridgewater，而梁家輝梁朝偉甚至鄭丹瑞事隔三十年都仲係十分活躍，唔知好事定壞事。

（＊＊＊）分享少少，真實朋友知，但呢度好似冇講。埃汾老豆呢，當年只係一個地盤佬，一樣可以兩頭家。貧窮並冇限制佢嘅想像力，證明我冇想像力係我問題。

（＊＊＊＊）呢個typo係專登的， Google下你就明，特登打錯字，向返原文致敬。正如Will Smith套戲叫The Pursuit of Happyness，而我去春園街食
鹵八鵝店打卡都係呢句The Pursuit of Happyness，套戲有話你知點解戲名串鈤字，正如《高海拔之戀II》有話你知點解冇I，《狂舞派3》有話你知點解冇2（我估亦受向《高海拔之戀II》致敬）。正如埃汾會寫「外資切尼」「姿色改變命運」「春風化乳」「有教無淚」「有口皆悲」等等。

（＊＊＊＊＊）埃汾本姓田，another story

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張兩個月已600人訂！仲有兩篇免費試睇：https://bit.ly/31QmYj7
----------------------------

instagram @ivanliresearch．七成金融（短打）兩成嘢食一成其他嘢。

——————————————————————————
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010

內容:
*軟件股IPO狂潮
*買平台股好過
*人民幣強勢買咩好?

本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145

［墨斗先生］出醜記，全無公共性。

TLDR：信我，三千幾字全無公共性的，亦冇任何教訓。純係睇我出醜。「應該冇公共性下話？」

1. 是咁的，埃汾搬Office嘛。當然我Whatspp呀，Personal Facebook就咁貼相講new office，就有人以為返新工啦。都係我唔好。

2. 但在呢度有寫明唔係轉工唔係被炒，同一間公司同一個位，只係搬離上環（定中環？好似都係講中環勁啲），去到灣仔。

3. 其實星期五六開始大遷徒，星期六日可以返去試機。但我呢啲住大西北嘅，當然唔會星期六日返去啦。

4. 掉轉，今日（星期一）我選擇早啲返去，慎防有乜死人冧樓嘛。換著以前我會六七點返到去添，即係星期日晚唔訓（反正我星期六日訓到日落先起身）。但而家唔會了，歲月不饒人，以前睇通頂波再去考試又得，考A level 都得。後來？考CFA都試過—結果？我下半場在機場博覽館訓著咗。嗰次當然肥埋。

5. 真的，年紀大，呃唔到人，差不多人人都係咁。後生時夜蒲通頂，第朝依然好有精力返工。而家？都得，但訓少四個鐘，我之後要用返兩三倍嘅時間補。唔著數。

6. 言歸正傳，見到一切都大約順利。咁應該做乜？當然係食早餐。實情以前我差不多一定係食完先返公司—記住，呢個係伏線。

7. 灣仔嘛，好餐廳當然多。實情我以前都返過灣仔，唔止一次，今次已經第三次返灣仔。最初係菲林明道乜乜小學嗰邊，之後係駱克道近入境橋。而家？修頓後面。真係由灣仔嘅左岸，去到右岸，又去返左岸。彈出彈入—我甚至未計耆英年代，返太古廣場三期（https://bityl.co/3bQ2），八年。嗰個位叫咩區？視乎我對住咩人講。對的士佬，我就會講大佛口，所有四張幾以上嘅司機都明。對住女？我就會話我返金鐘（！）。但對住正常人，嗰度係「灣仔同金鐘中間」（當然地區塔利班可以堅持呢個世界冇金鐘區，我明）。而嗰時已經去咩蘭杜街呀之類食嘢，點會唔係灣仔？

8. 可惜，絶大多數嗰三份工食過，而好食嘅餐廳，都係執撚晒嘅。殺人放火金腰帶，修橋補路冇屍駭。但你話地產霸權？但至撚難食嘅，屹立多年不倒喎。例如檀島。證明係我嘅品味同其他人唔同。

9. 好啦，食早餐，行行重行行，諗嚟諗去諗唔到。行到去，軒尼詩冰廳（https://bityl.co/3bQC）。純係因為當年食過還好，雖然已經轉咗手（https://bityl.co/3bQD）。

10. 仲有，我去食，唔多唔少同我個妹有關—又係伏線。我個妹有一排返過灣仔，有時都會一齊食飯。我妹當時老細係一個意撚，成日都去呢間嘢（未轉手前），佢仲練好佢嘅廣東話，食完好撚型咁：「唔該埋單」。

11. 結果？個侍應望都唔望佢，只係同佢講「歐嘥歐嘥」

12. 無論如何，軒尼詩冰廳，轉咗手，故事嘅舞台。嘢食還好，個沙爹牛麵係咪福麵？明顯唔係一丁又唔係大光麵。奶茶就奶味太重又太甜，明明叫小甜。但嘢食係冇投訴的，呢篇文唔係投訴。雖則我應該唔會再去，因為有啲陰影。但全係我個人問題。

13. 好啦，食完，起身啦，埋單啦，都係「歐嘥歐嘥」

14. 其實你睇今次篇文個題，或者睇到張相，都估到：仆街，我冇帶錢！！！

15. 我唔知你地啦，但呢啲嘢，我都唔係第一次啦，都唔使太驚。咪諗下點應變。但不如你都同時諗下。

16. 「用八達通啦！」—　Negative！首先間嘢唔收八達通。另外，我想講，我唔係銀包冇錢，而係冇帶銀包！！！！

17. 拿，咁就仆街啦。因為，你下一個選項，「去提款機」，都係冇用。都話冇銀包，哪來提款卡？

18. 咁你會點？

19. 返公司拎？唔係唔得。但落大雨，而我冇帶遮。唔止，我係根本冇帶遮返工。行返去公司，行返嚟軒尼詩冰廳，再行返公司。冇話唔得嘅，但，有冇更好方法？

20. 「叫同事打救我」—應該話，叫我啲o靚打救我。我估正常，你都唔會搵CEO架可？但，其實，一個正常人，都唔應該落大雨叫同事落嚟拎銀救你的。對不？

21. 好，你估到了，伏線。「叫阿妹嚟救」。好多人都係咁，亦係人之常情。對外人，對網友，甚至對街邊隻狗都大愛。但對屋企人就另一標準。正路地，其實叫我妹嚟救我，都係一個選擇。

22. 可惜，佢已經炒撚咗意撚魷魚（我戲稱為干炒意撚）（果條意撚真係好極品，極品過意粉，有機會講下），點救我？雖然我再後來（即係打呢篇文時）知道，佢剛剛又去咗灣仔返工。但灣仔都好大，佢在灣仔尾。咁一個正常嘅阿哥，唔應該叫個阿妹咁做嘅。

23. 好啦，by 二廉蚊喱唇，仲有乜選擇？

24. 我硬著頭皮同包皮，去同阿姐講，我冇帶錢。咁阿姐當然冇同我講「咁八達通」，因為唔收。阿姐好友善咁話我知，咁呀，微訊支付，Alipay啦。

25. 弊在我都係冇。同安唔安全中唔中國冇關，冇就係冇架啦。

26. 看官，仲有乜選擇呀？但我當然係諗到點做先去埋單啦，否則？我可能真係等到停雨再決定行返公司。

27. 蘋果呸？都話八達通都唔收咯，所以都唔使研究我有冇連張八達通落埃瘋。

28. 你估到呢，登登登登。就係，傳說中嘅，無卡提款！（發毒誓，唔係廣告，廣告文咁寫，個客應該屌到我上天花，或者當我係神）。

29. 冇銀包，冇提款卡啫，但有電話嘛！咁咪得。軒尼詩冰廳，行落地鐵好近啫。

30. 咁冇問題丫，咪同阿姐講，我去襟錢。

31. 真的，以前耐唔耐都有呢啲東西發生。咁如果係去開嘅舖頭，實冇問題，甚至有舖頭叫我第日先畀。熟客嘛。

32. 咁但，呢度我係生面口嘛。我同阿姐講我冇錢，又冇微訊支付，又冇Alipay，我話去襟錢。佢都有啲老撾，仲有啲緬甸。然後叫我…..

33. 「咁你…..留低」

34. 佢都未講完，我就主動搶答：「我放低個電話啦」

35. 你見到問題未？

36. 「仆街，我放低咗個電話，又點去無提款卡襟錢呢？！」—典型嘅catch 22．但我唔放低個電話，阿姐點信我？我身上仲有乜可以留低？留副眼鏡畀佢？我應該行唔到出去門口。

37. 幸好，作為一個不可信嘅男人，我係有兩部電話嘅！幾咁重要呢！！！！　（＊＊）。

38. 阿姐望咗望，雖則埃汾兩個字連四十二蚊都唔值。但，部電話，當垃圾賣都唔止四十二蚊嘛，就放咗我走。

39. 大團圓？未！Except one thing

40. 邊個話你知，我戶口係有錢架呢？

41. 哈哈，就在呢個關頭，我個戶口，係得返幾十蚊嘅！死未！做金融才俊（我幾時話我係呢？我又冇去酒樓聽楊千嬅唱梅艷芳）做得你咁頹！

42. 幸好，我自己知自己事。咪話我妹係伏線咯，我未去同阿姐講，已經睇咗戶口結餘，知出事，仲叫咗我妹payme 轉住一舊水嚟先啦。咁我妹當然二話不說就做，但都不忘問句，做乜係一舊水。咁人生嘅嘢，爭一舊水就係一舊水架啦！雖然「一舊水」而家都唔係一舊水（明嘅自然明）

43. 咁，結局啦掛。但又未完！你睇，睇我啲文，睇我襟錢，好撚似你去買土耳其雪糕咁，幾有黏性，死唔斷氣，次次你以為到手都走返！（＊＊＊）

44. 我歡天喜地咁逃出軒尼詩冰廳，落到灣仔地鐵，搵恒生櫃員機。哈哈哈，仲要冇乜人，爽。埋去，襟機，唔掂，出唔到。喂，我明明望咗戶口有一百幾十蚊架喎

45. 「此機只供應500元紙幣」

46. 仆你個街！有冇咁撚幽默呀！唔係拎埋張receipt讀者以為我吹水呀！

47. 所以，你咪見到第一張失敗嘅receipt！試多部，又係咁！所以咪有第二張

48. 幸好，天助自助者，我百折不撓嘅精神，卒之試到第三部就成功。The rest is history（留意receipt上嘅時間）

49. 你問：如果部部機都只係得500蚊紙，咁點算？咁我諗都係唯有叫我個妹轉多400蚊嚟。

50. 「如果佢連400都冇呢？」，仆街，有冇咁悲慘世界呀。「咁我估我會上呢度出post」

51. 好，最後講下。即係冇帶錢呢啲耐唔耐都發生，而好少搞到咁大件事。首先因為我成日去嚟去去都係嗰啲地方，多數都認得我，真係幾十蚊走你數咩。一般唔會叫我留低電話，甚至好多時叫我下次先—但我當然唔會咁做，唔好咁啦。唯獨係今次試新舖出事

52. 仲有，點解之前好少會咁出事？因為之前多數食要先畀錢嘅地方。冇錢根本買唔到嘢食。加上，之前我係食咗早餐先返公司嘛。咁我冇帶錢又點坐車呢？唔會的，除非黑到坐車跌咗銀包啦。

53. 拿，3600字，全無公共性。冇呃你。睇得過癮嘅，訂Patreon啦（https://bit.ly/31QmYj7）。講明先，Patreon唔寫呢啲，寫正經嘢，金融經濟。但都係我。冇Patreon，我又邊有動力寫咁多Playboy 麥路人　軒尼詩冰廳呢？某程度上係其他Patreon讀者補貼緊你地（情緒勒索來了！）。所以呢，如果可以的話，就做補貼人嗰個，唔好做被貼嗰個。聽講施比受更有福嘛（所以我做受嗰個，等你地有福）

（＊）忍唔住講多句，我最掛住嘅，係太古廣場三期個廁所。真的，有幾年係成日諗起。當然唔係我在入面做愛（雖然應該可以），我最癲都係在入面訓覺啫。但，個象徵意義好緊要。等於彭浩翔「春嬌與志明」個火爐。我嗰時每屙一次屎，都提返自己，拿，咁辛苦做到仆街為乜？就係為咗在呢啲廁所度屙屎—仲要你一路便秘一路公司都出緊糧畀你。打後好多年，我都冇坐過咁靚嘅廁所，可以在入面訓覺嘅廁所。百幾蚊尺呀朋友，當時仲係全新，你開大嗰度都坐住幾舊水呀。明啦？

（＊＊）呢個理論好多人話混帳，但我都係不停咁同人講，特別係後生女。我話：世侄女，阿叔教你啲做人嘅道理—有兩部電話嘅男人呢，係唔可信架！
然後往往世侄女會反駁，或者其他人會講—喂，好多男人都兩部電話喎，喂，「我都兩部電話喎」。喂，我老公都兩部電話喎—係丫，冇錯，好多男人都兩部電話—男人就係不可信架啦。咁埃汾，你呢？我梗係唔係有兩部電話嘅男人。我係有三部電話的。健力士，妙不可言。

（＊＊＊）我好似冇見過有人用　土耳其雪糕　比喻寫文。但，創作101，將啲唔啦更嘅嘢放埋一齊就有火花。例如「哥本哈根盧永仁」「MK活地亞倫」.但前題係，你要知道咩係土耳其雪糕，去過土耳其更佳，知道點解土耳其雪糕有得咁玩就更好。台上一分鐘台下十年功呀。

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張一個月已500人訂！仲有兩篇免費試睇：https://bit.ly/31QmYj7

——————————————————————————
［收費短片第九擊］美股科技股是否泡沫爆破？價值投資之選

課程資訊：https://homebloggerhk.com/course_detail/?code=CC009

內容:
*美股急跌點算好
*科技股係咪泡沫爆煲？
*有乜價值投資之選？

本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145

另外想買返第八擊（美國總統大選股票部署）都仲可以：https://bityl.co/3NPn