先旨聲明，如果你父母係極少數嘅社會精英，咁就另計，你可以唔使睇了。以下所指嘅係普羅大眾，例如無Instagram帳戶，唔知咩係Snapchat，仲係會覺得網上理財同Online Shopping好唔安全嘅長輩。
.
曾幾何時，我都覺得自己阿爸阿媽好可靠，而且係任何事情都好可靠。依家諗返，都唔難理解，因為我仲係BB嘅時候，白紙一張，乜都唔識，所有嘢都係佢地教我，甚至幫我搞掂，細個覺得父母係神，好合理。
.
後來，人越大，思考越多，見識越廣，我發現喺好多方面，自己阿爸阿媽其實好明顯係好唔可靠。唔係詆譭佢地，因為唔可靠先係正常！父母都係人，能力唔會無限大，父母都有父母嘅煩惱，無人能夠事事可靠、萬事通。
.
大醫生可以唔識上網，大律師可以唔識煮餸，大數學家可以唔識開麥皮罐，每個人都有各自嘅能力範圍。
.
你父母係唔係升學專家？唔係嘅話，相信你會明白，你會唔會搵個考古學家證明Integrate Normal Distribution係無Closed form Solution？
.
更甚者，喺廿一世紀，你會唔會將自己嘅前途，放喺一個無Instagram帳戶，唔知咩係Snapchat，仲係會覺得網上理財同Online Shopping好唔安全嘅人身上？
.
科技進步得實在太快，當上一輩（其實包括埋我）啱啱先學識Facebook嘅時候，年輕一輩連Instagram都差唔多玩爛。今時今日四、五年已經係一個代溝，我同學生講譚玉瑛姐姐，佢地問我乜水，兒童節目主持佢地淨係識笑波子、大J、阿Hin。
.
若然身為年輕人嘅你，都自覺唔太適應呢個世界嘅時候，更何況係你嘅爸爸媽媽？當你都為自己嘅前途而煩惱嘅時候（記住係煩惱）點解你要將自己嘅煩惱轉嫁畀親愛嘅父母？留低一條伏線畀將來嘅你，當發現父母幫你揀錯路嘅時候，令自己有藉口埋怨爸爸媽媽？或者係令佢地有內疚嘅機會？
.
一句講曬，你父母唔係升學專家。就算係，佢地都唔係你。自己條路自己揀，唔好將問題轉嫁畀父母。
.
中三嘅時候，坐隔籬位個哲學發燒友，有次傾開偈，佢話佢最近教阿媽哲學。佢嘅其中一句說話，畀咗我好大啟發：
.
「細個乜都唔識，咪老母教我囉。依家讀咗咁多書，到我教返我老母。」
.
自此，我終於明白父母唔再係神。父母係人，自己都係人。有問題嘅我自己都可以解決，唔一定要永世依賴，喺適當嘅時候，我更加可以幫返佢地，大家都係人，人互相幫助有咩唔得？喺某啲情況，父母唔可靠嘅時候，咪由自己可靠囉！終有一天父母都要靠你，終有一日你都會為人父母。
.
7月11日放榜，小學中學加埋讀咗12年書，成人身份證都就快拎得，香港嘅前途問題就話唔係自己手啫，自己嘅前途問題自己揸返主意，好嗎？就係大事先應該自己話事，唔好要父母操心。
