《Mad World》陳心遙
《信報》2017年2月15日《視線所及》專欄
你記唔記得，喺學校經歷過得唔多開心嘅日子？可能因為俾同學針對、俾先生鬧或者考試測驗成績唔好，而心情低落一排，短嘅一兩周，長嘅可能維持一兩個月？人大咗，回望返轉頭就會覺得當時嘅憂鬱好幼稚，好中二病。但係當一個人喺同一個場地或空間，見住同一班人，日復日，久而久之好易有錯覺，以為身處地方嘅人同事就等於全世界。唔明？你每日處心積慮要喺公司上位，喺業界闖出名堂，或者要做一城之首，期間千思萬念，喜怒哀樂，抽返身出嚟睇，唔係一樣咁虛妄咩？當局者迷，冇得責怪局中人嘅。
網上見到某歌唱比賽，一個20歲左右嘅小妹妹唱出一首英文歌；圓熟嘅歌唱技巧，唱到慷慨激昂，評判都擊節讚賞。不過就係唔知歌手唱之前究竟係咪真係了解歌詞內容啫。
首歌叫Mad World，係八十年代英國著名電音組合Tears For Fears嘅名曲；係樂團成員Roland Orzabal喺19歲嘅時候作嘅。內容出自佢自己童年抑鬱嘅真實經歷，講佢對於孤單苦澀嘅生活感到無助同絕望。歌詞甚至有少少自毁嘅傾向：「The dreams in which I'm dying are the best I've ever had.」首歌喺八十年代成績唔錯，但始終都係一首老舊嘅歌，真正令首歌重生嘅係一部心理驚慄片：《死亡幻覺》（Donnie Darko），由Jake Gyllenhaal主演，故事係講一個有心理問題嘅少年嘅超現實經歷；用咗Mad World做電影主題曲，不過就由美國民謠歌手Gary Jules，用抒情、緩慢但帶點神秘嘅風格翻唱，意外咁歌比電影更受歡迎，成為新世代嘅經典。
歌曲MV由殿堂級嘅法國MV導演、電影《無痛失戀》嘅導演Michel Gondry操刀，一鏡直落，由十幾層樓高空，影住一大班啱啱放學嘅學生，喺地面砌出各種圖案，象徵年輕嘅心各種天馬行空嘅夢想，對比現實嘅荒謬。
大人或者已經對瘋狂嘅世界麻木，或者適應，但青少年嘅心思敏感纖細，對當下現實嘅感覺唔係大人容易明白，喺大家掛住宏觀問題爭拗不絕嘅時候，可唔可以都對青少年朋友認真一下，佢哋嘅喺網上、無論係歌曲創作、短片創作，甚至係社交網站嘅一張相，一個post，其實已經發出咗好多訊號，對於未來前途嘅絕望，對當下無盡考試、評核、操卷、補習嘅痛苦，其實不下於大人對生活壓力嘅無奈。爆煲嘅大人都大有人在嘅時候，你相唔相信喺懸崖邊緣嘅後生仔都大有人在呢？有冇人喺制度上可以改變一下現狀呢？
無獨有偶，電影《一念無明》嘅英文片名都叫Mad World，我哋癲就夠喇，唔好留低一個更加瘋狂嘅社會俾下一代，好嗎？
#madworld #tearsforfears #garyjules #donniedarko #死亡幻覺 #無痛失戀 #一念無明 #瘋狂世界 #取消tsa #信報 #陳心遙
