《單純地去替一個人開心，係咪咁難？》
十月我就會搬屋了，呢件事其實都計劃咗一段時間，我一直都無好公開咁同自己朋友講。到最近接近搬屋嘅日子，呢單野就變得透明，同時我就聽到有啲人會有好有趣嘅回應。
大部分人聽到我同麥仔要同居，第一個反應都一定係問：「結婚呀？」，當我答完「唔係呀」，大家就會開始出現唔同反應。例如係溫和嘅「咁幾時結呀？」，又或者係激進嘅催婚/意見指導⋯聽過有人教我千其唔好同麥仔AA制、要乘機逼麥仔婚、先同居好唔著數，亦有聽過人叫我唔好搬晒啲嘢入去，帶兩件衫住下先啦⋯意指如果同居完分手就非常麻煩。
我相信所有建議都係來自真心，不過每一次我都覺得呢啲「真心為你好」嘅建議好難聽。結婚都一樣會離婚，你會唔會去勸結婚嘅人「唔好簽紙住呀，一陣離婚好麻煩㗎嘛」？既然唔會，你又憑咩勇氣去勸我搬少少入去先啦？
呢啲說話令我最Hard Feeling嘅位，並唔係我唔願意聽人哋批評、或者聽到現實有可能出現好負面嘅一面。而係我覺得講呢啲說話嘅人，大多數都並唔了解我同麥仔，並唔清楚我哋嘅狀態同感情，就肆無忌憚咁對佢、或者對我哋指指點點。你連我哋兩個想幾時結婚、或者係想唔想結婚都唔了解，憑咩去教我點逼婚？一定係女仔想結婚男仔唔想㗎咩？同居唔結婚女仔一定會蝕底㗎咩？
如果你唔了解所有情況之前，請勿對別人嘅人生/另一半指手劃腳。我唔需要人教我做人了，我過得很好，麥仔都很好。如果係真心地想我好，替我哋即將同居呢單野感到興奮/期待就OK了。我哋已經係三十歲嘅成年人，有心有心。
少批評，多關心。呢個世界會變得更美好。
至於麥仔，只有我可以批評同攻擊，大家唔可以㗎知嗎。
IG：@hkgirlfriend
FB：港女友
hkgirlfriend 在 港女友Hong Kong Girlfriend. - Facebook 的推薦與評價
港女友Hong Kong Girlfriend. 36307 likes · 13 talking about this. 九十後死港女，戀愛大過天，持愛行凶，希望用閃光彈救地球。 // IG：@hkgirlfriend... ... <看更多>